যোৱা ২ নৱেম্বৰত ইতিহাস সৃষ্টি কৰি হৰমনপ্ৰীত কৌৰৰ নেতৃত্বত ভাৰতীয় মহিলা ক্ৰিকেট দলে প্ৰথমবাৰৰ বাবে আইচিচি মহিলা বিশ্বকাপৰ খিতাপ দখল কৰে। মুম্বাইৰ ডি ৱাই পাটিল ষ্টেডিয়ামত অনুষ্ঠিত হোৱা এই চূড়ান্ত খেলখনত ভাৰতে দক্ষিণ আফ্ৰিকাক ৫২ ৰানত পৰাস্ত কৰি এই ঐতিহাসিক বিজয়েৰে ভাৰতীয় ক্ৰীড়া ক্ষেত্ৰৰ বাবে এয়া এক নতুন যুগৰ আৰম্ভণি।
এই বিশ্বজয়ী দলটোৰ এক গুৰুত্বপূৰ্ণ খেলুৱৈ আছিল অসমৰ বোকাখাতৰ কন্যা উমা ছেত্ৰী। ইয়াৰ লগে লগে বিশ্বকাপ জয় কৰা প্ৰথমগৰাকী অসমীয়া ক্ৰিকেটাৰ হিচাপে উমাই এক অনন্য খ্যাতি লাভ কৰে। এই সাফল্যৰ পিছত যোৱা বৃহস্পতিবাৰে তেওঁ নিজ ৰাজ্যত উপস্থিত হয়।
আচৰিতভাৱে, বিশ্ব বিজয় কৰি অহাৰ পিছতো উমা ছেত্ৰীয়ে গৃহভূমিত কোনো চৰকাৰী আদৰণি লাভ নকৰিলে। আনকি অসমৰ বৰ বৰ জাতীয় সংগঠনো নগ’ল উমাক ঢোলে-দগৰে আদৰি আনিবলৈ। আনকি অসম ক্ৰিকেট সন্থাৰ কোনো জ্যেষ্ঠ বিষয়ববীয়াও নগ’ল উমাক এখন গামোচাৰে আদৰণি জনাবলৈ। উমাৰ আগমত সৃষ্টি নহ’ল উৎসৱমুখৰ পৰিৱেশৰ বা কৰা নহ’ল উমাৰ সাফল্যৰ উদযাপন। বিমান বন্দৰত ক্ৰিকেটাৰগৰাকীক আদৰণি জনাবলৈ কেৱল গোৰ্খা ছাত্ৰ সন্থাৰ বিষয়ববীয়াসকলহে উপস্থিত থাকে। উমাক কৰা এই অৱহেলাৰ বাবে বিমান বন্দৰৰ চৌহদতে আক্ষেপ প্ৰকাশ কৰি উচুপি উঠে গোৰ্খা ছাত্ৰ সন্থাৰ বিষয়ববীয়া সকল।
আনহাতে, এই ঘটনাক লৈ সমালোচনাৰ সন্মুখীন হৈ লাজ চৰম নোহোৱাৰ দৰে অসম ক্ৰিকেট সন্থাৰ সভাপতি তথা বিজেপিৰ বিধায়ক তৰংগ গগৈয়ে কয় যে উমাক লৈ সন্থা সদায়েই গৌৰৱান্বিত। তেওঁ সদৰী কৰে যে নিশা পলম হোৱাৰ বাবেহে আদৰণি অনুষ্ঠান আয়োজন কৰা হোৱা নাছিল।
উল্লেখ্য যে উমা ছেত্ৰীয়ে গৃহভূমিত যোগ্য আদৰণি লাভ নকৰিলে যদিও মহিলা ক্ৰিকেট দলটোৰ আন আন খেলুৱৈসকলে নিজ নিজ ৰাজ্যত ৰাজকীয় আদৰণি লাভ কৰে। তেওঁলোকৰ নিজ নিজ ৰাজ্যৰ বিভিন্ন সংস্থা, সংগঠন আৰু চৰকাৰে তেওঁলোকক বিভিন্ন পুৰস্কাৰ আৰু চাকৰি ঘোষণা কৰে। নিজ ৰাজ্যৰ কন্যাৰ সাফল্যত দিব লগা যথোচিত সন্মান আৰু উৎসাহ প্ৰদান কৰে তেওঁলোকে।
