দেশত অতি শীঘ্ৰেই আৰম্ভ কৰা হ’ব 5G ইন্টাৰনেট পৰিসেৱা। ভাৰতীয় ব্যক্তিগত খণ্ডৰ টেলিকম সেৱা প্ৰতিষ্ঠান ৰিলায়েন্স জিঅ’-এ ভাৰতত আৰম্ভ কৰিব এই সেৱা।
অৱশ্যে ভাৰতত এই সেৱা ৰিলায়েন্স জিঅ’-এ অকলে আৰম্ভ নকৰে। মাৰ্কিন প্ৰতিষ্ঠান কোৱালকমৰ হাতত ধৰি জিঅ’-এ ভাৰতত এই পৰিসেৱা আৰম্ভ কৰিবলৈ প্ৰস্তুতি চলাইছে।
কোৱালকমৰ সহায়ক সংস্থা ৰেডিচিছ ক’ৰ্পোৰেশ্যনৰ সহযোগত জিঅ’-এ ভাৰতত 5G সেৱা আৰম্ভ কৰিব। ইয়াৰ ফলত জিঅ’ ইন্টাৰনেট উপভোক্তাই অধিক দ্ৰুত গতিৰ ইন্টাৰনেট সেৱা লাভ কৰিবলৈ সক্ষম হ’ব বুলি জানিবলৈ দিছে জিঅ’-এ।
ইতিমধ্যে 5Gৰ পৰীক্ষামূলক সেৱা আৰম্ভ কৰি সফল হোৱা বুলিও দাবী কৰিছে প্ৰতিষ্ঠানটোৱে। 5Gৰ এই পৰীক্ষামূলক সেৱাত ইন্টাৰনেটৰ গতি ১০০০ Mbps ৰপৰা ১ Gbpsৰো অধিক হোৱা বুলিও জনাইছে টেলিকম প্ৰতিষ্ঠানটোৱে।
এই পৰীক্ষামূলক পৰিসেৱা কোৱালকম 5G ৰাণ প্লেটফৰ্মে জিঅ’ 5GNRৰ সহযোগত আৰম্ভ কৰিছে। প্ৰতিষ্ঠান দুটা আশাবাদী যে এই পৰীক্ষা সফল হ’ব আৰু শীঘ্ৰে সমগ্ৰ দেশতে ইয়াৰ পৰিসেৱা আৰম্ভ কৰিবলৈ সক্ষম হ’ব।
উল্লেখ্য যে, বৰ্তমান দেশত জিঅ’ৰ লগতে আটাইবোৰ টেলিকম সেৱাৰ প্ৰতিষ্ঠানে 4G লাইট সেৱা প্ৰদান কৰি আছে। কিন্তু জিঅ’-এ কোৱালকমৰ সহযোগত এইবাৰ দেশৰ ইন্টাৰনেট উপভোক্তাক 4Gৰ পৰিৱৰ্তে 5G সেৱা প্ৰদানৰ বাবে চেষ্টা অব্যাহত ৰাখিছে।
প্ৰতিষ্ঠানটোৱে জনোৱা মতে 5Gৰ সেৱাৰ লগতে অত্যন্ত কম মূল্যতে 5G এণ্ড্ৰয়েড স্মাৰ্টফোন ভাৰতীয় বজাৰত মুকলি কৰিব। অৱশ্যে এই সম্পৰ্কে প্ৰতিষ্ঠানটোৱে কোনো আনুষ্ঠানিক ঘোষণা কৰা নাই যদিও বজাৰলৈ 5G স্মাৰ্টফোন অহাটো প্ৰায় নিশ্চিত বুলিয়ে জানিব পৰা গৈছে।
প্ৰতিষ্ঠানটোৰ এক শীৰ্ষ বিষয়াৰ মতে ৫,০০০ টকাৰো কম মূল্যতে 5Gৰ স্মাৰ্টফোন গ্ৰাহকে লাভ কৰিবলৈ সক্ষম হ’ব।
