সশস্ত্ৰ আক্ৰমণকাৰীয়ে আক্ৰমণ কৰি কাৰাগৰৰ পৰা ১,৮০০ ৰো অধিক কাৰাবান্দীক পলুৱাই নিছে। এই অভাৱনীয় ঘটনাটো সংঘটিত হৈছে আফ্ৰিকান দেশ নাইজেৰিয়াত।
সংবাদ সংস্থা বিবিচি-এ প্ৰকাশ কৰা অনুসৰি আক্ৰমণ সংঘটিত কৰি মুঠ ১৮৪৪ গৰাকী কয়দীক লৈ পলায়ন কৰিছে আক্ৰমণকাৰীয়ে।
কোনো বিচ্ছিন্নতাবাদী সংগঠনে ওৱেৰীস্থিত কাৰাগাৰত আক্ৰমণ সংঘটিত কৰি এই বৃহৎ পৰিমাণৰ কয়দী পলুৱাই নিয়া বুলি প্ৰকাশ কৰিছে নাইজেৰিয়ান প্ৰশাসনে।
বাছ আৰু ট্ৰাকত অহা অত্যাধুনিক বন্দুক-বাৰুদেৰে সশস্ত্ৰ আক্ৰমণকাৰীয়ে কাৰাগাৰৰ প্ৰশাসনীয় ভৱনটোত বিস্ফোৰণ ঘটাই কাৰাগাৰৰ ভিতৰত প্ৰৱেশ কৰে আৰু কয়দীসকলক উলিয়াই পলুৱাই নিয়ে।
সংবাদ সংস্থাৰ বাতৰিৰ মতে সোমবাৰে পুৱতি নিশা আক্ৰমণকাৰীসকলে অস্ত্ৰেৰে ধুমুহাৰ গতিত আক্ৰমণ সংঘটিত কৰে। সমগ্ৰ কাৰাগাৰৰ আচবাব-পত্ৰ আৰু কাৰাগাৰৰ বাহিৰত থকা সকলো বাহন আক্ৰমণকাৰীৰ গোলা-বাৰুদৰ আক্ৰমণত ভস্মীভূত হৈছে।
নাইজেৰিয়ান আৰক্ষীয়ে নিষিদ্ধ বিচ্ছিন্নতাবাদী গোট ইণ্ডিজেনাছ পিপল অৱ বিয়াফ্ৰাৰ বিৰুদ্ধে এই আক্ৰমণ সংঘটিত কৰাৰ অভিযোগ উত্থাপন কৰিছে। কিন্তু এই সংগঠনটোৱে এই ঘটনাত জড়িত থকাৰ কথা অস্বীকাৰ কৰিছে।
আনহাতে পলায়ন কৰা ছগৰাকী কয়দী পুনৰ কাৰাগাৰলৈ ওভতি আহিছে আৰু ৩৬ গৰাকী কয়দীয়ে পলায়ন কৰিবলৈ অস্বীকাৰ কৰি কাৰাগাৰতে থাকে বুলি প্ৰকাশ পাইছে।
দেশখনৰ ৰাষ্ট্ৰপতি মোহম্মাদু বুহাৰীয়ে এই আক্ৰমণক ‘নৈৰাজ্যবাদীসকলৰ’ দ্বাৰা সংঘটিত ‘সন্ত্ৰাসবাদী কাৰ্য’ বুলি অভিহিত কৰিছে। ৰাষ্ট্ৰপতি বুহাৰীয়ে নিৰাপত্তা বাহিনীক আক্ৰমণকাৰী আৰু পলাতক বন্দীসকলৰ বিৰুদ্ধে অভিযান তীব্ৰতৰ কৰিবলৈ নিৰ্দেশ দিছে।
ইফালে সংবাদ সংস্থা এএফপি-ৰ আগত ইণ্ডিজেনাছ পিপল অৱ বিয়াফ্ৰাৰ মুখপাত্ৰই এই ঘটনাত জড়িত থকাৰ যি অভিযোগ উত্থাপন কৰা হৈছে তাক অস্বীকাৰ কৰি কৈছে যে দেশখনৰ চৰকাৰে তেওঁলোকৰ বিৰুদ্ধে মিছা অভিযোগ আনিছে।
উল্লেখ্য যে দেশখনৰ ইমো ৰাজ্যত বিচ্ছিন্নতাবাদী শক্তি অধিক শক্তিশালী হৈ উঠিছে আৰু খিলঞ্জীয়া ইগব’ জনগোষ্ঠী আৰু নাইজেৰিয়ান কেন্দ্ৰীয় চৰকাৰৰ মাজৰ সম্পৰ্ক ক্ৰমশঃ তিক্ত হৈ পৰিছে।
স্মৰ্তব্য যে যোৱা জানুৱাৰী মাহৰ পৰা দক্ষিণ-পূৱ নাইজেৰিয়াত কেইবাখনো আৰক্ষী থানা আৰু নিৰাপত্তাৰক্ষীৰ বাহনত আক্ৰমণ কৰি বিচ্ছিন্নতাবাদী সংগঠনটোৱে বৃহৎ পৰিমাণৰ অস্ত্ৰ-শস্ত্ৰ কাঢ়ি নিছে।
ইফালে বিবিচিৰ বাতৰি মতে এই আক্ৰমণৰ দায়িত্ব বৰ্তমানলৈকে কোনো সংগঠনে স্বীকাৰ কৰা নাই।