বিধানসভা নিৰ্বাচনলৈ দিন চমু চাপি অহাৰ লগে লগে ৰাজনৈতিক দলসমূহৰ নিৰ্বাচনী তৎপৰতা বৃদ্ধিৰ মাজতে শাসকীয় বিজেপিৰ প্ৰতি একাংশ নেতা-কৰ্মীৰ মোহভংগ ঘটিছে।
এসময়ৰ বিজেপিৰ বলিষ্ঠ জাতীয়তাবাদী নেতা তথা মাতৃভূমি সুৰক্ষা পৰিষদৰ সভাপতি ৰাজ নাৰায়ণ বৰাই গেৰুৱা দলটোৰ অসম তথা অসমীয়াবিৰোধী কেতবোৰ কাম-কাজত অসন্তুষ্ট হৈ আম আদমি পাৰ্টীত যোগদান কৰে।
তেওঁৰ লগতে মাতৃভূমি সুৰক্ষা পৰিষদৰ পঞ্চাশজন সদস্য তথা বিষয়ববীয়াও আপত যোগদান কৰে।
অনাগত দিনত সংগঠনটোৰ আন আন সদস্যয়ো আনুষ্ঠানিকভাৱে আপত যোগদান কৰিব বুলি জানিবলৈ দিছে নেতাগৰাকীয়ে।
অৰবিন্দ কেজৰিৱালৰ নেতৃত্বত দুৰ্নীতি-ভ্ৰষ্টাচাৰৰ বিৰুদ্ধে গঠন হোৱা আম আদমি পাৰ্টীয়ে জনতাৰ মৌলিক সমস্যা সমাধানত গুৰুত্ব আৰোপ কৰি দিল্লীৰ লগতে দেশৰ সচেতন জনতাৰ মন জয় কৰিবলৈ সক্ষম হোৱাৰ বাবেই দলটোৰ প্ৰতি এনেদৰে বিভিন্ন শ্ৰেণীৰ লোক আকৰ্ষিত হৈ পৰা বুলি প্ৰকাশ কৰিছে নেতাসকলে।
আম আদমি পাৰ্টীৰ মূল্যবোধৰ ৰাজনীতিৰ প্ৰতি আকৃষ্ট হৈ বিজেপিৰ এসময়ৰ সক্ৰিয় নেতা ৰাজ নাৰায়ন বৰাৰ লগতে তেওঁৰ সমৰ্থকসকলে আপ, অসমৰ ৰাজ্যিক সমন্বয়ক ডা° ভৱেন চৌধুৰী, ৰাজ্যিক গণমাধ্যম বিষয়ক গোটৰ সমন্বয়ক হেমন্ত ফুকন আৰু নগাঁও জিলা সমন্বয়ক নুৰুল হাছানৰ উপস্থিতিত আম আদমি পাৰ্টীত যোগদান কৰে।
এই অনুষ্ঠানত নগাঁও জিলাৰ কাৰ্মকৰ্তাসকলো উপস্থিত থাকে। দলত যোগদান কৰা নতুন সদস্যসকলে আপৰ শপতবাক্য পাঠ কৰি মূল্যবোধৰ ৰাজনীতিৰে এখন নতুন অসম প্ৰতিষ্ঠাৰ সংকল্প গ্ৰহণ কৰে।
আগন্তুক দিনত তেওঁলোকে নিষ্ঠাৰে দলৰ কাম কৰি, ভ্ৰষ্টাচাৰৰ বিৰুদ্ধে ঠিয় দি ক্ষমতা বিকেন্দ্ৰীকৰণৰ জৰিয়তে প্ৰতিজন নাগৰিকৰ পূৰ্ণ বিকাশেৰে এখন সমৃদ্ধিশালী অসম গঢ়ি তোলাৰ বাবে প্ৰতিজ্ঞাবদ্ধ হয়।