ভৱিষ্যতে কাৰাগাৰৰ নিৰাপত্তা আৰু কয়দীসকলৰ ওপৰত নজৰ ৰাখিবলৈ কৃত্ৰিম বুদ্ধিমত্তা বা এআই ব্যৱহাৰ কৰা হ‘ব পাৰে। যোৱা বছৰ ব্ৰিটেইনৰ কাৰাগাৰ মন্ত্ৰী লৰ্ড টিম্পছনৰ সৈতে হোৱা এখন বিশেষ বৈঠকত এমাজন, গুগল আৰু মাইক্ৰছফ্টৰ দৰে ডাঙৰ প্ৰযুক্তি কোম্পানীৰ প্ৰতিনিধিসকলে এই পৰামৰ্শ দিছিল। অপৰাধমূলক কাৰ্যকলাপৰ ওপৰত নজৰ ৰাখিবলৈ কয়দীৰ ছালৰ তলত মাইক্ৰ’চিপ লগোৱাৰ দৰে চিন্তনীয় প্ৰস্তাৱো এই বৈঠকত দিয়া হৈছিল।
প্ৰযুক্তি কোম্পানীসমূহৰ মতে, এআইৰ সহায়ত ভৱিষ্যতে কোনজন অপৰাধীয়ে কি আৰু কিমান বিপদ কঢ়িয়াই আনিব পাৰে, তাৰ আগতীয়া অনুমান কৰিব পৰা যাব। অৱশ্যে, সমালোচকসকলে কোম্পানীসমূহৰ এনে প্ৰস্তাৱক অতি উদ্বেগজনক আৰু ভয়ংকৰ বুলি অভিহিত কৰিছে।
আলোচনাৰ সময়ত কাৰাগাৰৰ ভিতৰত কয়দীসকলক ইঠাইৰ পৰা সিঠাইলৈ নিবলৈ ৰবটিক্সৰ ব্যৱহাৰ কৰাৰ কথাও কোৱা হৈছিল। কয়দীৰ যাতায়াতৰ বাবে স্বয়ংক্ৰিয় চালিত বাহনৰ ব্যৱহাৰ আৰু এআইৰ জৰিয়তে কোনো ব্যক্তিৰ পৰা ভৱিষ্যতে হ‘ব পৰা সম্ভাব্য বিপদৰ মূল্যায়ন কৰাৰ ওপৰতো গুৰুত্ব দিয়া হৈছিল। অৱশ্যে, ব্ৰিটিছ চৰকাৰে এতিয়ালৈকে এনে কোনো প্ৰস্তাৱ গ্ৰহণ কৰা নাই।
এই বৈঠকখন যোৱা বছৰেই অনুষ্ঠিত হৈছিল যদিও ইয়াৰ তথ্য শেহতীয়াকৈহে পোহৰলৈ আহিছে। এই তথ্য ৰাজহুৱা কৰাত ফক্সগ্ল‘ভ নামৰ এটা সংস্থাৰ বিশেষ ভূমিকা আছে। চৰকাৰ আৰু কোম্পানীসমূহৰ দ্বাৰা হোৱা প্ৰযুক্তিৰ অপব্যৱহাৰ পোহৰলৈ অনাৰ বাবে এই সংস্থাটো জনাজাত। তেওঁলোকে তথ্য জনাৰ অধিকাৰ আইনৰ অধীনত আবেদন দাখিল কৰি এই গোপন বৈঠকৰ সবিশেষ তথ্য সংগ্ৰহ কৰিছিল।
মানৱ অধিকাৰ আৰু গোপনীয়তাৰ সমৰ্থকসকলে বিশ্বাস কৰে যে যদি ভৱিষ্যতে এনে প্ৰযুক্তি প্ৰয়োগ কৰা হয়, তেন্তে ই ব্যক্তিগত স্বাধীনতা আৰু গোপনীয়তাক লৈ গভীৰ প্ৰশ্নৰ সৃষ্টি কৰিব আৰু ইয়াৰ অপব্যৱহাৰ হোৱাৰ সম্ভাৱনাও বাঢ়ি যাব। আনহাতে, এই প্ৰস্তাৱৰ সমৰ্থকসকলে যুক্তি দৰ্শাইছে যে কাৰাগাৰত বঢ়া ভিৰ নিয়ন্ত্ৰণ, অপৰাধ প্ৰতিৰোধ, সম্পদৰ সঠিক ব্যৱস্থাপনা আৰু জনসাধাৰণৰ নিৰাপত্তা নিশ্চিত কৰাত এই উন্নত প্ৰযুক্তিয়ে এক গুৰুত্বপূৰ্ণ ভূমিকা পালন কৰিব পাৰে, যাৰ ফলত সমগ্ৰ ব্যৱস্থাটো অধিক ফলপ্ৰসূ আৰু আধুনিক হৈ উঠিব।
