অৰুণাচল প্ৰদেশৰ পাপুম পাৰে জিলাৰ পৰিৱেশ-সংবেদনশীল জলচ্ছেদ অঞ্চলত অনিয়ন্ত্ৰিত পথ নিৰ্মাণৰ অভিযোগক লৈ ৰাষ্ট্ৰীয় সেউজ ন্যায়াধিকৰণে নিজাববীয়াকৈ এক গোচৰ ৰুজু কৰিছে। যোৱা ২২ এপ্ৰিলত এখন স্থানীয় সংবাদ পত্ৰত প্ৰকাশিত এক প্ৰতিবেদনৰ ভিত্তিত এন.জি.টি.-ৰ কলকাতা বিচাৰপীঠে এই ব্যৱস্থা গ্ৰহণ কৰিছে।
ন্যায়াধীশ অৰুণ কুমাৰ ত্যাগী আৰু বিশেষজ্ঞ সদস্য ড০ আফ্ৰোজ আহমেদৰ গঠিত বিচাৰপীঠখনে উক্ত বাতৰিটো পৰীক্ষা কৰি উদ্বেগ প্ৰকাশ কৰে। বাতৰিটোত অভিযোগ কৰা হৈছিল যে কোনো ধৰণৰ পৰিৱেশগত সুৰক্ষা অবিহনেই গংগা-টাইপু আৰু গংগা-টাগোৰ মাজৰ স্পৰ্শকাতৰ অঞ্চলত পথ নিৰ্মাণ কাৰ্য চলাই থকা হৈছে।
এই অভিযোগৰ গুৰুত্ব উপলব্ধি কৰি ন্যায়াধিকৰণে কয় যে বিষয়টোৰ ফলপ্ৰসূ বিচাৰৰ বাবে অৰুণাচল চৰকাৰৰ পৰিৱেশ, বন আৰু জলবায়ু পৰিৱৰ্তন বিভাগৰ মুখ্য সচিব তথা গড়কাপ্তানি বিভাগৰ সচিব আৰু আয়ুক্তৰ উপস্থিতি অনিবাৰ্য। সেই অনুসৰি, এই দুয়োটা বিভাগক বিচাৰ প্ৰক্ৰিয়াত উত্তৰদাতা হিচাপে অন্তৰ্ভুক্ত কৰা হৈছে। ন্যায়াধিকৰণে সকলো প্ৰতিবাদীক এমাহৰ ভিতৰত তেওঁলোকৰ শপতনামা তথা উত্তৰ দাখিল কৰিবলৈ নিৰ্দেশ দিছে।
ইফালে, এছ.ডি. লোদা আৰু তেচি টাটে গোচৰটোত সহ-আবেদনকাৰী হিচাপে অন্তৰ্ভুক্ত হ’বলৈ জনোৱা আবেদনৰ সন্দৰ্ভত বিচাৰপীঠখনে স্পষ্ট কৰি দিয়ে যে যিহেতু এই আদালতে গোচৰটো নিজাববীয়াকৈ ৰুজু কৰিছে, গতিকে ইয়াত সহ-আবেদনকাৰীৰ মৰ্যাদা প্ৰদান কৰিব নোৱাৰি। অৱশ্যে, ন্যায়াধিকৰণে তেওঁলোকক শুনানিৰ সময়ত প্ৰাসংগিক তথ্য দাখিল আৰু মৌখিক যুক্তি প্ৰদৰ্শনৰ জৰিয়তে আদালতক সহায় কৰিবলৈ অনুমতি প্ৰদান কৰিছে। আৰু অহা ২৭ মাৰ্চত এই বিষয়টোৰ পৰৱৰ্তী শুনানিৰ দিন ধাৰ্য কৰা হৈছে।
উল্লেখ্য যে, এই নিৰ্মাণ কাৰ্যই স্থানীয় বাসিন্দা আৰু পৰিৱেশবিদসকলৰ মাজত তীব্ৰ শংকাৰ সৃষ্টি কৰিছে। বিশেষজ্ঞসকলে আশংকা প্ৰকাশ কৰিছে যে বিধিবদ্ধ অনুমোদন অবিহনে এনেদৰে পাহাৰীয়া অঞ্চলত নিৰ্মাণ কাৰ্য চলি থাকিলে ভূমিস্খলন হোৱাৰ লগতে প্ৰাকৃতিক জলপ্ৰবাহত বাধাৰ সৃষ্টি হ’ব, যাৰ ফলত দীর্ঘম্যাদী পৰিৱেশগত ক্ষতি হোৱাটো নিশ্চিত। লগতে পাপুম পাৰেৰ দৰে পৰিৱেশগতভাৱে অতি সংবেদনশীল পাহাৰীয়া জিলাসমূহত অনিয়ন্ত্ৰিত আন্তঃগাঁথনি প্ৰকল্পৰ গুৰুতৰ পৰিণতিৰ প্ৰতি লক্ষ্য ৰাখি পৰিৱেশ সংৰক্ষণৰ নীতিসমূহ কঠোৰভাৱে পালন কৰাৰ প্ৰয়োজনীয়তাৰ ওপৰত বিশেষ গুৰুত্ব আৰোপ কৰা হৈছে।
