অসমৰ বনাঞ্চলৰ পৰা পোহৰলৈ আহিছে এক সুখবৰ। গুৱাহাটী বিশ্ববিদ্যালয়ৰ গৱেষকৰ এটা দলে অসমৰ পৰিৱেশত আৱিষ্কাৰ কৰিছে এটা নতুন উদ্ভিদ প্ৰজাতি। এই নতুন প্ৰজাতিটোক অসমৰ জনপ্ৰিয় শিল্পী জুবিন গাৰ্গৰ প্ৰতি সন্মান জনাই অছবেকিয়া জুবিনগাৰ্গিয়ানা (Osbeckia zubeengargiana) নামেৰে নামকৰণ কৰা হৈছে। সংস্কৃতিৰ জগতখনৰ লগতে প্ৰকৃতি সংৰক্ষণৰ প্ৰতি শিল্পীগৰাকীয়ে আগবঢ়াই অহা অৱদানক স্বীকৃতি জনিয়েই গৱেষকসকলে এই সিদ্ধান্ত গ্ৰহণ কৰিছে।
মেলাষ্টোমেটেচিয়া পৰিয়ালৰ অন্তৰ্গত এই নতুন উদ্ভিদজোপাক মানস ৰাষ্ট্ৰীয় উদ্যানৰ ঘাঁহনিত আৱিষ্কাৰ কৰা হয়। ২০২১ চনৰ পৰা ২০২৫ চনৰ ভিতৰত চলি থকা এক গৱেষণা প্ৰকল্পৰ সময়ত বৰ্ণালী দাস, প্ৰশোব পুলপ্ৰা আৰু নমিতা নাথ নামৰ গৱেষকসকলে এই প্ৰজাতিটো চিনাক্ত কৰিবলৈ সক্ষম হয়। প্ৰায় ৩.৫ মিটাৰ পৰ্যন্ত ওখ হ’ব পৰা এই জোপোহা উদ্ভিদজোপাত আকৰ্ষণীয় গোলাপী ৰঙৰ ফুল ফুলে। গৱেষকসকলে জনোৱা অনুসৰি, এই উদ্ভিদবিধৰ গঠনৰ সৈতে অছবেকিয়া ৰষ্ট্ৰেটাৰ কিছু মিল থাকিলেও পাত, ফুল আৰু বীজৰ ক্ষেত্ৰত ইয়াৰ সুকীয়া বৈশিষ্ট্য আছে।
মানস ৰাষ্ট্ৰীয় উদ্যানৰ ঘাঁহনি অঞ্চলত এই উদ্ভিদসমূহ প্ৰচুৰ পৰিমাণে দেখা পোৱা যায়। সাধাৰণতে ছেপ্টেম্বৰৰ মাজভাগৰ পৰা জানুৱাৰী মাহৰ ভিতৰত এই উদ্ভিদত ফুল আৰু ফল ধৰে। এই আৱিষ্কাৰে অসমৰ উদ্ভিদ বৈচিত্ৰ্যৰ ভঁৰাল চহকী কৰাৰ লগতে উত্তৰ-পূব ভাৰতৰ জৈৱ বৈচিত্ৰ্যৰ অধ্যয়নত নতুন দিশ মুকলি কৰিব বুলি গৱেষকসকলে আশা প্ৰকাশ কৰিছে। প্ৰকৃতি আৰু সংস্কৃতিৰ প্ৰতি থকা দায়বদ্ধতাৰ বাবে এজন শিল্পীৰ নামেৰে এনেদৰে এখন নতুন উদ্ভিদ প্ৰজাতিৰ নামকৰণ হোৱা ঘটনাই সকলোকে আনন্দিত কৰি তুলিছে।
