ভাৰতীয় সেনাবাহিনীত সলনি হ’ল ব্ৰিটিছ আমলৰ পুৰণি নিয়ম-কানুন। ইংৰাজৰ পুৰণি ঐতিহ্যক বিদায় জনাই এইবাৰ ভাৰতীয় সেনাত এটা নতুন ড্ৰেছ কোড বা পোছাকৰ নিয়ম কাৰ্যকৰী কৰা হৈছে। এতিয়াৰ পৰা কোনো আনুষ্ঠানিক কাৰ্যসূচীত ভাৰতীয় সেনাৰ জোৱানসকলে ডিঙিলৈকে বন্ধ থকা কোট বা জ্যাকেট পিন্ধিব নোৱাৰিব। ইয়াৰ লগতে সেনা বিষয়াসকলেও পেৰেড চলি থকাৰ সময়ত নিজৰ লগত তৰোৱাল ৰাখিব নোৱাৰিব। ইয়াতেই শেষ নহয়, কঁকালত চামৰাৰ পাউচ বেল্ট বা কঁকালৰ বন্ধনী পিন্ধাৰ এশ বছৰীয়া পুৰণি পৰম্পৰাকো বিদায় দিয়া হৈছে। এতিয়াৰ পৰা এই ধৰণৰ কঁকালৰ বেল্ট বা বন্ধনী আৰু ব্যৱহাৰ কৰিব নোৱাৰিব। এই সন্দৰ্ভত ভাৰতীয় সেনাৰ তৰফৰ পৰা আৰ্মী ইউনিফৰ্মছ ২০২৬ নামৰ এখন নতুন নিয়মাবলী প্ৰকাশ কৰা হৈছে।
ভাৰতীয় সেনাবাহিনীয়ে প্ৰকাশ কৰা ১৭৪ পৃষ্ঠাৰ এই নতুন আৰ্মী ইউনিফৰ্মছ ২০২৬ নিয়মাবলীত অতি স্পষ্টকৈ কোৱা হৈছে যে সকলো পদবীৰ সেনা কৰ্মীৰ বাবে শীতকালৰ এক বিশেষ পোছাকৰ পৰিকল্পনা কৰা হৈছে। এই পোছাকত থাকিব এটা বেটল জ্যাকেট, লগত থাকিব এংগোলা চাৰ্ট আৰু লগতে এটা বেৰেট টুপী। ইয়াৰ উপৰি প্ৰথমবাৰৰ বাবে সেনা বিষয়াসকলৰ ফৰ্মেল ড্ৰেছ কোড হিচাপে ফুল স্লিভ বা দীঘল হাতৰ চাৰ্ট ৰখা হৈছে। ইয়াৰ ওপৰত ডিঙিলৈকে বন্ধ থকা কোট বা জ্যাকেট থাকিব লাগিব, অৱশ্যে এই কোট বা জ্যাকেটৰ ৰং মাৰ্জিত হ’ব লাগিব। পুৰুষসকলৰ বাবে এই নিয়ম হোৱাৰ বিপৰীতে মহিলা বিষয়াসকলৰ বাবে মাৰ্জিত আৰু ৰুচিপূৰ্ণ ৰঙৰ শাৰী বা কুৰ্তা-চেলৱাৰৰ সৈতে সৰু গাঁঠিলৈকে থকা লং পেন্ট আৰু দোপাট্টা পিন্ধাৰ অনুমতি দিয়া হৈছে। অৱশ্যে স্লিভলেছ অৰ্থাৎ চুটি হাতৰ কুৰ্তাকে ধৰি অন্যান্য পোছাকো পিন্ধিব পৰা যাব।
