দেশৰ কোটি কোটি লোকে ইতিমধ্যে কোভিড ভেকচিনৰ দ্বিতীয়টো পালি গ্ৰহণ কৰিছে। অধিক সুৰক্ষাৰ বাবে বহুতে কোভিড ভেকচিনৰ বুষ্টাৰ পালিও গ্ৰহণ কৰিছে।
কিন্তু ইমান দিনে বিনামূলীয়াকৈ গ্ৰহণ কৰা কোভিড ভেকচিনৰ বুষ্টাৰ পালি এতিয়া আৰু বিনামূলীয়াকৈ ল’ব পৰা নাযাব। এনে বুষ্টাৰ পালিৰ বাবে মানুহে ব্যক্তিগত চিকিৎসালয়লৈ গৈ ধন ভৰিব লাগিব।
চৰকাৰে ব্যক্তিগত টিকাকৰণ কেন্দ্ৰত দেওবাৰৰ পৰা সকলো প্ৰাপ্তবয়স্কক কৰোনা ভাইৰাছৰ বুষ্টাৰ পালি প্ৰদানৰ অনুমতি প্ৰদানৰ সিদ্ধান্ত লৈছে।
ৰাষ্ট্ৰীয় সংবাদমাধ্যমৰ খবৰ অনুসৰি চৰকাৰ ইতিমধ্যে কোভিডৰ বুষ্টাৰ পালিৰ দামো বান্ধি দিছে। সেই অনুসৰি কভিশ্বিল্ডৰ ব্যয় হ’ব ৬০০ টকা। এই ভেকচিন বিধৰ ক্ষেত্ৰত কৰ আগৰ দৰে একেই থাকিব। আন এবিধ ভেকচিন কভোভাক্স উপলব্ধ হ’ব ৯০০ টকাত।
চেৰাম ইনষ্টিটিউট অৱ ইণ্ডিয়াৰ মুখ্য কাৰ্যবাহী বিষয়া আদাৰ পুনাৱালাই আজি এই পদক্ষেপক আদৰণি জনাইছে। তেওঁ ইয়াক এক গুৰুত্বপূৰ্ণ আৰু সময়োপযোগী সিদ্ধান্ত বুলি উল্লেখ কৰিছে।
তেওঁ কয় যে যিসকলে বিদেশ ভ্ৰমণ কৰিব বিচাৰে তেওঁলোকে তৃতীয় পালি অবিহনে ভ্ৰমণ কৰাত অসুবিধা পাইছে ।যিহেতু কেইবাখনো দেশে বুষ্টাৰ পালি গ্ৰহণ নকৰা লোকক সেই দেশত প্ৰৱেশৰ অনুমতি দিয়া নাই। এতিয়া ব্যক্তিগত খণ্ডৰ চিকিৎসালয়তো কোভিডৰ বুষ্টাৰ পালি উপলব্ধ হোৱাত সকলোৰে সুবিধা হ’ব বুলি পুনিৱালাই কয়।
