নৰেন্দ্ৰ মোদীৰ দ্বিতীয়টো কাৰ্যকালত মন্ত্ৰীসভাত ক্ৰীড়া আৰু যুৱ কল্যাণৰ দায়িত্ব লাভ কৰা অৰুণাচলৰ সাংসদ কিৰেন ৰিজিজুৱে তেওঁৰ পূৰ্বসূৰী ৰাজ্যবৰ্ধন সিং ৰাথোড়ৰ পথকে অনুসৰণ কৰিব।
মোদী মন্ত্ৰীসভাৰ প্ৰথমটো কাৰ্যকালত গৃহ ৰাজ্যমন্ত্ৰী হিচাপে দায়িত্ব পালন কৰা কিৰেন ৰিজিজুৱে এইবাৰ ক্ৰীড়া বিভাগৰ দৰে এক গুৰুত্বপূৰ্ণ দপ্তৰ লাভ কৰিছে। তদুপৰি, ৰাজ্য মন্ত্ৰী হ’লেও তেওঁ স্বতন্ত্ৰ দায়িত্ব লাভ কৰিছে।
পূৰ্বৰ ক্ৰীড়া মন্ত্ৰী ৰাজ্যবৰ্ধন সিং নিজেই এগৰাকী দেশৰ আগশাৰীৰ ক্ৰীড়াবিদ হোৱাৰ লগতে তেওঁৰ কাৰ্যকালত মন্ত্ৰীগৰাকীয়ে গ্ৰহণ কৰা প্ৰকল্পসমূহে যথেষ্ট সমাদৰ লাভ কৰিছিল।
এইবাৰ ক্ৰীড়া মন্ত্ৰীৰ দায়িত্ব লাভ কৰাৰ পাছত দায়িত্বভাৰ গ্ৰহণ কৰিয়েই কিৰেন ৰিজিজুৱে কয়,’’ৰাথোড়ে প্ৰস্তুত কৰা পথেৰেই মই আগবাঢ়িম। তেওঁ গ্ৰহণ কৰা এটা প্ৰকল্পও বাদ নিদিওঁ। খেলো ইণ্ডিয়াৰ পৰিসৰ আৰু বৃদ্ধি কৰা হ’ব।‘’
ক্ৰীড়াক্ষেত্ৰত ৰাথোড়ৰ দৰে অভিজ্ঞতা নাই যদিও কৰ্মস্পৃহা কম নহয় ৰিজিজুৰ। কলেজীয়া জীৱনত সমনীয়াৰ সৈতে সমূহীয়া দৌৰত অংশ গ্ৰহণ কৰা ৰিজিজুৰ প্ৰাক্তন ফুটবলাৰ বাইচুং ভূটীয়া আৰু ৰেনেডী সিঙৰ সৈতে বন্ধুত্ব আছে।
আনহাতে, টকিঅ’ অলিম্পিকৰ বাবে ভাৰতীয় দলৰ প্ৰস্তুতি মন্ত্ৰীগৰাকীৰ বাবে বৃহৎ প্ৰত্যাহ্বান হিচাপে দেখা দিছে। ইপিনে, অহা পাঁচ বছৰত ক্ৰীড়া মন্ত্ৰী হিচাপে তেওঁৰ লক্ষ্য সন্দৰ্ভত ৰিজিজুৱে কয়, ‘’ বিভাগটোৰ কামকাজ বুজি উঠোতে অলপ সময় লাগিব। কিন্তু আমি এটা দল হিচাপে কাম কৰি যাম।‘’
কেন্দ্ৰীয় মন্ত্ৰীসভাত ক্ৰীড়া মন্ত্ৰী হিচাপে দায়িত্ব লাভ কৰা ৪৮ বছৰীয়া ৰিজিজু হৈছে উত্তৰ-পূৰ্বাঞ্চলৰ দ্বিতীয়গৰাকী সাংসদ। ইয়াৰ পূৰ্বে নৰেন্দ্ৰ মোদীৰ প্ৰথমখন মন্ত্ৰীসভাত বৰ্তমান অসমৰ মুখ্য মন্ত্ৰী সৰ্বানন্দ সোণোৱালে ক্ৰীড়া মন্ত্ৰীৰ দায়িত্ব লাভ কৰিছিল।