ডিচেম্বৰ মাহত অনুষ্ঠিত হ’বলগীয়া ৰাষ্ট্ৰীয় নিৰ্বাচনৰ পূৰ্বে বৃহস্পতিবাৰে ম্যানমাৰৰ সেনাই আনুষ্ঠানিকভাৱে অসামৰিক অন্তৱৰ্তীকালীন চৰকাৰক ক্ষমতা অৰ্পণ কৰে। কিন্তু জুন্টা নেতা মিন আং হ্লাইঙে অন্যান্য দায়িত্বৰ লগতে ভাৰপ্ৰাপ্ত ৰাষ্ট্ৰপতি হিচাপেও কাৰ্যনিৰ্বাহ কৰি থাকিব।
২০২১ চনৰ অভ্যুত্থানৰ পিছত সামৰিক বাহিনীক ক্ষমতা প্ৰদান কৰা ডিক্রী বাতিল কৰা হৈছে বুলি ৰাষ্ট্ৰীয় সংবাদ মাধ্যমে প্ৰকাশ কৰা এক ঘোষণাত কোৱা হৈছে। ইয়াৰ লগতে এক তত্বাৱধায়ক প্ৰশাসন গঠন কৰা হৈছে আৰু আগন্তুক নিৰ্বাচনৰ তদাৰক কৰিবলৈ বিশেষ আয়োগো গঠন কৰা হৈছে।
ম্যানমাৰৰ জুন্টাৰ এই পদক্ষেপে দেশখনৰ ক্ষমতাৰ গাঁথনিৰ কোনো পৰিৱৰ্তনৰ ইংগিত নিদিয়ে, কিয়নো অভ্যুত্থান নেতা মিন আং হিলাইঙে এতিয়াও ভাৰপ্ৰাপ্ত ৰাষ্ট্ৰপতিকে ধৰি সকলো মূল ক্ষমতা অক্ষুণ্ণ ৰাখিছে। তেওঁ সামৰিক বাহিনীৰ মুৰব্বী পদটোও অক্ষুণ্ণ ৰাখিছে।
চৰকাৰৰ মুখপাত্ৰ জাউ মিন টুনে কয় যে অভ্যুত্থানৰ পিছত দেশজুৰি জাৰি কৰা জৰুৰীকালীন অৱস্থা কালি প্ৰত্যাহাৰ কৰা হৈছে। জৰুৰী অৱস্থা জাৰি কৰাৰ পিছৰ পৰা ইয়াক সাতবাৰ নবীকৰণ কৰা হৈছে। ৰাষ্ট্ৰীয় সংবাদ মাধ্যমৰ আগত মুখপাত্ৰগৰাকীয়ে কয় যে অন্তৱৰ্তীকালীন ৰাষ্ট্ৰপতি আৰু সেনা প্ৰধানে কৈছে যে অহা ছমাহক প্ৰস্তুতি আৰু নিৰ্বাচন অনুষ্ঠিত কৰাৰ সময় বুলি গণ্য কৰা হ’ব।
২০২১ চনত নিৰ্বাচিত নেতা আং ছান ছু কিক উৎখাত কৰাৰ পিছৰে পৰা বিশৃংখলতাৰ মাজেৰে পাৰ হৈছে ম্যানমাৰ। তেতিয়াৰ পৰাই দক্ষিণ-পূব এছিয়াৰ এই দেশখনত গৃহযুদ্ধৰ সৃষ্টি হৈছে। বিদ্ৰোহ দমন কৰাৰ সমান্তৰালকৈ সেনাই মানৱ অধিকাৰৰ ব্যাপক উলংঘা কৰাৰ অভিযোগ উত্থাপন হৈছে। কিন্তু এই অভিযোগবোৰ অস্বীকাৰ কৰিছে জুন্টাই।
ম্যানমাৰৰ আগন্তুক নিৰ্বাচনক প্ৰহসন বুলি পশ্চিমীয়া চৰকাৰবোৰে উলাই কৰিছে। তেওঁলোকৰ মতে, এই নিৰ্বাচন জেনেৰেলসকলৰ ক্ষমতা সুদৃঢ় কৰাৰ উপায়ৰ বাহিৰে আন একো নহয়। নিৰ্বাচনত সামৰিক সমৰ্থিত দলৰ আধিপত্যৰ সম্ভাৱনা আছে। কাৰণ বিৰোধী দলসমূহক হয়তো নিৰ্বাচন কৰাত বাধা দিয়া হৈছে, নাইবা তেওঁলোকে ভোট বৰ্জনৰ সিদ্ধান্ত লৈছে।
ম্যানমাৰ বিষয়ক স্বতন্ত্ৰ বিশ্লেষক ডেভিদ মেথেছনে কয় যে ক্ষমতাৰ যি পৰিৱৰ্তন কৰা হৈছে সেয়া লোকক দেখুৱাবলৈহে কৰা। ক্ষমতাত থকাসকলে আগৰ দৰেই অত্যাচাৰী আৰু দমনমূলক আচৰণ কৰি যাব।
