সমগ্ৰ ভাৰতবৰ্ষৰ দহটা ট্ৰেড ইউনিয়নে ৯ জুলাইত আহ্বান কৰা দেশজোৰা শ্ৰমিক ধৰ্মঘটে অসমৰ বিভিন্ন অঞ্চলতো ব্যাপক প্ৰভাৱ পেলায় হয়। চৰকাৰৰ শ্ৰম আৰু কৃষি সম্পৰ্কীয় নীতিৰ বিৰুদ্ধে প্ৰতিবাদ হিচাপে এই ধৰ্মঘটৰ অহ্বান জনাইছিল আৰু দেশ জুৰি ধৰ্মঘট কাৰ্যসূচী পালন কৰা হয়।
গুৱাহাটীত শতাধিক সংগঠনৰ সদস্যই খানাপাৰাত সমবেত হৈ চৰকাৰৰ কৰ্মসংক্ৰান্তীয় নীতিৰ বিৰুদ্ধে প্ৰতিবাদী কাৰ্যসূচী ৰূপায়ন কৰে। এজন প্ৰতিবাদকাৰীয়ে উল্লেখ কৰে যে চৰকাৰৰ সিদ্ধান্তই চালকসকলৰ জীৱিকা উপাৰ্জনত বাধাৰ সৃষ্টি কৰিছে আৰু পৰিবহণ খণ্ডৰ সংকট দূৰ কৰিবলৈ জৰুৰী পৰিৱৰ্তনৰ প্ৰয়োজন।
বিশ্বনাথত ধৰ্মঘটৰ প্ৰভাৱ অধিক তীব্ৰ আছিল। ৰাজহুৱা পৰিবহণ সম্পূৰ্ণৰূপে বন্ধ হৈ পৰে, দোকান-পোহাৰ বন্ধ হৈ যায়, আৰু চাহ বাগিচা তথা নিৰ্মাণ খণ্ডৰ শ্ৰমিকসকলে ৰাজপথত সমদল উলিয়ায়। প্ৰতিবাদকাৰীসকলে মাহিলী নূন্যতম মজুৰি ২৬ হাজাৰ টকা আৰু চাহ শ্ৰমিকৰ বাবে উন্নত দৰমহাৰ দাবী জনায়।
যোৰহাটতো মিশ্ৰিত প্ৰভাৱ দেখিবলৈ পোৱা গ’ল। ৰাজহুৱা পৰিবহণ বন্ধ হৈ থকাৰ বিপৰীতে ব্যক্তিগত বাহনৰ চলাচল অব্যাহত থাকে। বহুতো দোকান পহাৰ খোলা থকাৰ লগতে ব্যৱসায়িক কাম-কাজ চলি থাকে।
নলবাৰীত শ্ৰমিকসকলে চৰকাৰৰ ৰাজহুৱা সম্পত্তি ব্যক্তিগত কোম্পানীলৈ বিক্ৰীৰ নীতিৰ বিৰোধিতা কৰি ৰঙা পতাকা লৈ প্ৰতিবাদ মিছিল কৰে। স্থানীয় সংঘৰ এজন সদস্যই জোৰ দি কয় যে এই ধৰ্মঘটে দেশজুৰি শ্ৰমিক আৰু কৃষকৰ মাজত ঐক্য গঢ়ি তুলিছে।
ইফালে শিলচৰত ধৰ্মঘটৰ সঁহাৰি অঞ্চলভেদে ভিন্ন আছিল। কিছু অঞ্চলত বেংক আৰু ব্যৱসায়িক প্ৰতিষ্ঠান বন্ধ হৈ থকাৰ বিপৰীতে আন কিছু অঞ্চলত দৈনন্দিন কাম-কাজ স্বাভাৱিকভাৱে চলি থাকে। SUCI(C) আৰু AIDSOৰ দৰে সংগঠনে চৰকাৰৰ নীতিক অন্যায় বুলি অভিহিত কৰি প্ৰতিবাদ জনায়। ব্যাঘাতৰ মাজতো আৰক্ষীয়ে শৃংখলা বজাই ৰাখি যান-বাহনৰ চলাচল নিশ্চিত কৰে।
কেইবামাহ ধৰি চলি থকা আয়োজন আৰু আলোচনাৰ ফলত এই ধৰ্মঘটে ৰাজ্যৰ শ্ৰমিকসকলৰ মাজত সংহতি বৃদ্ধি কৰাত সহায় কৰিছে।
