সমগ্ৰ দেশৰ লগতে বৃহস্পতিবাৰে কনজুমাৰ্ছ লিগেল প্রটেক্টশ্বন ফ’ৰামে অসমতো ৰাষ্ট্ৰীয় গ্ৰাহক দিৱস পালন কৰে।
কোভিডজনিত পৰিস্থিতিৰ বাবে ফ’ৰামে মূলত: ৰাজ্যৰ বিভিন্ন বিশ্ববিদ্যালয় আৰু মহাবিদ্যালয়ৰ ছাত্র-ছাত্ৰীৰ মাজত ভাৰ্চুৱেল মাধ্যমৰে ২০১৯ চনত গ্ৰাহক সুৰক্ষা আইনত হোৱা সংশোধনী সমূহৰ ওপৰত সজাগতা অভিযান চলায়।
১৯৮৬ চনত আজিৰ দিনটোতে অৰ্থাৎ ২৪ ডিচেম্বৰত দেশত প্ৰথম বাৰৰ কাৰণে গ্ৰাহক সুৰক্ষা আইন কাৰ্য্যকৰী হৈছিল। তেতিয়াৰে পৰা ২৪ ডিচেম্বৰৰ দিনটো ৰাষ্ট্ৰীয় গ্ৰাহক দিৱস হিচাপে পালন কৰি অহা হৈছে।
সুদীৰ্ঘ ৩৪ বছৰ পিছত ২০১৯ চনত এই আইন খনৰ অধিকাংশ অনুচ্ছেদ সময়ৰ লগত খাপ খোৱাকৈ শক্তিশালীভাবে সংশোধন কৰা হয়।
কনজুমাৰ্ছ লিগেল প্রটেক্টশ্বন ফ’ৰামে বৃহস্পতিবাৰে গোৰেশ্বৰৰ নিজম বড়ো, নলবাৰীৰ নাজিয়া চুলতানা আৰু খাৰুপেটীয়াৰ চেমিম আখতাৰাই যৌথ ভাবে প্ৰস্তুত কৰা সজাগতামূলক ভিডিওৰ জৰিয়তে ছাত্র-ছাত্ৰীৰ মাজত উপভোক্তা হিচাপে প্ৰতিজন লোকক গ্ৰাহক সুৰক্ষা আইনে প্ৰদান কৰা অধিকাৰৰ বিষয়ে বিস্তৃত ভাবে অৱগত কৰে।
এই ভাৰ্চুৱেল সজাগতামূলক কাৰ্যসূচীত কনজুমাৰ্ছ লিগেল প্রটেক্টশ্বন ফ’ৰামৰ সচিব অধিবক্তা অজয় হাজৰিকা আৰু যোৰহাট জিলা গ্ৰাহক আদালতৰ সভাপতি তথা অৱসৰপ্ৰাপ্ত জিলা ন্যায়াধীশ খগেন দহোটিয়াই অংশ লৈ গ্ৰাহক সুৰক্ষা আইনৰ সংশোধিত অনুচ্ছেদ সমূহৰ বিষয়ে বিস্তৃত ভাবে ব্যাখ্যা আগবঢ়ায়।
ছচিয়েল মিডিয়াৰ জৰিয়তেও ফ’ৰামে সংশোধিত গ্ৰাহক সুৰক্ষা আইনৰ ওপৰত ব্যাপক সজাগতামূলক প্ৰচাৰ চলায়।
