আলফা (স্বাঃ)ত যোগদান কৰিবলৈ বুলি ঘৰ এৰি গুচি যোৱা সন্তানক কাষত বিচাৰি হাহাকাৰ কৰিছে এগৰাকী মাতৃয়ে। প্ৰায় দুমাহ নিৰুদ্দেশ হৈ থকা জয়ন্ত ডেকা নামৰ এই কোমল বয়সীয়া যুৱকজনৰ মাকে দুচকু পানীৰে ওপচাই পৰেশ বৰুৱাক আহ্বান জনাইছে তেওঁৰ সৰু পুতেকক সোঁশৰীৰে ঘৰলৈ ঘূৰাই পঠিয়াবলৈ। কাৰণ জয়ন্তই আলফা (স্বাঃ)ত যোগদান কৰা বুলি ইতিমধ্যে সংবাদ মাধ্যমত প্ৰচাৰ হৈছিল।
“মোৰ সৰু বোপাইক বহুদিন দেখা নাই। ক’ত আছে সি? শুনিছোঁ সি হেনো আলফাত যোগদান কৰিছে। কিন্তু কোনেও ভালকৈ মোক ক’ব পৰা নাই। গতিকে আলফাৰ সেনাধ্যক্ষ পৰেশ বৰুৱাই স্পষ্ট কৰক। মোৰ সৰু বোপাইক সোঁশৰীৰে মোৰ বুকুৰ মাজলৈ ঘূৰাই পঠিয়াওক।” -কান্দি কান্দি এইদৰে আলফা (স্বাঃ)ৰ সেনাধ্যক্ষ পৰেশ বৰুৱাক আহ্বান জনালে হৰিশিঙা আমলাইগুৰিৰ নিৰুদ্দিষ্ট জয়ন্তৰ অসহায় মাক গীতা ডেকাই।
উল্লেখযোগ্য যে জিলাখনৰ তিনিজন যুৱক ক্ৰমে জয়ন্ত ডেকা, সুশান্ত নাথ আৰু ধনজিৎ ডেকা যোৱা প্ৰায় দুমাহ ধৰি নিৰুদ্দেশ হৈ আছিল। পিছত ওদালগুৰি আৰক্ষীয়ে হৰিশিঙা আৰক্ষীয়ে আটক কৰা আলফা (স্বাঃ)ৰ লিংকমেন বৰেংগাবাৰী গাঁৱৰ ক্ৰমে বলেন ডেকা(৩৫) আৰু ডিম্বেশ্বৰ ডেকা(৩২)ই জেৰাৰ সময়ত ওদালগুৰি জিলাৰ পৰা তিনিজন যুৱকে আলফা (স্বাঃ)ত যোগদান কৰা বুলি চাঞ্চল্যকৰ স্বীকাৰোক্তি দিছিল। ইয়াৰ ভিত্তিতে জয়ন্ত ডেকাহঁত আলফা (স্বাঃ)ত যোগদান কৰা বুলি আৰক্ষী নিশ্চিত হৈছিল।
আলফা (স্বাঃ)ত নিজৰ সন্তানে যোগদান কৰাৰ খবৰ সংবাদ মাধ্যমৰ জৰিয়তে খবৰ পোৱাৰ পিছতে পৰিয়ালকেইটাই দুশ্চিন্তাত দিন পাৰ কৰিছে। মাকে সংবাদ মাধ্যমক জানিবলৈ দিয়া মতে, হৰিশিঙা উচ্চতৰ মাধ্যমিক বিদ্যালয়ৰ উচ্চতৰ মাধ্যমিকত অধ্যয়ন কৰা জয়ন্তই উচ্চতৰ মাধ্যমিক উত্তীৰ্ণ নৌহওঁতেই অধ্যয়ন সমাপ্ত কৰিছিল। পৰৱৰ্তী সময়ত ঘৰতেই থাকি পিতৃক কৃষি কাৰ্যত সহায় কৰিছিল।