নদীদ্বীপ মাজুলীৰ জলপথ যোগাযোগ ব্যৱস্থা অধিক সুসংহত আৰু সুগম কৰি তোলাৰ বাবে মুখ্য মন্ত্ৰী সৰ্বানন্দ সোণোৱালৰ নেতৃত্বত ৰাজ্য চৰকাৰে শেহতীয়াকৈ গ্ৰহণ কৰা পদক্ষেপৰ অংশ হিচাপে অহা ১১ অক্টোবৰৰ পৰা কমলাবাৰী-নিমাতীঘাটৰ মাজত আৰম্ভ হ’ব অত্যাধুনিক ৰ’-ৰ’ জাহাজৰ চলাচল।
অহা ১১ অক্তোবৰত মুখ্য মন্ত্ৰী সোণোৱালে মাজুলীৰ কমলাবাৰীঘাটৰ পৰা ‘এমভি ভূপেন হাজৰিকা’ নামকৰণ কৰা এই ৰ’-ৰ’ জাহাজখনৰ সেৱা আনুষ্ঠানিক ভাৱে শুভাৰম্ভ কৰিব ।
আভ্যন্তৰীণ জলপৰিবহন বিভাগৰ সঞ্চালক ভাৰতভূষণ দেৱচৌধুৰীয়ে আজি মাজুলীত প্ৰকাশ কৰা মতে ৪৬.৫০ মিটাৰ দীঘল আৰু ১৩.৩০ মিটাৰ বহল এই জাহাজখনৰ একেবাৰতে শতাধিক যাত্ৰীৰ উপৰি ২৫ টনকৈ সামগ্ৰী পৰিবাহী ৮ খন ট্ৰাক বা ২৫খন সৰু গাড়ী কঢ়িওৱা ক্ষমতা আছে।
গুৱাহাটীৰ পৰা ব্ৰহ্মপুত্ৰৰে মাজুলীলৈ আনি থকা ভাৰত চৰকাৰৰ আভ্যন্তৰীণ জলপথ প্ৰাধিকৰণে ১০ কোটি টকা ব্যয়ৰে নিৰ্মাণ কৰি ৰাজ্য চৰকাৰক অৰ্পণ কৰা ৰ’-ৰ’ জাহাজখন কাইলৈ পুৱাৰ ভাগত নিমাতিঘাট আহি পাবহি।