কেন্দ্ৰীয় চৰকাৰৰ হস্তক্ষেপৰ পাছত এতিয়াৰে পৰা Blinkit, Zepto, Zomato আৰু Flipkart Minutes-ৰ দৰে দ্ৰুত বাণিজ্য প্লেটফৰ্মসমূহে আৰু গ্ৰাহকক ১০ মিনিটত সামগ্ৰী যোগান ধৰাৰ গেৰাণ্টি নিদিয়ে। শ্ৰম মন্ত্ৰালয়ৰ নিৰ্দেশত এই কোম্পানীসমূহে তেওঁলোকৰ এপ্ আৰু ব্ৰেণ্ডিঙৰ পৰা ‘১০ মিনিটৰ ডেলিভাৰী’ শ্ল’গানটো আঁতৰাবলৈ মান্তি হৈছে।
কেন্দ্ৰীয় শ্ৰম আৰু নিযুক্তি মন্ত্ৰী মনসুখ মাণ্ডব্যই শেহতীয়াভাৱে Blinkit, Zepto, Zomato আৰু Swiggy আদি কোম্পানীৰ মুৰব্বীসকলৰ সৈতে এক বৈঠকত মিলিত হয়। মন্ত্ৰীগৰাকীয়ে ডেলিভাৰী কৰ্মীসকলৰ সুৰক্ষা আৰু তেওঁলোকৰ ওপৰত পৰা অত্যধিক মানসিক চাপৰ সন্দৰ্ভত উদ্বেগ প্ৰকাশ কৰে। ইয়াৰ পৰিপ্ৰেক্ষিতত কোম্পানীসমূহে ১০ মিনিটৰ সময়সীমাৰ বাধ্যবাধকতা উঠাই ল’বলৈ সন্মত হয়।
১০ মিনিটৰ ভিতৰত সামগ্ৰী ডেলিভাৰী কৰাৰ নিৰন্তৰ চাপৰ বাবে ডেলিভাৰী বয়সকলে তীব্ৰ বেগত বাহন চলোৱাৰ ফলত বহু পথ দুৰ্ঘটনা সংঘটিত হৈ আহিছে। লগতে বৰষুণ বা অত্যধিক গৰমৰ দৰে প্রতিকূল বতৰতো তেওঁলোকে বিপদসংকুলভাৱে কাম কৰিবলগীয়া হয়। যোৱা ৩১ ডিচেম্বৰত দেশজুৰি হাজাৰ হাজাৰ গিগ কৰ্মীয়ে (Gig Workers) সুৰক্ষা আৰু সামাজিক সুৰক্ষাৰ দাবীত ধৰ্মঘট কৰিছিল।
বিখ্যাত ডেলিভাৰী এপ্ Blinkit-এ ইতিমধ্যে তেওঁলোকৰ মূল শ্ল’গানটো সলনি কৰিছে। পূৰ্বৰ ‘১০ মিনিটত ১০ হাজাৰতকৈ অধিক সামগ্ৰী’ৰ পৰিৱৰ্তে এতিয়া ‘আপোনাৰ দুৱাৰমুখত ৩০ হাজাৰতকৈ অধিক সামগ্ৰী’ বুলি বিজ্ঞাপন দিছে। জেপ্ট’ আৰু আন কোম্পানীসমূহো একেই পথ অনুসৰণ কৰাৰ দিশে আগবাঢ়িছে।
২০২৫ চনৰ ২১ নৱেম্বৰৰ পৰা কাৰ্যকৰী হোৱা সামাজিক সুৰক্ষা কোড (Code on Social Security, 2020) অনুসৰি এতিয়াৰে পৰা গিগ কৰ্মীসকলক দুৰ্ঘটনা বীমা, স্বাস্থ্য সেৱা আৰু পেঞ্চনৰ দৰে সুবিধা প্ৰদান কৰাটো বাধ্যতামূলক কৰা হৈছে। সংসদত আম আদমী পাৰ্টিৰ সাংসদ ৰাঘৱ চাড্ডাই এই শ্ৰমিকসকলৰ দুৰ্দশাৰ কথা উত্থাপন কৰি চৰকাৰৰ দৃষ্টি আকৰ্ষণ কৰিছিল।
চৰকাৰৰ এই পদক্ষেপে ডেলিভাৰী খণ্ডত কাম কৰা লাখ লাখ যুৱক-যুৱতীৰ জীৱন আৰু কৰ্ম সংস্কৃতি অধিক সুৰক্ষিত কৰিব বুলি আশা কৰা হৈছে। যদিও এতিয়াও দ্রুত ডেলিভাৰী সেৱা অব্যাহত থাকিব, কিন্তু ই আৰু ‘১০ মিনিটৰ’ দৰে কঠিন সময়সীমাৰ গণ্ডীত আৱদ্ধ হৈ নাথাকিব।