জানিব পৰা মতে, উমাৰ সাফল্যক লৈ অসম চৰকাৰ উদাসীন হৈ থকাৰ সময়তে অন্ধ্ৰপ্ৰদেশৰ খেলুৱৈ শ্ৰী চৰণীক অন্ধ্ৰপ্ৰদেশ চৰকাৰে ২.৫ কোটি টকাৰ নগদ পুৰস্কাৰৰ লগতে প্ৰথম বৰ্গৰ চৰকাৰী চাকৰি আৰু ১০০০ গজ আৱাসিক প্লট প্ৰদান কৰিছে। অন্ধ্ৰপ্ৰদেশৰ মুখ্যমন্ত্ৰী চন্দ্ৰবাবু নাইডুৱে নিজ বাসগৃহত খেলুৱৈ গৰাকীক সাক্ষাৎ কৰে।
তেনেদৰে মহাৰাষ্ট্ৰৰ স্মৃতি মান্ধানা জেমিমা ৰড্ৰিগুৱেজ আৰু ৰাধা যাদৱকো মহাৰাষ্ট্ৰ চৰকাৰে ২.২৫ কোটি টকাৰ নগদ পুৰস্কাৰ প্ৰদান কৰে।
ক্ৰিকেট দলটোৰ আন এগৰাকী খেলুৱৈ, পশ্চিম বংগৰ ৰিচা ঘোষক মমতা বেনাৰ্জীৰ চৰকাৰে আৰক্ষী বিভাগত চাকৰিৰ প্ৰস্তাৱ দিয়াৰ লগতে উষ্ম আদৰণি জনায়। লগতে দলটোৰ প্ৰশিক্ষক অমল মুজুমদাৰক চৰকাৰে ২২.৫০ লাখ টকাৰ পুৰস্কাৰ প্ৰদান কৰিছে।
এই ঐতিহাসিক জয়ৰ পিছত খেলুৱৈসকলক ৰাষ্ট্ৰপতি আৰু প্ৰধানমন্ত্ৰীয়েও সাক্ষাৎ কৰি অভিনন্দন জনাইছে। কিন্তু বৃহস্পতিবাৰে অসমত উপস্থিত হোৱা বিত্তমন্ত্ৰী নিৰ্মলা সীতাৰমণক আতিথ্যত প্ৰদানত ব্যস্ত থকা মুখ্যমন্ত্ৰী হিমন্ত বিশ্ব শৰ্মা আৰু বিজেপিৰ নেতা-পালি নেতা কাৰোৰে সময় নহ’ল নিজৰ ৰাজ্যলৈ গৌৰৱ কঢ়িয়াই অনা উমা ছেত্ৰীক আদৰণি জনাবলৈ।
আৰু এটা দুৰ্ভাগ্যজনক আৰু লজ্জাজনক কথা হ’ল যে ইতিমধ্যে উমাৰ বোকাখাতস্থিত বাসগৃহলৈ অসমৰ লগতে দেশৰ বিভিন্ন ৰাজ্যৰ অনুৰাগীৰ সোঁত বৈছে। নিশাও উমাৰ ঘৰলৈ আহিছে অনুৰাগীসকল। কিন্তু উমাৰ ঘৰলৈ যোৱাৰ বাটত নাই পোহৰৰ ব্যৱস্থা। যাৰ বাবে মোবাইলৰ টৰ্চ জ্বলাই উমাৰ ঘৰলৈ আহিবলগা হৈছে দূৰণিৰ অতিথি সকল। আদৰণিতো নজনালেই, অথচ উমাৰ ঘৰলৈ যোৱা উপপথটো পোহৰাই তুলিবলৈ সময় নহ’ল ক্ৰিকেট সংন্থা বা চৰকাৰ-প্ৰশাসনৰ।
