‘ক্ৰিকেটাৰসকল অথবা চাপোৰ্ট ষ্টাফ ঘৰলৈ যোৱাৰ পাছতহে মই মোৰ ঘৰলৈ যোৱাৰ ফ্লাইটত উঠিম’।
বক্তা আৰু কোনো নহয়, চেন্নাই ছুপাৰ কিংছৰ অধিনায়ক মহেন্দ্ৰ সিং ধোনীয়ে কৈছে এই কথা।
দলৰ প্ৰত্যেক সদস্যকে সেই কথা জনাই দিছে তেওঁ।
সকলো সদস্য ঘৰলৈ যোৱাৰ পাছতহে দিল্লীৰ পৰা ৰাঁচিৰ ঘৰলৈ উৰা মাৰিব তেওঁ।
এজন অধিনায়ক হিচাপে ধোনীৰ এই মহানুভৱতাক ক্ৰিকেট বিশ্বত উচ্চ প্ৰশংসিত হৈছে।
‘জৈৱ সুৰক্ষা বলয়’ৰ মাজতে আইপিএলত কেইবাজনো ক্ৰিকেটাৰ ক’ভিড-১৯ত আক্ৰান্ত হৈ পৰাৰ পাছতে টুৰ্ণামেণ্টখন স্থগিত ৰখা হৈছে।
বিচিচিআইয়ে দেশী-বিদেশী ক্ৰিকেটাৰসকলক সুস্থভাৱে ঘৰলৈ পঠোৱাৰ ব্যৱস্থা কৰিছে।
ইয়াৰ মাজতে চেন্নাই ছুপাৰ কিংছে এক বিশেষ চাৰ্টাৰ বিমানযোগে ক্ৰিকেটাৰসকলক ঘৰলৈ পঠোৱাৰ ব্যৱস্থা কৰিছে।
ইতিমধ্যে দিল্লীৰ পৰা দহটা ছিটবিশিষ্ট সেই বিমানযোগে ৰাজকোট-মুম্বাই-বাংগালুৰ আৰু চেন্নাইৰ ক্ৰিকেটাৰসকলক ঘৰলৈ লৈ গৈছে।
সুৰেশ ৰাইনা, ৰবীন্দ্ৰ জাডেজা, ময়িন আলী, ফাফ ডু প্লেছিচ, ডৱেইন ব্ৰেভো, আম্বাটি ৰায়াডুকে ধৰি দলটোৰ তাৰকাসকল ঘৰলৈ গুচি যোৱাৰ পাছতো ধোনী দিল্লীতে আছে।
কিন্তু কিয় আছে?
এই সম্পৰ্কত দলৰ এক কৰ্মীয়ে সংবাদমাধ্যমক জানিবলৈ দিয়া মতে, ঘৰলৈ যাবলৈ বাকী থাকি যোৱা দলটোৰ সহযোগীসকল ঘৰ যোৱাৰ পাছতহে ধোনীয়ে ৰাঁচীলৈ উৰা মাৰিব।
ইতিমধ্যে দলটোৰ প্ৰশিক্ষকৰ দায়িত্বত থকা মাইক হাছী আৰু লক্ষ্মীপতী বালাজী ক’ভিড প’জিটিভ হৈ দিল্লীতে আছে।
এক সূত্ৰই খবৰ দিয়ামতে, বৃহস্পতিবাৰে সন্ধ্যা ধোনী তেওঁ ঘৰলৈ যাব।
খেলপথাৰৰ ভিতৰে বাহিৰে এজন অধিনায়ক হিচাপে দলৰ সতীৰ্থসকলৰ প্ৰতি থকা এই মহানুভৱতাৰ বাবেই তেওঁ সফল অধিনায়ক বুলি বহুতে মতপ্ৰকাশ কৰিছে।
