কৰ’নাৰ সংহাৰৰ মাজতে দেশত আন এক ৰহস্যজনক ৰোগক লৈ এইবাৰ বিয়পিছে আতংক। দেওবাৰে অন্ধ্ৰপ্ৰেদশত এই অচিন ৰোগত আক্ৰান্ত হৈ পৰিছে বহু লোক।
যোৱা নিশা ৭৬জন লোক এই ৰোগত আক্ৰান্ত হৈছে। এই অচিন ৰোগত মহিলা আৰু শিশুকে ধৰি এতিয়ালৈকে মুঠ ৩৫০জন লোক আক্ৰান্ত হৈছে।
ইয়াৰ ভিতৰত ১৮৬জন লোক সুস্থ হৈ উঠিছে আৰু চিকিৎসাধীন অৱস্থাত এজন লোকৰ মৃত্যু হৈছে।
এই অচিন ৰোগৰ প্ৰাদুৰ্ভাৱ বৃদ্ধি পোৱাৰ বাবে স্থানীয় প্ৰশাসনে এলুৰুত সকলো শিক্ষানুষ্ঠান বন্ধ ঘোষণা কৰিছে।
হায়দৰাবাদৰ নেশ্যনেল টেকন’লজি নিউট্ৰিশ্যন ইনষ্টিটিউটৰ বিজ্ঞানীৰ এটা দল আৰু মংগলগিৰি এইমছৰ চিকিৎসকৰ এটা দলক পানীৰ নমুনা সংগ্ৰহ কৰিবলৈ এলুৰুলৈ পঠিওৱা হৈছে।
ৰাজ্যখনৰ মুখ্যমন্ত্ৰী ৱাই এছ জগন মোহন ৰেড্ডীয়ে সোমবাৰে এলুৰু ভ্ৰমণ কৰে। সেইদৰে তেওঁ হাস্পাতলত গৈ আক্ৰান্ত লোকসকলৰ সৈতেও দেখা কৰে।
ভ্ৰমণৰ সময়ত মুখ্যমন্ত্ৰীগৰাকীয়ে চিকিৎসকসকলৰ সৈতেও কথা পাতিব। লগতে এই ৰোগ কিদৰে সংক্ৰমিত হৈছে, ক’ৰ পৰা আহিছে আদি কাৰণ অনুসন্ধানৰ বাবে সংশ্লিষ্ট বিষয়ববীয়াসকলৰ সৈতে তেওঁ কথাও পাতিব।