অভিনেত্ৰী নীনা গুপ্তাই সদায় অকপটে কথা ক’বলৈ ভাল পায়। শেহতীয়াকৈ এক সাক্ষাৎকাৰত এইগৰাকী প্ৰবীণ অভিনেত্ৰীয়ে ভাৰতীয় সমাজ আৰু পিতৃতান্ত্রিক মানসিকতাক লৈ বিস্ফোৰক মন্তব্য কৰিছে।
নীনাৰ মতে আমাৰ দেশৰ গৰিষ্ঠসংখ্যক পুৰুষে আত্মনিৰ্ভৰশীল নাৰীক জীৱন সংগী হিচাপে গ্ৰহণ কৰিবলৈ ভয় কৰে।
সেই সাক্ষাৎকাৰত নীনাই কয়, “আত্মনিৰ্ভৰশীল মহিলাসকল পুৰুষৰ ওচৰত বিবাহৰ বাবে উপযোগী নহয়। কমেও ৯৫ শতাংশ পুৰুষৰ ক্ষেত্ৰত এই কথা সঁচা।”
নীনাই দাবী কৰে যে সাধাৰণতে পুৰুষে এনে মহিলাক ভাল পায় যিসকল অলপ অসহায় বা তেওঁলোকৰ ওপৰত নিৰ্ভৰশীল। বহু পুৰুষে কঠোৰ পৰিশ্ৰমী, স্বতন্ত্ৰ মনৰ আৰু কেৰিয়াৰ সচেতন নাৰীক সহ্য কৰিব নোৱাৰে। কাৰণ, তেওঁলোকে নাৰীৰ ওপৰত কৰ্তৃত্ব প্ৰয়োগ কৰিব বিচাৰে।
নীনাই স্পষ্টকৈ উল্লেখ কৰিছে যে এইটো কোনো বিতৰ্কৰ সৃষ্টি কৰিবলৈ নহয়, কিন্তু তেওঁ নিজৰ জীৱন আৰু চৌপাশৰ সমাজখনক দেখি এই উপলব্ধি হৈছে। নিজৰ ব্যক্তিগত জীৱনৰ এক তিক্ত অভিজ্ঞতাও তেওঁ শ্বেয়াৰ কৰে।
অভিনেত্ৰীগৰাকীয়ে কয় যে এবাৰ তেওঁৰ বিবাহ ঠিক হৈছিল আঙঠি বিনিময়ো হৈছিল। কিন্তু বিয়াৰ ঠিক আগতে তেওঁৰ হ’বলগীয়া স্বামীয়ে পিছুৱাই গ’ল। কাৰণ দিয়া হ’ল যে তেওঁৰ চাইনাছৰ অপাৰেচন কৰিব লাগে! বহুদিনলৈ মানুহজন ঘূৰি নাহিল। যদিও পিছত ঘূৰি আহি বিয়াৰ প্ৰস্তাৱ দিছিল, নীনাই স্পষ্টকৈ ‘নহ’ব’ বুলি কৈ দিছিল।
