সুস্বাস্থ্য বৰ্তাই ৰখাৰ ক্ষেত্ৰত বিশ্বজুৰি শেহতীয়াকৈ এক নতুন ব্যায়াম জনপ্ৰিয় হৈ পৰিছে, যাক ফিটনেছৰ জগতত ‘ৰাকিং'(Rucking) বুলি জনা গৈছে। মূলতঃ সামৰিক বাহিনীৰ জোৱানসকলে সুদীৰ্ঘ পথ অতিক্ৰম কৰাৰ সময়ত পিঠিত গধুৰ বেগ কঢ়িয়াই নিয়াৰ যি প্ৰশিক্ষণ গ্ৰহণ কৰে, সেই ধাৰণাটোৱেই এতিয়া সাধাৰণ মানুহৰ শাৰীৰিক চৰ্চাৰ অংশ হৈ পৰিছে। কিতাপ, পানীৰ বটল বা কাপোৰেৰে ভৰ্তি এটা গধুৰ বেগ কান্ধত ওলোমাই খোজকঢ়া এই সৰল অথচ প্ৰভাৱশালী কৌশলটোৱে একেলগে শৰীৰৰ শক্তি, সহ্যক্ষমতা আৰু হৃদ্যন্ত্ৰৰ স্বাস্থ্য উন্নত কৰাত সহায় কৰে বুলি ফিটনেছ বিশেষজ্ঞসকলে মত প্ৰকাশ কৰিছে।
‘ৰাকিং’ হৈছে প্ৰধানকৈ কান্ধত গধুৰ বেগ লৈ খোজকঢ়া বা ট্ৰেকিং কৰা এক প্ৰক্ৰিয়া। সাধাৰণ খোজকঢ়াতকৈ এই পদ্ধতিত শৰীৰটোৱে অধিক পৰিশ্ৰম কৰিবলগীয়া হয়। ইয়াৰ ফলত ভৰি, কঁকাল, পিঠি আৰু শৰীৰৰ মধ্যভাগৰ পেশীসমূহ অধিক সক্ৰিয় হৈ পৰে। একে সময়তে হৃদ্যন্ত্ৰ আৰু হাওঁফাওঁৱেও অধিক কাম কৰিবলগীয়া হয়। এই ব্যায়ামৰ আটাইতকৈ ডাঙৰ সুবিধাটো হ’ল ইয়াৰ সৰলতা। ইয়াৰ বাবে কোনো দামী যন্ত্ৰপাতি বা জিমৰ সদস্যপদৰ প্ৰয়োজন নাই। এটা মজবুত বেগ আৰু ঘৰতে উপলব্ধ গধুৰ কিতাপ বা পানীৰ বটলৰ সহায়তে যিকোনো লোকে এই ব্যায়াম আৰম্ভ কৰিব পাৰে।
এই বিশেষ শাৰীৰিক চৰ্চাৰ একাধিক উপকাৰিতা আছে। সাধাৰণ খোজকঢ়াৰ তুলনাত অতিৰিক্ত ওজন কঢ়িয়াই খোজকাঢ়িলে শৰীৰৰ বহু বেছি কেলৰি ক্ষয় হয়, যাক কিছু পৰিমাণে জগিং বা পাতল দৌৰৰ সৈতে তুলনা কৰিব পাৰি। ওজন কমাৰ লগতে হাড় আৰু পেশীৰ শক্তি বৃদ্ধি কৰাতো ই গুৰুত্বপূৰ্ণ ভূমিকা পালন কৰে। যিসকল লোকে দৌৰিবলৈ অনিচ্ছুক, তেওঁলোকৰ বাবে এই ব্যায়াম বিশেষভাৱে আকৰ্ষণীয়। তদুপৰি, পিঠিত বেগ লৈ খোজকাঢ়িলে ট্ৰেকিং কৰাৰ দৰে অনুভৱ হয়, যিয়ে মানসিক স্বাস্থ্য উন্নত কৰাৰ লগতে শৰীৰত ড’পামাইনৰ দৰে হৰম’নৰ ক্ষৰণ বৃদ্ধি কৰি মন প্ৰফুল্লিত কৰি ৰাখে। ইয়াৰ উপৰিও অতিৰিক্ত ওজনৰ বাবে হৃদ্যন্ত্ৰই অক্সিজেনযুক্ত তেজ সৰবৰাহ কৰিবলৈ অধিক পৰিশ্ৰম কৰিবলগীয়া হয়, যাৰ ফলত হৃদ্যন্ত্ৰৰ কাৰ্যক্ষমতাও বৃদ্ধি পায়।
নতুনকৈ ‘ৰাকিং’ আৰম্ভ কৰিব বিচৰা লোকসকলৰ বাবে বিশেষজ্ঞসকলে কিছুমান নিৰ্দিষ্ট নিয়ম মানি চলাৰ পৰামৰ্শ দিছে। আৰম্ভণিতে নিজৰ শৰীৰৰ ওজনৰ পাঁচৰ পৰা দহ শতাংশ সমান ওজন লৈ খোজকঢ়াটো শ্ৰেয়। কান্ধত গধুৰ বেগ লৈ তীব্ৰ বেগত খোজকঢ়াৰ পৰিৱৰ্তে সমুখলৈ চাই সঠিক ভংগীমাত নিজৰ সুবিধাজনক গতিত খোজকঢ়াটোহে প্ৰয়োজনীয়। খোজকঢ়াৰ বাবে উপযুক্ত জোতা আৰু কাপোৰ পৰিধান কৰাটোও সমানেই আৱশ্যক। লাহে লাহে শৰীৰটো এই প্ৰক্ৰিয়াৰ সৈতে অভ্যস্ত হৈ পৰাৰ পিছতহে ওজন, খোজকঢ়াৰ সময় আৰু গতি বৃদ্ধি কৰিব পাৰি। হঠাতে ওজন বৃদ্ধি কৰিলে আঘাত পোৱাৰ আশংকা থাকে।
যিকোনো শাৰীৰিক চৰ্চাৰ দৰেই ‘ৰাকিং’ৰ ক্ষেত্ৰতো সতৰ্কতা অৱলম্বন কৰাটো অত্যন্ত জৰুৰী। যিসকল লোকৰ আঁঠু, কঁকাল, মেৰুদণ্ড বা হৃদ্যন্ত্ৰৰ সমস্যা আছে, তেওঁলোকে এই ব্যায়াম আৰম্ভ কৰাৰ পূৰ্বে চিকিৎসকৰ পৰামৰ্শ গ্ৰহণ কৰাটো বাধ্যতামূলক। ভুল ভংগীমাত বা অতিৰিক্ত ওজন কঢ়িয়ালে শৰীৰত গুৰুতৰ আঘাত লগাৰ সম্ভাৱনা থাকে। সেয়েহে, ফিটনেছ বিশেষজ্ঞসকলে এই নতুন ব্যায়াম আৰম্ভ কৰাৰ সময়ত ধীৰ গতিৰে আগবঢ়াৰ নীতিক আটাইতকৈ বেছি গুৰুত্ব প্ৰদান কৰিছে।
