মহাৰাষ্ট্ৰৰ থানে জিলাৰ মীৰা ৰোডৰ বাসিন্দা তথা ৮১ বছৰীয়া আছগৰ আলী বোহৰা নামৰ এগৰাকী বৃদ্ধই নিজৰ বিদ্যালয়ৰ পুৰণি সহপাঠী প্ৰধানমন্ত্ৰী নৰেন্দ্ৰ মোদীক সাক্ষাৎ কৰাৰ পাছতেই তেওঁৰ ১৫ বছৰীয়া এক ভূমি বিবাদৰ অন্ত পৰিছে। যোৱা আঠ ছেপ্টেম্বৰত প্ৰধানমন্ত্ৰী মোদীক সাক্ষাৎ কৰি বোহৰাই তেওঁৰ বেদখলকৃত ভূমি সন্দৰ্ভত হস্তক্ষেপ আৰু চিবিআই তদন্তৰ দাবী জনাইছিল। ইয়াৰ কেইদিনমানৰ পাছতেই, ১৫ ছেপ্টেম্বৰত বিজেপি বিধায়ক নৰেন্দ্ৰ মেহতাৰ কোম্পানী ‘ছেভেন ইলোভেন কন্সট্ৰাকশ্যনছ’-এ বিতৰ্কিত ভূমিখণ্ডৰ ওপৰত নিজৰ দাবী প্ৰত্যাহাৰ কৰাৰ লগতে নিৰ্মাণৰ বাবে লাভ কৰা অনুমতিও ঘূৰাই দিয়াৰ সিদ্ধান্ত গ্ৰহণ কৰিছে।
বোহৰাৰ অভিযোগ অনুসৰি, তেওঁ ১৯৮৯ চনত ভায়ন্দৰ ইষ্টৰ নৱঘৰ অঞ্চলত প্ৰায় ২,৮১০ বৰ্গ মিটাৰৰ এক ভূমি ক্ৰয় কৰিছিল। কিন্তু ২০১১ চনত স্বয়ম বিল্ডাৰ্ছ আৰু বিজেপি বিধায়ক নৰেন্দ্ৰ মেহতাৰ কোম্পানী ছেভেন ইলেভেন কন্সট্ৰাকশ্যনছে উক্ত ভূমি বেদখল কৰে। নিজৰ ভূমি ঘূৰাই পোৱাৰ আশাত বোহৰাই বিগত ১৫ বছৰে বিভিন্ন চৰকাৰী কাৰ্যালয়ৰ দ্বাৰস্থ হৈছিল যদিও কোনো সুফল লাভ কৰা নাছিল। অৱশেষত উপায়ন্তৰ হৈ তেওঁ গুজৰাটৰ ৱাদনগৰস্থিত বিএন স্কুলৰ পুৰণি সহপাঠী প্ৰধানমন্ত্ৰী নৰেন্দ্ৰ মোদীৰ কাষ চাপে।
প্ৰধানমন্ত্ৰীৰ সৈতে হোৱা এই সাক্ষাৎকাৰৰ পাছতেই পৰিস্থিতিৰ দ্ৰুত পৰিৱৰ্তন ঘটিছে। সংবাদ সংস্থা পিটিআইৰ প্ৰতিবেদন অনুসৰি, মেহতাৰ কোম্পানীটোৱে মীৰা-ভায়ন্দৰ পৌৰ নিগমৰ নগৰ পৰিকল্পনা বিভাগলৈ পত্ৰ প্ৰেৰণ কৰি উক্ত স্থানত নিৰ্মাণকাৰ্য আৰম্ভ কৰাৰ প্ৰমাণপত্ৰ ঘূৰাই দিছে। কোম্পানীটোৱে দাবী কৰা মতে, তেওঁলোকে ২০১৯ চনৰ ১৩ জুনত মাৰ্ভিন ফাৰ্নাণ্ডিজৰ পৰা পঞ্জীয়নভুক্ত বিক্ৰী চুক্তিৰ জৰিয়তে এই ভূমি ক্ৰয় কৰিছিল আৰু ২০২৬ চনৰ ১৭ এপ্ৰিলত নিৰ্মাণৰ অনুমতি লাভ কৰিছিল। অৱশ্যে আৰক্ষী আয়ুক্তলৈ প্ৰেৰণ কৰা পত্ৰত কোম্পানীটোৱে স্পষ্ট কৰি দিছে যে বৰ্তমান দুয়োটা পক্ষৰ মাজত বুজাবুজি হোৱাৰ বাবেই তেওঁলোকে নিৰ্মাণৰ অনুমতি ঘূৰাই দিছে।
ইয়াৰ সমান্তৰালভাৱে, কোম্পানীটোৱে পৌৰ নিগমক নিৰ্মাণ অনুমতি বাতিল কৰিবলৈ আৰু প্ৰকল্পটোৰ বাবে জমা দিয়া মাছুল ঘূৰাই দিবলৈ অনুৰোধ জনাইছে। লগতে, ভূমিৰ গৰাকী বোহৰাৰ বিৰুদ্ধে গ্ৰহণ কৰা সকলো আইনী পদক্ষেপ আৰু অভিযোগ প্ৰত্যাহাৰ কৰাৰ প্ৰক্ৰিয়াও কোম্পানীটোৱে আৰম্ভ কৰিছে। উল্লেখযোগ্য যে বোহৰা আৰু প্ৰধানমন্ত্ৰীৰ মাজত অনুষ্ঠিত হোৱা এই সাক্ষাৎকাৰৰ পাছত মহাৰাষ্ট্ৰৰ পৰিবহণ মন্ত্ৰী প্ৰতাপ ছৰনাইকে দুয়োগৰাকীৰ এখন ছবি আৰু এক প্ৰেছ বিবৃতি প্ৰকাশ কৰি প্ৰধানমন্ত্ৰীয়ে তেওঁৰ পুৰণি সহপাঠীক ন্যায় প্ৰদান কৰাত সহায় কৰিব বুলি আশা প্ৰকাশ কৰিছিল।
বৰ্তমান বিজেপি বিধায়কগৰাকীৰ কোম্পানীটোৱে নিজৰ সকলো আইনী অভিযোগ আৰু নিৰ্মাণৰ অধিকাৰ প্ৰত্যাহাৰ কৰাৰ ফলত আছগৰ আলী বোহৰাই তেওঁৰ হেৰুওৱা ভূমি ঘূৰাই পোৱাৰ পথ প্ৰশস্ত হৈছে। প্ৰধানমন্ত্ৰীৰ ওচৰত হস্তক্ষেপৰ আবেদন জনোৱাৰ কেইদিনমানৰ ভিতৰতে এই বিষয়টোৱে যিদৰে মীমাংসাৰ দিশ লৈছে, সেয়া এতিয়া ৰাজ্যখনৰ প্ৰশাসনিক আৰু ৰাজনৈতিক মহলত বিশেষভাৱে চৰ্চিত হৈছে।
