যুদ্ধবিৰতিক লৈ চলি থকা তৰ্ক-বিতৰ্কৰ মাজতেই গাজা ভূখণ্ডত পুনৰ ভয়ংকৰ আক্ৰমণ চলাইছে ইজৰাইলী বাহিনীয়ে। শনিবাৰে গাজাৰ চাৰিটা পৃথক স্থানত চলোৱা বিমান আক্ৰমণ আৰু গুলীচালনাৰ ফলত কমেও ৯ জন লোক নিহত হৈছে। নিহতসকলৰ ভিতৰত মহিলা, এটা শিশু আৰু এগৰাকী সাংবাদিকো অন্তৰ্ভুক্ত আছে। ২০২৩ চনৰ অক্টোবৰ মাহৰ পৰা আৰম্ভ হোৱা ইজৰাইল আৰু হামাছৰ এই ৰক্তক্ষয়ী সংঘৰ্ষৰ মাজত কেইবাবাৰো যুদ্ধবিৰতিৰ প্ৰয়াস কৰা হৈছে যদিও সেয়া স্থায়ী হোৱা নাই। দুয়োপক্ষই এতিয়া যুদ্ধবিৰতি উলংঘনৰ বাবে ইটোৱে সিটোৰ ওপৰত দোষ জাপি দিছে।
গাজাৰ হামাছ নিয়ন্ত্ৰিত স্বাস্থ্য কৰ্তৃপক্ষই জানিবলৈ দিয়া অনুসৰি, শনিবাৰে গাজা চহৰৰ চাব্ৰা অঞ্চলৰ এটা আৱাসিক ভৱনত ইজৰাইলী বোমাৰু বিমানেৰে আক্ৰমণ চলোৱা হয়, যাৰ ফলত ভৱনটো সম্পূৰ্ণৰূপে ধ্বংসপ্ৰাপ্ত হয়। এই আক্ৰমণত দুগৰাকী মহিলা আৰু এটা শিশুসহ মুঠ চাৰিজন লোক নিহত হোৱাৰ লগতে কেইবাজনো লোক আহত হয়। আনহাতে, উত্তৰ গাজাৰ বেইট লাহিয়া চহৰত ইজৰাইলী প্ৰতিৰক্ষা বাহিনীৰ (আই ডি এফ) গুলীত এগৰাকী মহিলা নিহত হোৱাৰ অভিযোগ উত্থাপন হৈছে। ইয়াৰ উপৰি, দক্ষিণ গাজাৰ খান ইউনিছ চহৰতো ইজৰাইলী বিমান আক্ৰমণত এজন লোক নিহত আৰু আঠজন আহত হয়।
আক্ৰমণৰ পৰা সাৰি যোৱা নাই শৰণাৰ্থী শিবিৰো। শনিবাৰে মধ্য গাজাৰ বুৰেইজ শৰণাৰ্থী শিবিৰৰ এটা বাসগৃহত চলোৱা বিমান আক্ৰমণত এগৰাকী সংবাদকৰ্মীসহ তিনিজন লোক নিহত হয়। নিহত সাংবাদিকগৰাকী ‘আল জাজীৰা‘ৰ চিত্ৰ-সাংবাদিক আহমেদ উইশ্বা বুলি চিনাক্ত কৰা হৈছে। এই ঘটনাক লৈ ইজৰাইলী বাহিনীয়ে এক বিবৃতিত দাবী কৰিছে যে উইশ্বা প্ৰকৃততে হামাছৰ এজন ‘স্নাইপাৰ‘ আছিল আৰু তেওঁ চিত্ৰ-সাংবাদিকৰ আঁৰ লৈ কাম কৰি আছিল। অৱশ্যে, সাংবাদিকগৰাকীৰ বিৰুদ্ধে উত্থাপন কৰা এই গুৰুতৰ অভিযোগৰ সপক্ষে আই ডি এফে কোনো ধৰণৰ প্ৰমাণ বৰ্তমানলৈকে ৰাজহুৱা কৰা নাই।
ৰয়টাৰ্ছৰ এক প্ৰতিবেদন অনুসৰি, যোৱা বছৰৰ অক্টোবৰৰ পৰা গাজাত আৰম্ভ হোৱা এই যুদ্ধত এতিয়ালৈকে প্ৰায় ৩০০ পেলেষ্টাইনী সাংবাদিক নিহত হৈছে। যুদ্ধৰ এই বিভীষিকাই সাধাৰণ নাগৰিক আৰু সংবাদকৰ্মীসকলৰ নিৰাপত্তাক লৈ সমগ্ৰ বিশ্বতে গভীৰ উদ্বেগৰ সৃষ্টি কৰিছে। আন্তঃৰাষ্ট্ৰীয় পৰ্যায়ত শান্তি স্থাপনৰ অহৰহ প্ৰচেষ্টা চলি থকাৰ মাজতো এনে ধাৰাবাহিক আক্ৰমণে পৰিস্থিতি অধিক জটিল কৰি তুলিছে।
