বোকাখাত নগৰত অলপতে হোৱা এক মটৰ চাইকেল চুৰি ঘটনাৰ অনুসন্ধানত চলোৱা অভিযানত বোকাখাত আৰক্ষীয়ে শুকুৰবাৰৰ নিশা বোকাখাতৰ পূব দ’ গাওঁৰ পৰা জোনটি আলী ওৰফে আকাশ হাজৰিকা নামৰ এটা দুৰ্ধৰ্ষ মটৰ চাইকেল চোৰক কৰায়ত্ত কৰে ৷
জোনটি আলীয়ে বিগত সময়ত গোলাঘাটৰ বিভিন্ন স্থানৰ পৰা ৩০০ ৰো অধিক মটৰ চাইকেল চুৰি কৰা বুলি আৰক্ষীৰ সুত্ৰত প্ৰকাশ ৷
জোনটি আলীৰ প্ৰকৃত ঘৰ গোলাঘাটৰ কছাৰীহাটত যদিও যোৱা দুবছৰে আকাশ হাজৰিকা ছদ্মনামেৰে বোকাখাতৰ পুৱ দ’ গাওঁত ঘৰ বনাই আত্মগোপন কৰি আছিল।
জোনটি আলীৰ নামত গোলাঘাট ভালেমান গোচৰ ৰজু হৈ থকাৰ বাবে ধৃত জোনটি আলীক নিশাই গোলাঘাট আৰক্ষীৰ হাতত অৰ্পণ কৰে বোকাখাতৰ আৰক্ষীয়ে ৷
অভিযানকাৰী আৰক্ষী দলে জোনটি আলীৰ বোকাখাতৰ বাসগৃহৰ পৰা এ এছ ০৫ বি ৩৮৩৬ নম্বৰৰ এখন মটৰ চাইকেলো জব্দ কৰে ৷
উল্লেখ্য যে যোৱা বৃহস্পতিবাৰৰ সন্ধিয়া বোকাখাত নগৰৰ প্ৰেৰণা চুইট নামৰ সদা ব্যস্ত বিপনীখনৰ সন্মুখৰ পৰা চোৰে চন্দন বিশ্বাস নামৰ যুৱক জনৰ এ এছ ০৫ এম / ৫২৮০ নম্বৰৰ পালচাৰ মটৰচাইকেল খন চুৰি কৰি নিছিল ৷
এই সম্পৰ্কত চলোৱা অনুসন্ধানতেই জোনটি আলীক আটক কৰিবলৈ সক্ষম হয় বোকাখাত আৰক্ষী ৷
