বিহাৰত দুখীয়া-ধনী নিৰ্বিশেষে সকলো গ্ৰাহকক প্ৰতিমাহে ১২৫ ইউনিট পৰ্যন্ত বিনামূলীয়া বিদ্যুৎ প্ৰদান কৰা হ’ব বুলি মুখ্যমন্ত্ৰী নীতিশ কুমাৰে ঘোষণা কৰিছে। যি সময়ত বিধানসভা নিৰ্বাচনৰ দিন চমু চাপিছে সেই সময়তে মুখ্যমন্ত্ৰী নীতিশ কুমাৰে এই সুবিধাৰ কথা ঘোষণা কৰে। চলিত বৰ্ষৰ নৱেম্বৰ মাহত বিহাৰৰ বিধানসভা নিৰ্বাচন অনুষ্ঠিত হোৱাৰ কথা।
মুখ্যমন্ত্ৰীয়ে কয় যে, বিদ্যুতৰ সিদ্ধান্তই বিহাৰৰ ১.৬৭ কোটি পৰিয়াল উপকৃত কৰিব। ৰাজ্যত খালী হৈ থকা শিক্ষকৰ পদ পূৰণৰ নিৰ্দেশো দিছে মুখ্যমন্ত্ৰীয়ে। অনুমান কৰা হৈছে যে নিৰ্বাচন ঘোষণাৰ পূৰ্বে তেওঁৰ চৰকাৰে শিক্ষক নিযুক্তিৰ বাবে অধিসূচনা জাৰি কৰিবলৈ ওলাইছে। বৰ্তমান ৰাজ্যত খালী হৈ আছে ৮৭,৭৭৪টা শিক্ষক পদ। অৱশ্যে অনাগত দিনত প্ৰয়োজন হ’ব বুলি ধৰি লৈ মুখ্যমন্ত্ৰীয়ে ৩.৫ লাখ পদ পূৰণৰ নিৰ্দেশ দিছে। শেহতীয়াকৈ নীতিশ চৰকাৰে ৰাজ্যৰ মহাবিদ্যালয় আৰু বিশ্ববিদ্যালয়ৰ বাবে হাজাৰ হাজাৰ শিক্ষক নিযুক্তি দিছে।
যোৱা সপ্তাহত নীতিশ চৰকাৰে ৩৫ শতাংশ চাকৰি মহিলাৰ বাবে সংৰক্ষিত কৰাৰ সিদ্ধান্ত ঘোষণা কৰিছিল। বৃহৎ সংখ্যক মহিলা ভোটাৰৰ কথা মনত ৰাখি নিজৰ অংশীদাৰ বিজেপিৰ পৰামৰ্শ মতে নীতিশে এই সিদ্ধান্ত গ্ৰহণ কৰে। প্ৰধানমন্ত্ৰী নৰেন্দ্ৰ মোদীয়ে মুখ্যমন্ত্ৰীৰ এই সিদ্ধান্তক প্ৰশংসা কৰে।
কিন্তু নীতিশৰ দলকে ধৰি এনডিএ শিবিৰত এই সিদ্ধান্তসমূহৰ লাভৰ ওপৰত সন্দেহৰ সৃষ্টি হৈছে। নেতাসকলে ব্যক্তিগতভাৱে স্বীকাৰ কৰে যে চৰকাৰৰ বিৰুদ্ধে জনতাৰ ক্ষোভ তীব্ৰ। এতিয়া ভোটদানৰ ঘণ্টা বাজি যোৱাৰ পাছত উপহাৰ ঘোষণা কৰি বিশেষ সুবিধা নাথাকিব। বিদ্যুতৰ সুবিধাৰ কথা আগতেই ঘোষণা কৰিব লাগিছিল। শিক্ষককে ধৰি চৰকাৰী পদ পূৰণৰ কামো কমেও এবছৰৰ আগতে সম্পূৰ্ণ কৰাৰ প্ৰয়োজন আছিল। কাৰণ বিগত পঁচিশ বছৰে নীতিশ ৰাজ্যৰ মুখ্যমন্ত্রী হৈ আছে৷ তেওঁ ঘোষণা কৰা সুবিধাসমূহ ক্ষমতালৈ আহিব বিচৰা দলটোৱে প্ৰদান কৰে। ইমান বছৰে চৰকাৰ চলাই নীতিশে যি প্ৰতিশ্ৰুতি দিছে সেয়া ব্যৰ্থতাৰ লক্ষণ।
