ইৰাণ আৰু আমেৰিকাৰ মাজত শান্তি চুক্তি স্বাক্ষৰিত হোৱাৰ পিছতেও দুই পক্ষৰ মাজত উত্তেজনা মাৰ যোৱা নাই। ইয়াৰ পোনপটীয়া প্ৰভাৱ পৰিছে ভাৰতৰ ইন্ধন সুৰক্ষা আৰু সামুদ্ৰিক বাণিজ্যৰ ওপৰত। শেহতীয়া তথ্য অনুসৰি, পাৰস্য উপসাগৰৰ পৰা ভাৰত অভিমুখে অহা ৬০ শতাংশতকৈও অধিক বাণিজ্যিক জাহাজ হঠাতে নোহোৱা হৈ পৰিছে। সাধাৰণ ট্ৰেকিং ছিষ্টেম বা ৰাজহুৱা নিৰীক্ষণ ব্যৱস্থাত এই জাহাজবোৰৰ অৱস্থিতি ধৰা পৰা নাই। হৰমুজ প্ৰণালী অতিক্ৰম কৰাৰ সময়তে এনে ঘটনা ঘটি থকা বুলি ৰাষ্ট্ৰীয় সংবাদ মাধ্যমত প্ৰকাশ পাইছে।
অৱশ্যে ইয়াৰ আঁৰৰ আচল সত্যটো এতিয়া পোহৰলৈ আহিছে। এই জাহাজবোৰ প্ৰকৃততে হেৰাই যোৱা নাই। নিৰাপত্তাজনিত কাৰণত আৰু আক্ৰমণৰ আশংকাৰ পৰা বাচিবলৈ জাহাজবোৰে ইচ্ছাকৃতভাৱে নিজৰ লাইভ লোকেচন বা ৰাজহুৱা স্থান সম্প্ৰচাৰ কৰা ব্যৱস্থাটো বন্ধ কৰি ৰাখিছে। সামুদ্ৰিক পৰিভাষাত ইয়াক গ’য়িং ডাৰ্ক অৰ্থাৎ অন্ধকাৰলৈ যোৱা বুলি কোৱা হয়।
সাধাৰণতে প্ৰতিখন বাণিজ্যিক জাহাজতে স্বয়ংক্ৰিয় চিনাক্তকৰণ ব্যৱস্থা বা এআইএছ নামৰ এটা প্ৰযুক্তি থাকে। এই ব্যৱস্থাৰ জৰিয়তে জাহাজৰ পৰিচয়, স্থান, গতি আৰু গন্তব্যস্থানৰ বিষয়ে অহৰহ তথ্য প্ৰেৰণ কৰা হয়। ইয়াৰ ফলত সাগৰৰ বুকুত আন জাহাজৰ সৈতে সংঘৰ্ষ এৰাই চলা আৰু বন্দৰ কৰ্তৃপক্ষৰ বাবে নিৰীক্ষণ কৰাটো সহজ হয়। কিন্তু বৰ্তমানৰ যুদ্ধসদৃশ পৰিস্থিতিত এই লাইভ লোকেচন সম্প্ৰচাৰ কৰাটোৱেই জাহাজসমূহৰ বাবে ডাঙৰ বিপদ হৈ পৰিছে।
জাহাজ চলাচল সংক্ৰান্তীয় আন্তৰ্জাতিক চোৰাংচোৱা সংস্থা কেপলাৰৰ প্ৰতিবেদন অনুসৰি, প্ৰায় ৬২ শতাংশ ভাৰতমুখী টেংকাৰ আৰু পণ্যবাহী জাহাজে হৰমুজ প্ৰণালী পাৰ হোৱাৰ সময়ত নিজৰ এআইএছ সংকেত বন্ধ কৰি ৰাখিছে। শ্বিপিং কোম্পানীবোৰে আশংকা কৰিছে যে জাহাজৰ অৱস্থিতি ৰাজহুৱা কৰিলে শত্ৰুপক্ষই সহজে লক্ষ্য কৰি ল’ব পাৰে।
বিশেষজ্ঞসকলৰ মতে, বৰ্তমানৰ পৰিস্থিতিত এই অঞ্চলটোত বাণিজ্যিক জাহাজৰ সুৰক্ষাৰ বাবে ইয়াৰ বাহিৰে আন কোনো ভাল উপায় নাই। সাধাৰণ ৰাইজ বা বাণিজ্যিক ট্ৰেকিং ৱেবছাইটত এই জাহাজবোৰক অদৃশ্য যেন লাগিলেও আচলতে সেইবোৰ সুৰক্ষিত অৱস্থাত আছে। নৌসেনা, উপকূলৰক্ষী বাহিনী আৰু নিজা শ্বিপিং কোম্পানীৰ সৈতে সুৰক্ষিত আৰু গোপন মাধ্যমেৰে জাহাজসমূহে সদায় যোগাযোগ বাৰ্তালাপ বজাই ৰাখিছে। মেৰিন ইনচাইটৰ তথ্য অনুসৰি, বিগত ৭২ ঘণ্টাত ৯খন ভাৰতমুখী আৰু বিদেশী পতাকাযুক্ত জাহাজে সফলতাৰে হৰমুজ প্ৰণালী পাৰ হৈছে, যাৰ ভিতৰত ৭খন জাহাজ পোনপটীয়াকৈ ভাৰতৰ ফালে আহি আছে।
অৱশ্যে এতিয়াও বহু কেইখন জাহাজ সাগৰৰ বুকুত অপেক্ষা কৰি আছে। সূত্ৰৰ খবৰ অনুসৰি, অন্ততঃ ১৫খন ভাৰতমুখী জাহাজ পাৰস্য উপসাগৰীয় সেউজ সংকেতৰ বাবে ৰৈ আছে, যাৰ ভিতৰত ১০খন ভাৰতীয় পতাকাযুক্ত জাহাজ। এই অপেক্ষাৰত জাহাজসমূহৰ ৪খনত সাৰ আৰু এখনত ইন্ধনজাতীয় সামগ্ৰী আছে। বৰ্তমান সমগ্ৰ পৰিস্থিতিৰ ওপৰত ভাৰত চৰকাৰে তীব্ৰ নজৰ ৰাখিছে। প্ৰতিৰক্ষা বিশেষজ্ঞসকলৰ মতে, ভাৰতৰ ইন্ধন আমদানিৰ সুৰক্ষা নিশ্চিত কৰিবলৈকে এই সাময়িক ব্লেকআউট বা ট্ৰেকিং বন্ধ কৰাৰ নতুন কৌশল গ্ৰহণ কৰা হৈছে।
