সুৰা নীতিৰ কেলেংকাৰীৰ গোচৰত কাৰাৰুদ্ধ হৈ থকা দিল্লীৰ প্ৰাক্তন উপ-মুখ্যমন্ত্ৰী তথা আপ নেতা মনীষ চিছ’দিয়াৰ জামিন আবেদনৰ শুনানি আজি স্থগিত ৰাখে উচ্চতম ন্যায়ালয়ে। আদালতে অহা ৪ অক্টোবৰলৈ স্থগিত ৰাখিছে চিছ’দিয়াৰ জামিন আবেদনৰ শুনানি।
দুই কেন্দ্ৰীয় তদন্তকাৰী সংস্থা চিবিআই আৰু এনফৰ্চমেণ্ট ডাইৰেক্টৰেটে তদন্ত কৰি থকা দিল্লী আবকাৰী নীতিৰ দুটা গোচৰত অভিযুক্ত আপ নেতা মনীষ চিছ’দিয়াৰ জামিন আবেদনৰ আজি শুনানিৰ দিন ধাৰ্য কৰিছিল উচ্চতম ন্যায়ালয়ে।
মনীষ চিছ’দিয়াৰ হৈ হাজিৰ হোৱা জ্যেষ্ঠ অধিবক্তা অভিষেক সিংভীয়ে এই বিষয়ত যুক্তি দিবলৈ দুঘণ্টাৰ পৰা তিনি ঘণ্টাৰ প্ৰয়োজন বুলি আদালতত উল্লেখ কৰাৰ পিছত ন্যায়াধীশ সঞ্জীৱ খান্না আৰু এছ ভি এন ভট্টীৰ বিচাৰপীঠে বিষয়টো স্থগিত ৰাখে।
উল্লেখ্য যে, দিল্লীৰ সুৰা নীতিত কেলেংকাৰীৰ অভিযোগত ২৬ ফেব্ৰুৱাৰীত চিবিআই- এ চিছ’দিয়াক গ্ৰেপ্তাৰ কৰিছিল। তেতিয়াৰ পৰাই জিম্মাত আছে আপ নেতাগৰাকী। ইয়াৰ পিছতে এই নীতিত ধন সৰবৰাহৰ অভিযোগত ৯ মাৰ্চত তেওঁক কাৰাগাৰতে গ্ৰেপ্তাৰ কৰিছিল ইডিয়ে।
এই দুই গোচৰতে দিল্লী উচ্চ ন্যায়ালয়ে চিছ’দিয়াৰ জামিন নাকচ কৰাৰ পিছত তেওঁ উচ্চতম ন্যায়ালয়ৰ দ্বাৰস্থ হৈছিল। বিগত ১৪ জুলাইত শীৰ্ষ আদালতে এই গোচৰসমূহত চিছ’দিয়াৰ অন্তৱৰ্তীকালীন জামিন আবেদন সন্দৰ্ভত চিবিআই আৰু ইডিক প্ৰতিবেদন দাখিল কৰিবলৈ নিৰ্দেশ দিছিল।
