এগৰাকী কিশোৰীক ধৰ্ষণৰ অভিযোগত কাৰাবন্দী হোৱা নেপালৰ তাৰকা ক্ৰিকেটাৰ তথা যুৱ চাঞ্চল্য সন্দীপ লামিচানেক জামিন প্ৰদান কৰিছে আদালতে। তিনিমাহতকৈও অধিক সময় কাৰাগাৰত কটোৱাৰ পাছত বৃহস্পতিবাৰে নেপালৰ আদালতে লামিচানেৰ জামিন মঞ্জুৰ কৰে।
কাঠমাণ্ডু জিলা আদালতৰ সিদ্ধান্ত বাতিল কৰি পাটন উচ্চ ন্যায়ালয়ৰ ন্যায়াধীশ ধ্ৰুৱৰাজ নন্দ আৰু ৰমেশ ঢাকালৰ যুটীয়া বিচাৰপীঠে ২০ লাখ টকাৰ জামিনত লামিচানেক মুকলি কৰি দিয়াৰ সিদ্ধান্ত লয়। অৱশ্যে এই গোচৰৰ চূড়ান্ত সিদ্ধান্ত নোলোৱালৈকে আদালতে ২২ বছৰীয়া লামিচানেক দেশ এৰি যোৱাত নিষেধাজ্ঞা আৰোপ কৰিছে।
উল্লেখ্য যে যোৱা বৰ্ষৰ ছেপ্টেম্বৰত এগৰাকী ১৭ বছৰীয়া কিশোৰীয়ে লামিচানেৰ বিৰুদ্ধে ধৰ্ষণৰ অভিযোগ উত্থাপন কৰিছিল। তাৰ পাছতেই বিতৰ্কৰ মাজত সোমাই পৰিছিল তাৰকাগৰাকী।
অভিযোগ সন্মুখলৈ অনা ১৭ বছৰীয়া কিশোৰী গৰাকীৰ ভাষ্যৰ আধাৰত তেওঁৰ অভিভাৱকে লামিচানেই যোৱা মাহত কাঠমাণ্ডুৰ এখন হোটেলৰ কোঠাত কিশোৰীগৰাকীক ধৰ্ষণ কৰিছিল বুলি দাবী কৰিছিল। এই বিস্ফোৰক অভিযোগ উত্থাপনৰ পিছতে নেপাল আৰক্ষীয়ে লামিচানেৰ বিৰুদ্ধে এক গোচৰ ৰুজু কৰিছিল।
তাৰ পাছতেই তাৰকাগৰাকীৰ নেপালৰ এখন আদালতে গ্ৰেপ্তাৰী পাৰোৱানা জাৰি কৰিছিল। অভিযোগৰ তদন্ত সুচাৰুৰূপে সম্পন্ন হোৱাৰ স্বাৰ্থত নেপাল ক্ৰিকেট ব’ৰ্ডে লামিছানেক নিলম্বন কৰিছিল। অৱশ্যে এই অভিযোগ অস্বীকাৰ কৰি লামিচানেই নিজকে নিৰ্দোষী বুলি দাবী কৰিছিল।
গ্ৰেপ্তাৰী পাৰোৱানা জাৰি কৰাৰ সময়ত ক্ৰিকেটাৰগৰাকীয়ে কেৰিবিয়ান প্ৰিমিয়াৰ লীগত খেলি আছিল। লামিচানেক নেপালত হাজিৰ হ’বলৈ নিৰ্দেশ দিয়াৰ পিছত তেওঁ নিৰ্দোষিতা প্ৰমাণৰ বাবে উত্থাপিত অভিযোগৰ সন্মুখীন হ’বলৈ সম্পূৰ্ণৰূপে সাজু বুলি লামিচানেই মন্তব্য কৰিছে।
এক ইনষ্টাগ্ৰাম পোষ্ট যোগে লামিচানেই তেওঁ নিৰ্দোষী আৰু নেপালৰ আইনৰ প্ৰতি বিশ্বাস আছে বুলি মন্তব্য কৰিছিল। সঠিক তদন্ত কৰি তেওঁক নেপালৰ আইনে ন্যায় প্ৰদান কৰিব বুলি আশা প্ৰকাশ কৰিছিল খেলুৱৈগৰাকীয়ে।
উল্লেখ্য যে নেপাল ক্ৰিকেটৰ পোষ্টাৰ বয় হৈ পৰা ২২ বৰ্ষীয় সন্দীপ লামিচানেক যোৱা বছৰ নেপালৰ ৰাষ্ট্ৰীয় দলৰ অধিনায়ক হিচাপে মনোনীত কৰা হৈছিল। ২০১৮ চনত ইণ্ডিয়ান প্ৰিমিয়াৰ লীগৰ ফ্ৰেঞ্চাইজী দিল্লী কেপিটেলছে ক্ৰয় কৰাৰ পিছতে লামিচানেৰ কেৰিয়াৰে গতি লয়।
তাৰ পিছতে লামিচানেই বিশ্বৰ সকলো টি-২০ লীগতে অংশগ্ৰহণ কৰিছে। কেৰিয়াৰৰ গ্ৰাফ ক্ৰমশ: উৰ্ধমূখী হোৱাৰ সময়তে ধৰ্ষণৰ গোচৰত অভিযুক্ত হৈ বিপদৰ সন্মুখীন হৈছে তাৰকাগৰাকী।
