মাত্ৰ দুমাহ পূৰ্বে নেপালৰ ৰাজনৈতিক প্ৰেক্ষাপট সলনি কৰা Gen-Z যুৱক-যুৱতীসকলে পুনৰবাৰ ৰাজপথত নামি অহাৰ ফলত দেশখনত এক উত্তপ্ত পৰিস্থিতিৰ সৃষ্টি হৈছে। বুধবাৰে নেপালৰ বাৰা জিলাত Gen-Z প্ৰতিবাদকাৰী আৰু নেপালৰ প্ৰাক্তন প্ৰধানমন্ত্ৰী কেপি শৰ্মা অলিৰ দল CPN-UML ৰ কৰ্মীৰ মাজত সংঘৰ্ষ হোৱাৰ পিছতে আজি পৰিস্থিতি অধিক উত্তপ্ত হৈ পৰে।
CPN-UML দলে পূৰ্বে Gen-Z ৰ প্ৰবল প্ৰতিবাদৰ ফলস্বৰূপে ক্ষমতা হেৰুৱাইছিল। বুধবাৰৰ এই উত্তেজনাৰ পিছতে আজি (বৃহস্পতিবাৰে) পুনৰ বহু সংখ্যক Gen-Z যুৱক-যুৱতী ৰাজপথলৈ ওলাই আহে। পৰিস্থিতি নিয়ন্ত্ৰণ কৰিবলৈ আৰক্ষীয়ে বল প্ৰয়োগ কৰিবলগীয়া হয়।
পৰৱৰ্তী সময়ত পৰিস্থিতি নিয়ন্ত্ৰণত ৰাখিবৰ বাবে জিলা প্ৰশাসনে দুপৰীয়া ১২:৪৫ বজাৰ পৰা নিশা ৮ বজালৈকে সান্ধ্য আইন জাৰি কৰে।
শেহতীয়াভাৱে CPN-UML দলে আৰম্ভ কৰিবলৈ লোৱা এক যুৱ জাগৰণ অভিযানৰ বাবে এই সংঘৰ্ষৰ সূত্ৰপাত ঘটা বুলি জানিব পৰা গৈছে। দলৰ সাধাৰণ সম্পাদক শংকৰ পোখাৰেল আৰু পলিটব্যুৰোৰ সদস্য মহেশ বাছনেট এক চৰকাৰ বিৰোধী সভাৰ বাবে কাঠমাণ্ডুৰ পৰা ছিমৰাত উপস্থিত হোৱাৰ কথা আছিল। এই খবৰ পোৱাৰ লগে লগে Gen-Z যুৱক-যুৱতীসকলে তেওঁলোকক বাধা দিবলৈ ছিমৰা বিমানবন্দৰ ঘেৰাও কৰাত সংঘৰ্ষৰ সৃষ্টি হয়।
বুধবাৰৰ সংঘৰ্ষত ৬ জনকৈ প্ৰতিবাদকাৰী আহত হয় আৰু তেওঁলোকে ছজন CPN-UML কৰ্মীৰ বিৰুদ্ধে এজাহাৰ দাখিল কৰে। কিন্তু আৰক্ষীয়ে CPN-UML দলৰ কৰ্মীসকলক গ্ৰেপ্তাৰ নকৰাৰ অভিযোগ তুলি Gen-Z যুৱকে পুনৰ প্ৰতিবাদ আৰম্ভ কৰে। এই অভিযোগৰ পিছতে আৰক্ষীয়ে তাৎক্ষণিক ব্যৱস্থা গ্ৰহণ কৰি দুজন অভিযুক্তক গ্ৰেপ্তাৰ কৰে।
পৰিস্থিতিৰ প্ৰতি লক্ষ্য ৰাখি বুধবাৰে উত্তেজনা বৃদ্ধি পোৱাৰ সময়ত ছিমৰা বিমানবন্দৰৰ বিমান সেৱা সাময়িকভাৱে বন্ধ কৰি দিব লগা হৈছিল। বৰ্তমান জিলাখনৰ সকলো পৰিস্থিতিৰ প্ৰতি প্ৰশাসনে তীক্ষ্ণ দৃষ্টি ৰখাৰ লগতে বাৰা জিলাৰ প্ৰধান স্থানসমূহ আৰু স্পৰ্শকাতৰ অঞ্চলসমূহত নিৰাপত্তা বাহিনী মোতায়েন কৰিছে।
