এইটোৰ পিছত সিটোকৈ বিপদৰ সন্মুখীন হৈছে ৰিপাব্লিক টিভিৰ মুখ্য সম্পাদক অৰ্ণৱ গোস্বামী।
দেশত সাম্প্ৰদায়িক বিষবাষ্প বিয়পোৱাৰ চেষ্টা কৰা বুলি সততে বিতৰ্কিত সাংবাদিকগৰাকীৰ বিৰুদ্ধে অভিযোগ উত্থাপন হৈ থকাৰ সময়তে মুম্বাই আৰক্ষীয়ে আত্মহত্যাৰ বাবে প্ৰৰোচনা কৰাৰ গোচৰত গ্ৰেপ্তাৰ কৰিছিল অৰ্ণৱ গোস্বামীক।
সেই গোচৰত উচ্চতম ন্যায়ালয়ৰ হস্তক্ষেপত জামিন লাভ কৰাৰ পিছতে সাংবাদিকগৰাকীৰ সংবাদ প্ৰতিষ্ঠানটোৰ বিৰুদ্ধে উত্থাপন হ’ল টিআৰপি কেলংকাৰি সংঘটিত কৰি অহাৰ গুৰুতৰ অভিযোগ। ইতিমধ্যে টিআৰপি কেলেংকাৰিৰ গোচৰ সাংবাদিকগৰাকীৰ সহযোগীক আৰক্ষীয়ে গ্ৰেপ্তাৰ কৰিছে।
ইফালে তেনে সময়তে সাংবাদিক অৰ্ণৱ গোস্বামীৰ আৰু টিআৰপি কেলংকাৰিৰ মূল অভিযুক্ত কাৰাৰুদ্ধ BARCৰ চিইঅ’ পাৰ্থ দাসগুপ্তৰ সৈতে হোৱা হোৱাটছএপ মেচেজৰ স্ক্ৰীণশ্বট মুম্বাই আৰক্ষীয়ে ভাইৰেল কৰিছে। ইয়াৰ পিছতে সাংবাদিকগৰাকীৰ সামাজিক ভাৱমূৰ্তি যথেষ্ট ম্লান পৰা বুলি সমগ্ৰ দেশজুৰি চৰ্চা হৈছে।
ঠিক তেনে সময়তে বিতৰ্কিত সাংবাদিকগৰাকীৰ বিৰুদ্ধে মানহানিৰ গোচৰ ৰুজু কৰিছে মুম্বাই আৰক্ষীৰ এগৰাকী শীৰ্ষ বিষয়াই।
মুম্বাই আৰক্ষীৰ উপ আয়ুক্ত অভিষেক ত্ৰিমুখে বিতৰ্কিত সাংবাদিকগৰাকীৰ লগতে তেওঁৰ পত্নী সাম্যব্ৰত ৰায় গোস্বামী, ৰিপাব্লিক টিভিৰ কৰ্ণধাৰ তথা আউটলায়াৰ মিডিয়া প্ৰাইভেট লিমিটেডৰ বিৰুদ্ধেও মানহানি গোচৰ ৰুজু কৰিছে।
ৰাষ্ট্ৰীয় সংবাদ মাধ্যমৰ বাতৰি অনুসৰি সুশান্ত সিং ৰাজপুতৰ আত্মহত্যাৰ সন্দৰ্ভত মুম্বাই আৰক্ষীৰ ডিএছপিৰ বিৰুদ্ধে বিতৰ্কিত মন্তব্য কৰাৰ অভিযোগ উত্থাপন কৰা হৈছে। জানিব পৰা মতে চৰকাৰী আইনজীৱীৰ দ্বাৰা মানহানিৰ অভিযোগ দাখিল কৰাৰ পূৰ্বে মহাৰাষ্ট্ৰ চৰকাৰৰ গৃহ মন্ত্ৰণালয়ৰ পৰা ইয়াৰ মঞ্জুৰি লোৱা হৈছে।
ইয়াৰ পিছতে সংবিধানৰ ৪৯৯, ৫০০ আৰু ৫০১ ধাৰাত পত্নীসহ সাংবাদিক অৰ্ণৱ গোস্বামী বিৰুদ্ধে এই গোচৰ ৰুজু কৰা হৈছে বুলি জানিব পৰা গৈছে।