ঈদৰ দিনাখন অসমৰ কোনো স্থানতে এন আৰ চিৰ শুনানি অনুষ্ঠিত নহয়। এন আৰ চি কৰ্তৃপক্ষই এই কথা স্পষ্ট কৰি দিছে।
ঈদৰ দিনাও এন আৰ চিৰ শুনানি লোৱা হ’ব বুলি ছচিয়েল মিডিয়াৰ বিভিন্ন মঞ্চত প্ৰচাৰ হৈ থকা কথাটো উৰাবাতৰি বুলিহে সদৰী কৰিছে এন আৰ চি কৰ্তৃপক্ষই। এই প্ৰচাৰ শুদ্ধ নহয় বুলি কৰ্তৃপক্ষই এক স্পষ্টীকৰণ যোগে প্ৰকাশ কৰিছে।
উল্লেখযোগ্য যে একাংশ প্ৰতিক্ৰিয়াশীল চক্ৰই ৫জুন,২০১৯’ তাৰিখে মুছলমান সম্প্ৰদায়ৰ লোকসকলৰ পৱিত্ৰ ঈদৰ দিনাখনো এন আৰ চিৰ শুনানি অনুষ্ঠিত হ’ব বুলি বিভিন্ন মাধ্যমৰ যোগেদি এক উৰাবাতৰি বিয়পাই দিছে। স্বাভাৱিকতে এই বাতৰিয়ে সংশ্লিষ্ট লোকসকলৰ মাজত তীব্ৰ অসন্তুষ্টিৰ সৃষ্টি কৰে।
এই উৰাবাতৰিৰ খৱৰ এন আৰ চি কৰ্তৃপক্ষৰ দৃষ্টিগোচৰ হোৱাৰ পাছতে কৰ্তৃপক্ষই ইয়াক উৰাবাতৰি বুলি অভিহিত কৰি অহা ৫জুনত পৱিত্ৰ ঈদৰ দিনাখন অসমত কোনো স্থানতে এন আৰ চিৰ শুনানি নহয় বুলি স্পষ্ট কৰি দিছে।
এন আৰ চিৰ কৰ্তৃপক্ষৰ স্পষ্টীকৰণত স্পষ্ট কৰি কোৱা হৈছে: ‘’ এইটো স্পষ্ট কৰি দিয়া হয় যে অহা ৫ জুনত কোনো শুনানি অনুষ্ঠিত নহয়। বহুদিন আগতে জাননী জাৰি কৰা হৈছে আৰু ৫জুনত কোনো দাবী-আপত্তিকাৰীলৈ জাননী প্ৰেৰণ কৰা হোৱা নাই। ৰাইজক এনে উৰাবাতৰিৰ প্ৰতি মনযোগ নিদিবলৈ অনুৰোধ কৰা হ’ল।‘’