চৰকাৰে নিৰ্ধাৰণ কৰি দিয়া গাইডলাইন মানি এখন ৰাজ্যৰ চিনেমা হলবোৰে দৰ্শনী পুনৰ আৰম্ভ কৰিব পাৰিব।
উত্তৰ প্ৰদেশ চৰকাৰে লৈছে এই পদক্ষেপ। উত্তৰ প্ৰদেশ চৰকাৰে ঘোষণা কৰিছে ষ্টেণ্ডাৰ্ড অ’পাৰেটিং প্ৰচিডিউৰ(SOPs)ৰ গাইডলাইনসমূহ মানি ৰাজ্যখনৰ চিনেমা হলবোৰে অহা ১৫ অক্টোবৰৰ পৰা পুনৰ খুলিব পাৰিব।
যোগী চৰকাৰে ৫০% শতাংশ দৰ্শকেৰে চিনেমা হলবোৰ পুনৰ খুলিবলৈ সিদ্ধান্ত কৰিলেও হলবোৰে কিছুমান নিয়ম মানি চলিব লাগিব।
এই নিয়মসমূহ হৈছে—
আসন ব্যৱ্স্থাপনা আৰু টিকট বুকিং—
- থিয়েটাৰত প্ৰৱেশ কৰাৰ সময়ত উষ্ণতা স্ক্ৰীণিং আৰু চেনিটাইজড্ কৰাতো বাধ্যতামূলক কৰিব লাগিব।
- শাৰীৰিক দূৰত্ব ৰক্ষা হোৱাকৈ গোলাকাৰ চিহ্ন তৈয়াৰ কৰিব লাগিব।
- ক’ৰ’ণা ভাইৰাছৰ লক্ষণযুক্ত কোনো লোকক থিয়েটাৰত প্ৰৱেশ কৰিবলৈ দিব নোৱাৰিব।
- এখন স্ক্ৰীণ থকা চিনেমা হলত দুটা শ্ব’ৰ মাজত পৰ্যাপ্ত সময় ৰাখিব লাগিব কৰ্তৃপক্ষই।
- সৰ্বোচ্চ ৫০% শতাংশ দৰ্শকেৰেহে চিনেমা প্ৰদৰ্শন কৰিব পাৰিব।
- অনলাইন বা উইণ্ডু বুকিঙৰ সময়ত খালী থাকিব লগীয়া আসনসূমহ চিহ্নিত কৰিব লাগিব কৰ্তৃপক্ষই।
- থিয়েটাৰৰ ভিতৰত এনে আসনসমূহ ৰঙা চিনেৰে চিহ্নিত কৰিব লাগিব।
- কেৱল আগতীয়া আৰু অনলাইন বুকিঙৰ দ্বাৰাহে টিকট বিক্ৰী কৰিব পাৰিব।
- উইণ্ড’ টিকট কটাৰ সময়ত দৰ্শক আৰু টিকট কাউন্টাৰ কৰ্মচাৰীৰ হাতত স্পৰ্শ ঘটিব নোৱাৰিব।
- টিকট বুকিঙৰ সময়ত সংশ্লিষ্ট দৰ্শকজনে মোবাইল নম্বৰ দিয়াটো বাধ্যতামূলক হ’ব।
সাধাৰণ প্ৰট’কল—
- থিয়েটাৰৰ বাহিৰত আৰু ৱেটিং ৰুমত দৰ্শকসকলে অন্ততঃ ৬ ফুট দূৰত্ব বজাই ৰাখিব লাগিব।
- সকলো সময়তে দৰ্শকে মাস্ক পৰিধান কৰি থাকিব লাগিব। চাবোনেৰে হাত ধোৱা আৰু চেনিটাইজড্ কৰাটো অত্যন্ত প্ৰয়োজনীয় বুলি গণ্য কৰা হ’ব।
- দৰ্শকে কাঁহোতে টিচু পেপাৰ অথবা ৰুমাল ব্যৱহাৰ কৰাৰ লগতে মুখখন হাতেৰে ঢাকি ধৰিব লাগিব।
- ৰাজহুৱা স্থানত পিক পেলোৱাটো সম্পূৰ্ণৰূপে নিষিদ্ধ কৰা হৈছে।
- সকলোকে আৰোগ্য সেতু এপ ব্যৱহাৰ কৰিবলৈও পৰামৰ্শ দিয়া হৈছে।