ভাৰতীয় সেনাৰ একাংশ বিষয়াই জনোৱা মতে, বিগত কেইটামান বছৰ ধৰিয়েই এই নতুন ড্ৰেছ কোড কাৰ্যকৰী কৰাৰ পৰিকল্পনা চলি আছিল। অৱশেষত সেনাৰ পোছাক সম্পৰ্কীয় এই নিৰ্দেশনা বা নিয়মাবলী প্ৰকাশ কৰা হ’ল। দেশৰ সাৰ্বভৌমত্ব আৰু জাতীয় আবেগৰ প্ৰতি লক্ষ্য ৰাখিয়েই ব্ৰিটিছ আমলৰ বিভিন্ন নিয়মসমূহ এটা এটাকৈ আঁতৰাই পেলোৱা হৈছে বুলি সেনাবাহিনীৰ তৰফৰ পৰা জনোৱা হৈছে। লাভ কৰা তথ্য অনুসৰি, ভাৰতীয় সেনাৰ মেছ ড্ৰেছ নম্বৰ ৫ আৰু ৬ ৰ পৰা পাউচ বেল্ট বা চামৰাৰ কঁকালৰ বন্ধনী আঁতৰাই দিয়া হৈছে। কোৱা হৈছে যে এনে ধৰণৰ বেল্ট সাধাৰণতে ৰাষ্ট্ৰপতি ভৱনৰ অনুষ্ঠান বা প্ৰধানমন্ত্ৰী তথা সেনা প্ৰধানৰ বাসভৱনত আয়োজিত নৈশভোজতহে ব্যৱহাৰ কৰিব পৰা যায়। গতিকে সাধাৰণ সেনা কৰ্মীসকলে এই বেল্ট আৰু পিন্ধিব নোৱাৰিব। অৱশ্যে আৰ্মড কৰ, মেকানাইজড ইনফেন্ট্ৰী বা আৰ্টিলাৰী ৰেজিমেণ্টৰ দৰে কিছুমান বিশেষ ক্ষেত্ৰৰ উচ্চ পদস্থ বিষয়াসকলে এই বেল্ট পিন্ধিব পাৰিব।
পোছাকৰ নিয়ম সলনি কৰাৰ উপৰি ভাৰতীয় সেনাৰ কৰ্মীসকলৰ চেহেৰা আৰু সাজ-সজ্জাৰ ক্ষেত্ৰতো নতুন নিৰ্দেশনা জাৰি কৰা হৈছে। কোৱা হৈছে যে ভাৰতীয় সেনাবাহিনীত কৰ্মৰত কোনো ব্যক্তিয়ে ইউনিফৰ্ম পিন্ধি থকা অৱস্থাত শৰীৰত টেটু কৰিব নোৱাৰিব বা কোনো ধৰণৰ অলংকাৰ পিন্ধিব নোৱাৰিব। অৱশ্যে ধৰ্মীয় ক্ষেত্ৰত হাতত পবিত্ৰ সূতা বা ধাগা পিন্ধিব পাৰিব আৰু ব্ৰেচলেটো পিন্ধিব পৰা যাব। কিন্তু শিখ ধৰ্মাৱলম্বী লোকসকলৰ ক্ষেত্ৰত ভাৰতীয় সেনাত ধৰ্মীয় প্ৰতীক ব্যৱহাৰৰ অনুমতি নাই। ইয়াৰ উপৰি ভাৰতীয় সেনাৰ পুৰুষ কৰ্মীসকলৰ মোচৰ দৈৰ্ঘ্য ১২ চেণ্টিমিটাৰতকৈ বেছি হ’ব নোৱাৰিব। একেদৰে শৰীৰত পাৰফিউম বা চেন্ট ব্যৱহাৰ কৰাটোও নিষিদ্ধ কৰা হৈছে। মহিলাসকলৰ ক্ষেত্ৰত লিপষ্টিক, টিপ আৰু নাকৰ ফুলি পিন্ধাৰ ওপৰতো নিষেধাজ্ঞা আৰোপ কৰা হৈছে। অৱশ্যে তেওঁলোকে কপালত সেন্দূৰ বা তিলক ল’ব পাৰিব।
