হাৰিয়ানাৰ সোণিপত ফাষ্ট ট্ৰেক বিশেষ আদালতে ক্ৰীড়া জগতক লজ্জানত কৰা এক গোচৰত ঐতিহাসিক ৰায়দান কৰিছে। আদালতে এগৰাকী নাবালিকা ৰাষ্ট্ৰীয় পৰ্যায়ৰ ধনুৰ্বিদক যৌন নিৰ্যাতন চলোৱাৰ অপৰাধত ৰাষ্ট্ৰীয় ধনুৰ্বিদ্যা প্ৰশিক্ষক কুলদীপ কুমাৰ বেদৱানক ৫ বছৰৰ কঠোৰ কাৰাদণ্ডৰ শাস্তি প্ৰদান কৰিছে। অতিৰিক্ত সত্ৰ ন্যায়াধীশ নৰেন্দ্ৰৰ আদালতে গোচৰটোৰ গুৰুত্ব উপলব্ধি কৰি দোষী প্ৰশিক্ষকজনক ১০ হাজাৰ টকাৰ জৰিমনাও বিহিছে।
এই সমগ্ৰ ঘটনাটো ২০২৩ চনৰ আগষ্ট মাহৰ। সেই সময়ত সোণিপতৰ মুৰথল থানাৰ অন্তৰ্গত এগৰাকী ৰাষ্ট্ৰীয় পৰ্যায়ৰ নাবালিকা ধনুৰ্বিদে নিজৰ প্ৰশিক্ষক কুলদীপ বেদৱানৰ বিৰুদ্ধে গুৰু-শিষ্যৰ পৱিত্ৰ সম্পৰ্কক কলংকিত কৰাৰ গুৰুতৰ অভিযোগ উত্থাপন কৰিছিল। ভুক্তভোগীৰ অভিযোগ অনুসৰি, প্ৰশিক্ষকগৰাকীয়ে প্ৰশিক্ষণৰ অচিলাৰে তাইক যৌন নিৰ্যাতন চলাইছিল। অভিযোগ ৰুজু হোৱাৰ লগে লগে আৰক্ষীয়ে পকচো আইনৰ অধীনত ব্যৱস্থা গ্ৰহণ কৰি অভিযুক্ত প্ৰশিক্ষকজনক গ্ৰেপ্তাৰ কৰি কাৰাগাৰলৈ প্ৰেৰণ কৰিছিল।
সোণিপতৰ ফাষ্ট ট্ৰেক বিশেষ আদালতত এই চৰ্চিত গোচৰটোৰ দীঘলীয়া শুনানি চলিছিল। বিশেষ চৰকাৰী অধিবক্তা বিজেন্দ্ৰ সিং খত্ৰীয়ে জনোৱা মতে, আদালতে দুয়োপক্ষৰ যুক্তি, সাক্ষী আৰু প্ৰমাণসমূহ ভালদৰে পৰীক্ষা কৰাৰ পিছত ২০২৬ চনৰ ১৫ মে‘ত প্ৰশিক্ষক কুলদীপক দোষী সাব্যস্ত কৰিছিল। ইয়াৰ পিছত ২০ মে‘ত আদালতে শাস্তি ঘোষণা কৰে। আদালতে দোষী প্ৰশিক্ষকজনক দুটা পৃথক ধাৰাত শাস্তি প্ৰদান কৰিছে। পকচো আইনৰ অধীনত দোষীক ৫ বছৰৰ কাৰাদণ্ড আৰু ১০ হাজাৰ টকাৰ জৰিমনা বিহা হৈছে, যিটো আদায় নিদিলে অতিৰিক্ত ৩ মাহৰ সাধাৰণ কাৰাদণ্ড খাটিব লাগিব। আনহাতে, ৩৫৪ক ধাৰাৰ অৰ্থাৎ যৌন নিৰ্যাতনৰ অধীনত আদালতে দোষীক ৩ বছৰৰ কঠোৰ কাৰাদণ্ড আৰু ৫ হাজাৰ টকাৰ জৰিমনা বিহিছে। এই জৰিমনা আদায় নিদিলে ১ মাহৰ অতিৰিক্ত কাৰাদণ্ড খাটিব লাগিব। আদালতে লগতে স্পষ্ট কৰি দিছে যে এই দুয়োটা শাস্তি একেলগে চলিব।
বিশেষ চৰকাৰী অধিবক্তা বিজেন্দ্ৰ সিং খত্ৰীয়ে এই ৰায়দানক আদৰণি জনাইছে। তেওঁ কয় যে আদালতৰ এই কঠোৰ পদক্ষেপে সমাজত আৰু বিশেষকৈ ক্ৰীড়া জগতত এক শক্তিশালী বাৰ্তা প্ৰেৰণ কৰিব। খেলুৱৈসকলৰ নিৰাপত্তা আৰু সন্মানৰ লগত হেতালি খেলা কোনো প্ৰভাৱশালী ব্যক্তিয়েই যে আইনৰ চকুত সাৰি যাব নোৱাৰে, সেয়া এই ৰায়দানে প্ৰমাণ কৰিছে।
