অৱশেষত নগাঁৱৰ সবিতা দাস নামৰ এগৰাকী জ্যেষ্ঠ আৰক্ষী বিষয়াৰ বিৰুদ্ধে উত্থাপিত হোৱা ধন দাবীৰ অভিযোগৰ ভিত্তিত অসম আৰক্ষীৰ শীৰ্ষ মহলে আজি জ্যেষ্ঠ আৰক্ষী বিষয়া গৰাকীক চাকৰিৰ পৰা নিলম্বন কৰে।
উল্লেখ্য যে নগাঁৱৰ এইগৰাকী উপ আৰক্ষী অধীক্ষক(সদৰ) সবিতা দাসে যোৱা ৩১ আগষ্টৰ নিশা নগাঁও চহৰৰ পলিৰোডৰ নিজ ঘৰৰ সন্মুখৰ পৰা সৌৰভ হাজৰিকা নামৰ যুৱকজনৰ লগতে আন তিনিজন যুৱকক বিনা কাৰণত আটক কৰি সদৰ থানালৈ লৈ আনিছিল।
উপ আৰক্ষী অধীক্ষকগৰাকীয়ে ঘটনা সন্দৰ্ভত সৌৰভ হাজৰিকাৰ লগতে যুৱককেইজনক পিচদিনা বিয়লি চাৰি বজা পৰ্যন্ত আবদ্ধ কৰি ৰাখে বুলি সৌৰভ হাজৰিকাই অভিযোগ উত্থাপন কৰে। কিন্তু হাজৰিকাৰ নিজা চালকৰ অনুজ্ঞাপত্ৰ আৰু গাড়ীৰ পঞ্জীয়ন পত্ৰ জব্দ কৰি ৰাখে।
ইফালে নগাঁও আৰক্ষী বিভাগৰ জ্যোতি খাউণ্ড নামৰ এজন কৰ্মচাৰীয়ে অনুজ্ঞাপত্ৰ আৰু পঞ্জীয়ন পত্ৰ দুখন ওভতাই দিয়াৰ বিনিময়ত উপ আৰক্ষী অধীক্ষকগৰাকীৰ দোহাই দি ৪০ হাজাৰ টকা দাবী কৰে।
কিন্তু সৌৰভ হাজৰিকাই উক্ত ধন দাবী কাণ্ড কেমেৰাৰ জৰিয়তে বন্দী কৰে। আৰু ইয়াৰ পাছতে জ্যেষ্ঠ আৰক্ষী বিষয়াৰ ধন দাবীৰ প্ৰসংগত আৰক্ষী সঞ্চালক প্ৰধানলৈ অভিযোগ প্ৰেৰণ কৰি হাজৰিকাই ধন দাবীৰ ঘটনাৰ সুবিচাৰ দাবী কৰিছিল।
ইয়াৰ পিছতে এই সম্পৰ্কীয় অভিযোগ প্ৰসংগত এটা অপৰাধজনিত গোচৰ ৰুজু কৰিবলৈ নগাঁও আৰক্ষীলৈ নিৰ্দেশ দিয়ে অসম আৰক্ষীৰ সঞ্চালক প্ৰধান কুল প্ৰসাদ শইকীয়াই। নগাঁও আৰক্ষী অধীক্ষক শংকৰব্ৰত ৰায়মেধিয়ে উক্ত অভিযোগৰ প্ৰসংগত এটা গোচৰ ৰুজু কৰাৰ লগতে জ্যেষ্ঠ আৰক্ষী বিষয়াই সমগ্ৰ ঘটনাটো তদন্ত কৰিব বুলিও মতপোষণ কৰিছিল।
আনহাতে, নগঞা জ্যেষ্ঠ আৰক্ষী বিষয়াগৰাকীৰ লগতে ধন লেনদেন কৰাত জড়িত আৰক্ষী কৰ্মচাৰীজনক গ্ৰেপ্তাৰ কৰাৰ উপৰি চাকৰিৰ পৰা নিলম্বন কৰিছে নগাঁও আৰক্ষীয়ে।