ভাৰত চৰকাৰে এই মুহূৰ্তলৈকে বৃহৎ পৰিসৰৰ লকডাউন বলৱৎ কৰাৰ কথা ভবা নাই।
বিত্ত মন্ত্ৰী নিৰ্মলা সীতাৰমণে এই কথা ঘোষণা কৰিছে।
সীতাৰমণে কৈছে যে যোৱাবৰ্ষৰ দৰে লকডাউনৰ ঘোষণা কৰাৰ সলনি স্থানীয় পৰিসৰতহে ইয়াৰ ব্যৱস্থা লোৱা হৈছে।
মঙলবাৰে বিশ্ব বেংকৰ মাণ্ডলিক সভাপতি ডেভিড মালপাছৰ স’তে হোৱা এক ভাৰ্চুৱেল সাক্ষাতত নতুন দিল্লীৰ পৰা সীতাৰমণে এইদৰে জনায়।
সাক্ষাৎ অনুষ্ঠানটোত সীতাৰমণে বিশ্ব বেংকে ভাৰতৰ অৰ্থনৈতিক উন্নয়নৰ বাবে লোৱা কাৰ্যাৱলীসমূহক প্ৰশংসা কৰে।
বিত্ত মন্ত্ৰালয়ৰ তৰফৰ পৰা এই সম্পৰ্কে এটা টুইট কৰা হৈছে।
Finance Minister Smt. @nsitharaman and President World Bank Group Mr. @DavidMalpassWBG met via virtual mode in New Delhi today. (1/5) pic.twitter.com/nXyjxBhAuk
— Ministry of Finance (@FinMinIndia) April 13, 2021
সীতাৰমণে কয় যে কভিডৰ দ্বিতীয় ঢৌ স্বত্বেও ভাৰত চৰকাৰে স্পষ্টভাৱে ক’ব বিচাৰে যে চৰকাৰে এটা বৃহৎ লকডাউন বলবৎ কৰিব নিবিচাৰে।
”আমি আমাৰ অৰ্থনৈতিক সম্পূৰ্ণ আৱদ্ধ কৰিব নিবিচাৰো।”- তেওঁ কয়।
বিশ্ববেংকৰ তৰফৰ পৰা জনোৱা হৈছে যে অনুষ্ঠানটোত সীতাৰমণ আৰু মালপাছে দেশখনৰ অসামৰিক সেৱা আৰু বিত্তীয় খণ্ডসমূহৰ সংস্কাৰ, জলসম্পদ ব্যৱস্থাপনা আৰু স্বাস্থ্যখণ্ডৰ বিষয়েও আলোচনা কৰা হয়।
তদুপৰি ভাৰতে ঘৰুৱাভাৱে বৃহৎ কভিড ভেকচিন উৎপাদন কৰাৰ সক্ষমতাৰ বিষয়েও তেওঁলোকে আলোকপাত কৰে।
মালপাছে আশ্বাস দিয়ে যে বিশ্ব বেংকে এইক্ষেত্ৰত ভাৰতক সহযোগ কৰি যাব।