বোকাখাত মহকুমাৰ কমাৰগাঁও অঞ্চলত নতুনকৈ জন্ম লাভ কৰা কমাৰগাঁও আঞ্চলিক প্ৰেছ ক্লাবৰ উদ্যোগত ১৬ আৰু ১৭ নৱেম্বৰত দুদিনীয়া কাৰ্যসূচীৰে ৰাষ্ট্ৰীয় প্রেছ দিবসৰ আয়োজন কৰা হৈছে।
দুদিনীয়া এই দিৱসৰ লগত সংগতি ৰাখি কমাৰগাঁও আঞ্চলিক প্ৰেছ ক্লাবে বৃহত্তৰ কমাৰগাঁও অঞ্চলৰ তিনিজনকৈ সংবাদকর্মীৰ সোঁৱৰণত প্ৰৱৰ্তন কৰিছে সাংবাদিকতাৰ তিনিটা বঁটা।
সংবাদ ক্ষেত্ৰত আগবঢ়োৱা বিশেষ সেৱাৰ বাবে বোকাখাত মহকুমাৰ তিনিগৰাকী বিশিষ্ট সাংবাদিকলৈ প্ৰেছ ক্লাবে এই বঁটা প্ৰদান কৰিব বুলি ঘোষণা কৰিছে।
কমাৰগাঁও অঞ্চলৰ প্ৰথম গৰাকী সংবাদ সেৱক সুৰেণ বৰুৱা সোঁৱৰণী “প্রবীন সংবাদ সেৱা বঁটা – ২০১৯” বোকাখাতৰ জ্যেষ্ঠ সাংবাদিক ড৹ বাবুলাল মোৰক, সাগৰ বৰুৱা সোঁৱৰণী “গ্রাম্য সাংবাদিকতা বঁটা (বৈদ্যুতিন মাধ্যম)-২০১৯” বোকাখাতৰ প্ৰদ্যুৎ মহন্তক আৰু “প্রতাপ হাজৰিকা সোঁৱৰণী গ্রাম্য সাংবাদিকতা বঁটা (ছপা মাধ্যম)-২০১৯” মৰঙীৰ প্ৰিয়ংদ্বীপ কাকতিলৈ আগবঢ়াইছে বুলি কমাৰগাঁও আঞ্চলিক প্ৰেছ ক্লাবে জনাইছে।
উল্লেখ্য যে ড৹ বাবুলাল মোৰ বোকাখাত জে ডি এছ জি মহাবিদ্যালয়ৰ প্ৰাক্তন অধ্যক্ষ আৰু বোকাখাক প্ৰেছ ক্লাবৰ এজন জ্যেষ্ঠ সাংবাদিক। জ্যেষ্ঠ সাংবাদিক প্ৰদ্যুৎ মহন্ত বোকাখাতৰ ইলেক্ট্ৰনিকচ মেডিয়া জাৰ্নেলিষ্ট এছ’চিয়েশ্যন চমুকৈ ‘ইমজা’ৰ সম্পাদক। ইফালে নুমলীগড় আৰু মৰঙীৰ বাবে দীৰ্ঘ দিন সেৱা আগবঢ়াই অহা প্ৰিয়ংদ্বীপ কাকতিও অঞ্চলটোৰ এগৰাকী জ্যেষ্ঠ সাংবাদিক।
১৭ নৱেম্বৰত কমাৰগাঁও উচ্চ বুনিয়াদী বিদ্যালয়ত অনুষ্ঠিত হ’ব লগা ৰাষ্ট্ৰীয় প্ৰেছ দিৱসৰ বিশেষ কাৰ্যসূচীত এই তিনি গৰাকী সাংবাদিকক এই বঁটা প্ৰদান কৰিব বুলি কমাৰগাঁও প্ৰেছ ক্লাবে জনাইছে।
