ৰাষ্ট্ৰীয় স্বাস্থ্য অভিযান, অসমে একুইট (তীব্ৰ) এনকেফেলাইটিছ চিণ্ড্ৰম (এ ই এছ) আৰু জাপানীজ এনকেফেলাইটিছ (জে ই) সম্পৰ্কীয় প্ৰতিবেদন সন্দৰ্ভত এক স্পষ্টীকৰণ জাৰি কৰি কয় যে এই দুয়োটা অৱস্থা সুকীয়া আৰু ইয়াক একাকাৰ কৰা উচিত নহয়।
এক আনুষ্ঠানিক বিবৃতিত মিছনে কয় যে একুইট জাপানীজ এনকেফেলাইটিছ অন্যতম কাৰণ হ’লেও সকলো এ ই এছ ৰোগী জাপানীজ এনকেফেলাইটিছ ৰোগী নহয়। কিছুমান সংবাদ মাধ্যমত এই দুয়োটা ৰোগৰ মাজত পৰ্যাপ্ত পাৰ্থক্য নৰখাকৈ এ ই এছ আৰু জে ইৰ পৰিসংখ্যা দাখিল কৰা বুলি অভিযোগ উত্থাপন হোৱাৰ পিছতে এই স্পষ্টীকৰণ দিয়া হৈছে।
নেশ্যনেল চেণ্টাৰ ফৰ ভেক্টৰ বৰ্ণ ডিজিজ কণ্ট্ৰ’লৰ সৈতে উপলব্ধ তথ্য অনুসৰি ২০২৬ চনৰ ১৭ জুনলৈকে অসমত ৩৫ জন জাপানীজ এনকেফেলাইটিছ ৰোগী আক্ৰান্ত আৰু জাপানীজ এনকেফেলাইটিছৰ বাবে ৭ জনৰ মৃত্যু হৈছে।
আনহাতে, ৪৭০ জন ৰোগী আৰু ৩২ জন মৃত্যুৰ পৰিসংখ্যা একুইট এনচেফেলাইটিছ চিণ্ড্ৰম (এ ই এছ)ৰ সৈতে জড়িত আৰু ইয়াক জাপানীজ এনকেফেলাইটিছ সম্পৰ্কীয় ৰোগী বা মৃত্যু বুলি ধৰি লোৱা উচিত নহয় বুলি মিছনে স্পষ্ট কৰে।
এন এইচ এম অসমে লগতে কয় যে ৰাজ্য চৰকাৰে বাৰ্ষিক এ ই এছ-জে ই বতৰৰ বাবে নিৰীক্ষণ, ৰোগ পৰিচালনা, চিকিৎসালয়ৰ প্ৰস্তুতি, টিকাকৰণ ব্যৱস্থা আৰু আন্তঃবিভাগীয় সমন্বয় শক্তিশালী কৰাকে ধৰি ব্যাপক প্ৰস্তুতিৰ ব্যৱস্থা গ্ৰহণ কৰিছে।
জনসচেতনতাৰ স্বাৰ্থত এ ই এছ আৰু জে ইৰ তথ্য পৃথকে পৃথকে আৰু সঠিকভাৱে প্ৰকাশ কৰিবলৈ আৰু ৰাজ্যখনৰ ৰোগৰ পৰিস্থিতি সন্দৰ্ভত কোনো ধৰণৰ ভুল বুজাবুজিৰ পৰা হাত সাৰিবলৈ সংবাদ মাধ্যম আৰু সংশ্লিষ্ট পক্ষক আহ্বান জনাইছে।
