১৯৪১ চনত মুৰ্কংচেলেক ৰিগিবি গাঁৱত জন্ম গ্ৰহণ কৰা অসমৰ বৰেণ্য সাহিত্যিক তথা বিগত পাঁচটা দশক জুৰি অসমৰ শিক্ষা, সাহিত্য আৰু সমাজ জীৱনলৈ প্ৰভূত বৰঙণি আগবঢ়োৱা নাহেন্দ্ৰ পাদুনক তেওঁৰৰ জীৱন জোৰা সাধনাৰ বাবে প্ৰদান কৰা হয় আনন্দৰাম ঢেকিয়াল ফুকন বঁটা।
অসমৰ অন্যতম ভূমি পুত্ৰ মিছিং জনগোষ্ঠীৰ সমাজ আৰু সংস্কৃতিৰ বিষয়ত গৱেষণা তথা একেসময়তে মাদুৰাই বিশ্ববিদ্যালয়ৰ অধীনত ভাষা বিজ্ঞান চৰ্চালৈ অৰিহণা আগবঢ়োৱা এইগৰাকী সাহিত্যিকে কুৰিখনৰো অধিক মৌলিক গ্ৰন্থ আৰু অসংখ্য সম্পাদিত গ্ৰন্থৰে অসমীয়া সাহিত্য সংস্কৃতিক সমৃদ্ধ কৰাৰ লগতে মিচিং ঐনিতম অনুবাদেৰে অসমীয়া কবিতাৰ জগতক সমৃদ্ধ কৰিছে।
তেনে এগৰাকী সাহিত্যিকলৈ বৃহস্পতিবাৰে নগাঁৱৰ ঐতিহ্যমণ্ডিত আনন্দৰাম ঢেকিয়াল ফুকন মহাবিদ্যালয়ত এক গাম্ভীৰ্যপূৰ্ণ অনুষ্ঠানত আনন্দৰাম ঢেকিয়াল ফুকন বঁটা প্ৰদান কৰে অসমৰ ৰাজ্যপাল অধ্যাপক জগদীশ মুখীয়ে।
‘সাহিত্য তত্ব আৰু আলোচনা তত্ব’ গ্ৰন্থৰে অসমীয়া আলোচনা সাহিত্যত বিদেশী সাহিত্যৰ অধ্যয়ন সহজসাধ্য কৰি তোলা মিচিং আগাম কাবাঙৰ প্ৰাক্তন সভাপতি নাহেন্দ্ৰ পাদুনৰ অসুস্থতাৰ বাবে তেওঁৰ হৈ ৰাজ্যপালৰ হাতৰ পৰা বঁটা গ্ৰহণ কৰে সাহিত্যিকগৰাকীৰ পুত্ৰ অভিজিত পাদুনে।
ৰাজ্যপালগৰাকীয়ে বঁটা প্ৰদান কৰি দিয়া ভাষণত সাহিত্যিকগৰাকীক অভিনন্দন জনোৱাৰ লগতে মহাবিদ্যালয়খনৰ গৌৰৱোজ্জ্বল হীৰক জয়ন্তী বৰ্ষত এনে এটা অনুষ্ঠানত উপস্থিত থাকিবলৈ পাই সুখ অনুভৱ কৰিছে বুলি ব্যক্ত কৰে।
ছাত্র-ছাত্ৰীসকলৰ উদ্দেশ্য দিয়া ভাষণত ৰাজ্যপালগৰাকীয়ে কয়, ‘’আপোনালোকলোক হৈছে ৰাষ্ট্ৰৰ ভৱিষ্যৎ। ৰাষ্ট্ৰখনক আগুৱাই নিয়াৰ দায়িত্ব ছাত্র-ছাত্ৰীসকলৰ। মই ভাবো ছাত্র-ছাত্ৰীসকলৰ কৌশল বৃদ্ধি পাঠ্যক্ৰমৰ ওপৰত মহাবিদ্যালয়সমূহে গুৰুত্ব দিয়া উচিত। উন্নত প্ৰযুক্তি বিদ্যাৰ অবিহনে আমি কেতিয়াও ৰাষ্ট্ৰক আগুৱাই নিব নোৱাৰিম। আনন্দৰাম ঢেকিয়াল ফুকন মহাবিদ্যালয়ে এই ক্ষেত্ৰত গুৰুত্বপূৰ্ণ ভূমিকা পালন কৰিব পাৰিব বুলি মই আশাবাদী।‘’
মহাবিদ্যালয়খনৰ অধ্যক্ষ সুৰজিৎ ভাগৱতীয়ে আদৰণি ভাষণ প্ৰদান অনুষ্ঠানটোত মহাবিদ্যালয়ৰ প্ৰাক্তন অধ্যক্ষ তথা মহাবিদ্যালয় পৰিচালনা সমিতিৰ সভাপতি সহজানন্দ ওজা সন্মানীয় অতিথিৰূপে উপস্থিত থকাৰ লগতে মহাবিদ্যালয়খনৰ অধ্যাপক-অধ্যাপিকা, ছাত্ৰ-ছাত্ৰীসকল উপস্থিত থাকে।