চিমলাত নাগৰিকত্ব সংশোধনী আইন চমুকৈ ‘কা’ সন্দৰ্ভত বিজেপিয়ে অনুষ্ঠিত কৰা এখন সভাত দলটোৰ ৰাষ্ট্ৰীয় অধ্যক্ষ জে পি নড্ডাই বৃহস্পতিবাৰে প্ৰধান মন্ত্ৰী নৰেন্দ্ৰ মোদীক প্ৰশংসাৰে ওপচাই পেলোৱা পৰিলক্ষিত হয়।
মোদীক প্ৰশংসা কৰি নড্ডাই কয় যে মহাত্মা গান্ধী, জৱাহৰলাল নেহৰু, ইন্দিৰা গান্ধী, ৰাজীৱ গান্ধী, মনমোহন সিঙে কৰিব নোৱাৰা কাম প্ৰধান মন্ত্ৰী মোদীয়ে কৰিছে।
নাড্ডাই কয়, ‘মহাত্মা গান্ধী, জৱাহৰলাল নেহৰু, ইন্দিৰা গান্ধী, ৰাজীৱ গান্ধী, মনমোহন সিং আদি সকলোৱে পাকিস্তান আৰু বাংলাদেশৰ নিৰ্যাতিত সংখ্যালঘু লোকসকলক আনিম বুলি কৈছিল। তেওঁলোকে এই কাম কৰিব নোৱাৰিলে, প্ৰধান মন্ত্ৰী মোদীয়ে কৰি দেখুৱাইছে’।
মোদী নেতৃত্বাধীন বিজেপি চৰকাৰে জম্মু-কাশ্মীৰৰ পৰা ধাৰা ৩৭০ প্ৰত্যাহাৰ আৰু তিনি তালাক আইন প্ৰণয়ন কৰা সন্দৰ্ভত সাধাৰণ জনতাৰ মাজত থকা ভ্ৰান্ত ধাৰণা দূৰ কৰাৰ বাবে অধ্যক্ষগৰাকীয়ে কৰ্ম-কৰ্তাসকলক আহ্বান জনায়।
ধাৰা ৩৭০ প্ৰত্যাহাৰৰ ফলত জম্মু-কাশ্মীৰৰ লোকসকলে পূৰ্বতে নোপোৱা বিভিন্ন সুবিধাসমূহ এতিয়া লাভ কৰিবলৈ সক্ষম হ’ব বুলিও উল্লেখ কৰে নড্ডাই।
