আগন্তুক২০২১ৰ বিধান সভা নিৰ্বাচনৰ দিন ক্ৰমাৎ চমু চাপি অহাৰ লগে লগে ৰাজ্যখনৰ বিভিন্ন প্ৰান্তৰ লগতে মৰিগাঁও জিলাতো শাসক বিৰোধী ৰাজনৈতিক দলসমূহৰ মাজত ৰাজনৈতিক তৎপৰতা দেখা গৈছে।
জিলাখনৰ লাহৰীঘাটত আজি শাসকীয় বিজেপি দলৰ মৰিগাঁও জিলা সংখ্যালঘু মৰ্চাৰ প্ৰথমখন কাৰ্যনিৰ্বাহক সভা অনুষ্ঠিত হয়।
মৰিগাঁও জিলা সংখ্যালঘু মৰ্চাৰ সভাপতি ইব্ৰাহীম খলিলৰ সভাপতিত্বত লাহৰীঘাট উন্নয়ন খণ্ডৰ ৰাজহুৱা ভৱনত অনুষ্ঠিত কাৰ্যনিৰ্বাহক সভাখনত আগন্তুক ২০২১ৰ নিৰ্বাচনত সংখ্যালঘু লোকসকলৰ মাজত ৰণ কৌশল প্ৰস্তুত, সংখ্যালঘু ৰাইজৰ ভূমিকা, সংখ্যালঘু লোকসকলক কি দৰে বিজেপিমুখী কৰি তুলিব পাৰি তাকে ধৰি বহু কেইটা বিষয়ৰ ওপৰত ভাষণ দিয়ে বিজেপিৰ ৰাজ্যিক সংখ্যালঘু মৰ্চাৰ উপ সভাপতি খলিলুৰ ৰহমান, উপ সভাপতি তথা মৰিগাঁও জিলাৰ প্ৰভাৰী ৰাজীৱ আহমেদ, সাধাৰণ সম্পাদক গুলজাৰ হুছেইন, মৰিগাঁও জিলা বিজেপিৰ সভাপতি প্ৰবীণ মেধিকে ধৰি সংখ্যালঘু মৰ্চাৰ কেইবাগৰাকীও নেতাই।
উল্লেখযোগ্য যে আগন্তুক ২০২১ৰ বিধান সভাৰ নিৰ্বাচনত জিলাখনৰ লাহৰীঘাট সমষ্টিৰ পৰা বিজেপিৰ দলক বিপুল ভোট প্ৰদান কৰিবলৈও নেতাকেইগৰাকীয়ে সংখ্যালঘু লোকসকলক আহ্বান জনায়।
সভাখনত ৰাজ্যিক সংখ্যালঘু মৰ্চাৰ সাধাৰণ সম্পাদক মোস্তাক আহমেদ, মৰিগাঁও জিলাৰ সংখ্যালঘু ব’ৰ্ডৰ অধ্যক্ষ মহৰ আলী, বিজেপি নেতা তথা আগন্তুক ২০২১ৰ বিধান সভা নিৰ্বাচনৰ লাহৰীঘাটৰ সম্ভাব্য প্ৰাৰ্থী নুৰুল হুদা, জিলা সংখ্যালঘুৰ বিষয়ববীয়া ছাইফুল ইছলামকে ধৰি বহু কেইগৰাকী ৰাজ্যিক আৰু জিলা পৰ্যায়ৰ সংখ্যালঘু মৰ্চাৰ বিষয়ববীয়া উপস্থিত থাকে।
একেদৰে জিলাখনৰ বিভিন্ন আঞ্চলিকৰ সংখ্যালঘু মৰ্চাৰ সভাপতি, সম্পাদক, উপ সভাপতি আদি বিষয়ববীয়াসকলে সভাখনত অংশগ্ৰ কৰে।
