দিল্লীৰ গ্ৰীণ পাৰ্ক অঞ্চলৰ নিজা বাসগৃহত অমন কুমাৰ শৰ্মা নামৰ এজন ৩০ বছৰীয়া ন্যায়াধীশৰ মৃতদেহ উদ্ধাৰ হোৱাক লৈ তীব্ৰ চাঞ্চল্যৰ সৃষ্টি হৈছে। আৰক্ষীৰ প্ৰাথমিক তদন্তত এয়া এক আত্মহত্যাৰ ঘটনা বুলি সন্দেহ কৰা হৈছে। মৃত অমন কুমাৰ শৰ্মাই উত্তৰ-পূব দিল্লীৰ জিলা আইন সেৱা প্ৰাধিকৰণৰ সম্পাদক হিচাপে কাৰ্কাৰডুমা আদালতত কৰ্মৰত আছিল। তেওঁৰ ভাতৃ শিৱমে ছফদাৰজং এনক্লেভ থানাত খবৰ দিয়াৰ পিছতে আৰক্ষীৰ এটা দল উপস্থিত হৈ বাথৰুমৰ পৰা তেওঁক উদ্ধাৰ কৰে। চিকিৎসালয়লৈ লৈ যোৱাৰ পিছত চিকিৎসকে তেওঁক মৃত বুলি ঘোষণা কৰে।
প্ৰাথমিক তথ্য অনুসৰি ফাঁচীৰ ফলতে তেওঁৰ মৃত্যু হৈছে। আৰক্ষীয়ে বৰ্তমান সকলো দিশৰ পৰা তদন্ত চলাই আছে যদিও এতিয়ালৈকে কোনো ফাউল প্লে বা সন্দেহজনক কথা পোহৰলৈ অহা নাই। ইপিনে, মৃত ন্যায়াধীশগৰাকীৰ পৰিয়ালে এই ঘটনাৰ আঁৰত তেওঁৰ পত্নী থকা বুলি গুৰুতৰ অভিযোগ উত্থাপন কৰিছে। পৰিয়ালৰ মতে, বিগত প্ৰায় দুমাহ ধৰি অমন আৰু তেওঁৰ পত্নীৰ মাজত বিভিন্ন সমস্যাক লৈ বিবাদ চলি আছিল। তেওঁৰ পত্নীও একেদৰে এগৰাকী ন্যায়িক বিষয়া।
অমনৰ পিতৃয়ে জানিবলৈ দিয়া মতে, মৃত্যুৰ আগদিনা নিশা প্ৰায় ১০ বজাত অমনে তেওঁলৈ ফোন কৰিছিল। ফোনত অমনে বৰ আৱেগিক হৈ কৈছিল যে তেওঁ মানসিকভাৱে ভাগি পৰিছে আৰু তেওঁৰ বাবে জীয়াই থকাটো কঠিন হৈ পৰিছে। এই কথা শুনাৰ পিছতে পিতৃয়ে আলৱাৰৰ পৰা ততাতৈয়াকৈ দিল্লীলৈ ৰাওনা হয় আৰু মাজনিশা ঘৰ পায়হি। পিতৃৰ অভিযোগ অনুসৰি, ঘৰখনত পত্নী নিধি মালিকৰ সম্পূৰ্ণ নিয়ন্ত্ৰণ আছিল আৰু অমনে প্ৰায়ে মানসিক নিৰ্যাতনৰ বলি হ’বলগীয়া হৈছিল। আনকি পত্নীৰ পিতৃ-মাতৃৰ সৈতে যোগাযোগ কৰিবলৈ চেষ্টা কৰোতেও তেওঁলোকে ফোন নম্বৰ ব্লক কৰি থৈছিল বুলি অভিযোগ কৰা হৈছে। এই সমস্যা সমাধানৰ বাবে এজন আত্মীয়ক মতা হৈছিল যদিও পিছত তেওঁ এই ক্ষেত্ৰত হস্তক্ষেপ কৰিব নোৱাৰিম বুলি আঁতৰি যায়।
নিশা ঘৰৰ ভিতৰত স্বামী আৰু পত্নীৰ মাজত তীব্ৰ হুলস্থুল আৰু কাজিয়া হৈছিল বুলিও পিতৃয়ে প্ৰকাশ কৰিছে। আত্মীয়ৰ ভাষ্য অনুসৰি, পত্নীয়ে ডাঙৰ ডাঙৰকৈ কথা কৈ থকাৰ সময়ত অমনে নিৰৱে কান্দি আছিল। পিছত যেতিয়া অমনক ঘৰৰ কতো বিচাৰি পোৱা নগ’ল, তেতিয়া তেওঁৰ ম’বাইললৈ ফোন কৰা হয় আৰু ফোনটো বাথৰুমৰ ভিতৰত বাজি উঠা শুনা যায়। লগে লগে বাথৰুমৰ দুৱাৰ আৰু খিৰিকীৰ আইনা ভাঙি ভিতৰত প্ৰৱেশ কৰাত তেওঁক মৃত অৱস্থাত উদ্ধাৰ কৰা হয়।
উল্লেখ্য যে, ২০১৮ চনত পুনেৰ চিম্বায়’ছিছ ল স্কুলৰ পৰা আইনৰ ডিগ্ৰী লাভ কৰা অমনে ২০২১ চনৰ ১৯ জুনত দিল্লী ন্যায়িক সেৱাত যোগদান কৰিছিল। নিজৰ কৰ্মজীৱনত তেওঁ দেৱানী আৰু অপৰাধমূলক দুয়োবিধ গোচৰ সুচাৰুৰূপে পৰিচালনা কৰিছিল। বৰ্তমান মৃতদেহটো মৰণোত্তৰ পৰীক্ষাৰ বাবে প্ৰেৰণ কৰা হৈছে আৰু আৰক্ষীয়ে পৰিয়ালৰ লোক তথা আত্মীয়ৰ ভাষ্য গ্ৰহণ কৰি এই কৰুণ ঘটনাৰ আঁৰৰ প্ৰকৃত কাৰণ পোহৰলৈ আনিবলৈ তদন্ত অব্যাহত ৰাখিছে।
