যোৱা ৪ দিন ধৰি চলা দিল্লীৰ হিংসাত্মক ঘটনাৰ আঁৰৰ উপাদান বুলি চিহ্নিত কৰা বিজেপি নেতা কপিল মিশ্ৰ, অনুৰাগ ঠাকুৰ আৰু পাৰ্ভেছ ভাৰ্মাৰ “ঘৃণা বিয়পোৱা বক্তব্য”ৰ বিৰুদ্ধে এজাহাৰ পঞ্জীয়ন কৰাটো এই সময়ত উচিত নহয় বুলি মন্তব্য কৰিছে দিল্লী উচ্চ ন্যায়ালয়ে।
দিল্লী আৰক্ষীয়ে ন্যায়ালয়খনক এই সময়ত এনেকুৱা এজাহাৰ পঞ্জীয়ন সঠিক নহ’ব বুলি জনোৱাৰ পিছতে এই সিদ্ধান্ত লয় ন্যায়ালয়খনে।
আৰক্ষীয়ে কয়, এই অৱস্থাত এই ধৰণৰ পদক্ষেপে পৰিস্থিতি স্বাভাৱিক কৰাত সহায় নকৰিব।
দিল্লীৰ হিংসাৰ বাবে বিজেপিৰ এই নেতাকেইজনৰ “ঘৃণা বিয়পোৱা বক্তব্য”ক জগৰীয়া কৰি তেওঁলোকৰ বিৰুদ্ধে এজাহাৰ দাখিল কৰিবলৈ আৰ্জি দিছিল মানৱ অধিকাৰ কৰ্মী হৰ্ষ মাণ্ডাৰে।
দিল্লীৰ আদালতে মাণ্ডাৰৰ আৰ্জিটোৰ শুনানি অহা ১৩ এপ্ৰিললৈ স্থগিত ৰাখে।
আনহাতে কেন্দ্ৰীয় চৰকাৰৰ ছলিচিটৰ জেনেৰেল তুষাৰ মেহতায়ো মাণ্ডাৰৰ আৰ্জিখনক এক পক্ষীয় বুলি কৈ আদালতৰ মজিয়াত বিজেপিৰ নেতাকেইজনক সুৰক্ষা দিয়াৰ চেষ্টা কৰে।
তেওঁ কয় যে অন্যান্যসকলৰো ঘৃণা বিয়পোৱা বক্তব্য আছে।
কেন্দ্ৰ চৰকাৰৰ তৰফৰ পৰা দিয়া তথ্য মতে হিংসাৰ ঘটনাৰ পিছত এতিয়ালৈকে ৪৮খন FIR দাখিল কৰা হৈছে।
২৬ ফেব্ৰুৱাৰিত ন্যায়ালয়খনৰ এখন বিচাৰপীঠে আৰক্ষীৰ বিশেষ আয়ুক্ত প্ৰবীৰ ৰঞ্জনৰ পৰা এই আশ্বাস আদায় কৰিছিল যে আয়ুক্তজনে নিজেই ভিডিঅ’ ক্লিককেইটা চাব আৰু এফ আই আৰ পঞ্জীয়ন কৰা সন্দৰ্ভত এটা সুচিন্তিত সিদ্ধান্ত ল’ব।
তাৎপৰ্য্যপূৰ্ণভাৱে এই বিচাৰপীঠখনৰ এজন ন্যায়াধীশ এছ মুৰুলীধৰণক তৎক্ষণাৎ কাৰ্য্যকৰী হোৱাকৈ দিল্লী ন্যায়ালয়ৰ পৰা পাঞ্জাব আৰু হাৰিয়ানা উচ্চ ন্যায়ালয়লৈ ৰাতিয়েই বদলি কৰা হয়।
