বিশ্ব সম্প্ৰদায়ৰ হেঁচাৰ পিছতো ম্যানমাৰত মুঠেও ক্ষান্ত হোৱা নাই সামৰিক প্ৰশাসন। এতিয়া দেশ খনত জুণ্টাই সামৰিক আইনৰ অপপ্ৰয়োগ কৰি নিৰীহ লোকক মৃত্যুদণ্ড বিহিবলৈ আৰম্ভ কৰিছে।
যোৱা ২৭ মাৰ্চতে জুণ্টাই ম্যানমাৰৰ উত্তৰ ওকাল্লাপাত বলৱৎ কৰিছিল সেনা বাহিনীৰ মাৰ্শ্বাল আইন।
উক্ত আইনৰ অধীনতে এজন সেনাক হত্যা কৰাৰ অভিযোগত আজি জুণ্টাই ১৯ জন প্ৰতিবাদকাৰীৰ বিৰুদ্ধে মৃত্যুৰ পৰোৱানা জাৰি কৰে। উল্লেখ্য কিছুদিন পূৰ্বে
৬০ গৰাকী লোকৰ বিৰুদ্ধে ম্যানমাৰৰ সামৰিক শাসকে ‘ৱাণ্টেড’ ঘোষণা কৰি বাতৰি কাকতত বিজ্ঞাপন প্ৰকাশ কৰিছিল।
ম্যানমাৰৰ চৰকাৰী সংবাদপত্ৰ Global New Light ত সামৰিক শাসকে ৬০ গৰাকী ব্যক্তিৰ নাম তেওঁলোকৰ ছবি সহ প্ৰকাশ কৰিছিল।
উক্ত লোকসকলে ম্যানমাৰৰ সাধাৰণ জনতাক সেনাৰ বিৰুদ্ধে উচটনি দিয়াৰ অভিযোগ অনা হৈছে।
সেয়ে ম্যানমাৰৰ আইনৰ ৫০৫ ক ধাৰাত তেওঁলোকক দোষী সাৱস্ত্য কৰি বিজ্ঞাপন প্ৰকাশ কৰা হৈছে।
ধৰা পৰিলে বিজ্ঞাপনত নাম প্ৰকাশ পোৱা লোকসকলে কমেও তিনি বছৰৰ কাৰাবাস খাটিব লাগিব।
সেনাই প্ৰকাশ কৰা বিজ্ঞাপনত নাম থকা ম্যানমাৰৰ অভিনেত্ৰী য়াট নো য়ায়ে প্ৰতিক্ৰিয়া ব্যক্ত কৰি কৈছিল যে সেনাৰ এনে কাৰ্যত তেওঁ মুঠেও ভয় খোৱা নাই।
দেশৰ বাবে তেওঁ মাত মাতি যাব বুলিও অভিনেত্ৰীগৰাকীয়ে স্পষ্ট কৰি দিছে। উল্লেখ্য এতিয়ালৈকে সেনাই ম্যানমাৰত ৫৭০ গৰাকীৰো অধিক প্ৰতিবাদকাৰীক হত্যা কৰিছে।
উল্লেখযোগ্য যে ম্যানমাৰৰ সুৰক্ষা বাহিনীয়ে যোৱা সপ্তাহত দেশখনৰ ১৮জনকৈ চেলিব্ৰেটীক আটক কৰাৰ জাননী প্ৰেৰণ কৰিছে।
আটাইকেইজন চেলিব্ৰেটিয়ে সামৰিক অভ্যুত্থানৰ প্ৰতিবাদ কৰিছিল।
ম্যানমাৰৰ সুন্দৰীৰ খিতাপ লাভ কৰা হান লায়য়েও জুণ্টাৰ বিৰুদ্ধে মাত মাতি আহিছে।
