গৃহযুদ্ধত বিধ্বস্ত ম্যানমাৰত সামৰিক বাহিনীৰ নিষ্ঠুৰতাৰ এক ভয়ংকৰ তথ্য পোহৰলৈ আনিছে ৰাষ্ট্ৰসংঘৰ এখন প্ৰতিবেদনে। এই প্ৰতিবেদনত দাবী কৰা হৈছে যে যোৱা বছৰৰ আগষ্ট মাহত নিৰ্বাচনৰ দিন ঘোষণা কৰাৰ পৰা চলিত বৰ্ষৰ জানুৱাৰী মাহত ফলাফল ঘোষণা কৰালৈকে মাত্ৰ ছমাহৰ ভিতৰত দেশখনৰ সেনাই কমেও ৭০২ জন সাধাৰণ নাগৰিকক নিৰ্মমভাৱে হত্যা কৰিছে।
নিহতসকলৰ ভিতৰত ২২৪ গৰাকী মহিলা আৰু ১৫৩ টি নিষ্পাপ শিশুও আছে বুলি প্ৰতিবেদনখনত জনোৱা হৈছে। ৰাষ্ট্ৰসংঘৰ মানৱ অধিকাৰ আয়োগৰ অনুসন্ধানকাৰী দলে বিভিন্ন সূত্ৰ পৰীক্ষা কৰি নিহতসকলৰ পৰিচয় নিশ্চিত কৰিছে। সাধাৰণ নিৰ্বাচনত প্ৰাক্তন সেনা বিষয়া তথা বৰ্তমানৰ ৰাষ্ট্ৰপতি মিন আং হ্লাইঙৰ দলে জয়লাভ কৰাৰ পিছতো দেশখনৰ পৰিস্থিতিৰ কোনো উন্নতি হোৱা নাই বুলি প্ৰতিবেদনখনত প্ৰকাশ পাইছে।
সাধাৰণ নিৰ্বাচনৰ পিছত যোৱা ১০ এপ্ৰিলত ম্যানমাৰত নতুন চৰকাৰে শপত গ্ৰহণ কৰিছিল। কিন্তু এসপ্তাহৰ ভিতৰতে ভাৰতৰ চুবুৰীয়া দেশখনত পুনৰ অশান্তিৰ সৃষ্টি হয়। ৰাখাইন প্ৰদেশত সক্ৰিয় আৰাকান আৰ্মী, চিন প্ৰদেশত সক্ৰিয় তেওঁলোকৰ সহযোগী চিন ব্ৰাথাৰহুডৰ অংশীদাৰ য়াও ডিফেঞ্চ ফ’ৰ্চ, ছাগাইং অঞ্চলৰ য়াও আৰ্মী আৰু ম’নিৱা পিপলছ ডিফেঞ্চ ফ’ৰ্চে সেনাই চলোৱা শাসনৰ বিৰুদ্ধে পুনৰ যুঁজ চলাই যোৱাৰ কথা ঘোষণা কৰে। ইয়াৰ পিছতে যোৱা দুমাহত এই অঞ্চলসমূহত সাধাৰণ জনবসতিক লক্ষ্য কৰি সেনাই কেইবাবাৰো বিমান আক্ৰমণ চলোৱা বুলি অভিযোগ উঠিছে। আনহাতে, ৰাষ্ট্ৰসংঘৰ শৰণাৰ্থী বিষয়ক সংস্থাৰ দুমাহ আগৰ এখন প্ৰতিবেদনত কোৱা হৈছিল যে যুদ্ধবিধ্বস্ত অঞ্চলৰ পৰা নাৱেৰে পলায়ন কৰিবলৈ চেষ্টা কৰাৰ সময়ত বংগোপসাগৰত ডুব গৈ প্ৰায় নশ ৰোহিংগীয়া শৰণাৰ্থীৰ মৃত্যু হৈছে বা সন্ধানহীন হৈছে।
