‘অসমত এনে কোনো ৰাজনৈতিক দল আৰু শক্তি নাই যিয়ে ৪ মাহ যুঁজ দি অকলে বিজেপিক পৰাস্ত কৰিব পাৰিব,‘ শুকুৰবাৰে গুৱাহাটীত সম্বোধন কৰা এক সংবাদমেলত এইদৰে স্বীকাৰ কৰে সাংসদ অজিত ভূঞাই।
তেওঁ লগতে কয় ‘অকলেই বিজেপিক পৰাভুত কৰিব বিচৰাসকলে মুৰ্খৰ স্বৰ্গত বাস কৰিছে। তেওঁলোকে জ্ঞাত বা অজ্ঞাতে কৰ’বাত বিজেপিৰ হৈ কাম কৰিছে।‘
তাৎপয্যপূৰ্ণভাৱে, বৰ্তমান সময়তো বিজেপিৰ সাংগঠনিক ভেটি মজবুত বুলি আওপকীয়াকৈ স্বীকাৰ কৰে সাংসদগৰাকীয়ে।
তেওঁ কয় ‘ভোট বিভাজন হোৱাৰ বাবেহে বিজেপি জয়ী হৈ আহিছে। আজিৰ তাৰিখত নিৰপেক্ষতাৰে ক’বলৈ গ’লে বিজেপিৰ সাংগঠনিক ভেটি সু-দৃঢ়। সেইকাৰণে সেই কথা উনুকিয়াই দিবলৈ আজিৰ সংবাদমেলখন সম্বোধন কৰিবলগীয়া হৈছে।‘
‘বিজেপি ধনবল আছে, বাহুবল বল আছে আৰু চৰকাৰ আছে সেয়েহে অন্য ৰাজনৈতিক দলে তেওঁলোকক প্ৰত্যাহ্বান জনোৱাৰ ক্ষেত্ৰত অসুবিধাৰ সন্মুখিন হ’ব,” সাংসদ ভূঞাই লগতে কয়।
ইপিনে, বিহাৰৰ নিৰ্বাচনৰ পৰা অসমৰ বিজেপি বিৰোধী শক্তিসমূহে প্ৰধানকৈ কংগ্ৰেছে শিক্ষা ল’ব লাগে বুলি সংবাদমেলত ভূঞাই উল্লেখ কৰে।
তেওঁ কয় ‘বিহাৰৰ নিৰ্বাচনৰ কিছুদিন আগলৈকে বিৰোধী ৰাজনৈতিক দলসমূহ ঐক্যবদ্ধ হ’ব পৰা নাছিল কিন্তু লাহে লাহে বিৰোধী দলসমূহে বাস্তৱ পৰিস্থিতি উপলব্ধি কৰিলে আৰু মহাজোঁট বন্ধনৰ সূচনা কৰিলে। নীতিশ কুমাৰ মুখ্যমন্ত্ৰী হ’লেও দেশৰ ৰাজনীতিত তেজস্বী যাদৱৰ নামটোহে বেছিকৈ উচ্চাৰিত হ’ব ধৰিছে। বিৰোধী শক্তি ঐক্যবদ্ধ হ’লে বিজেপিক পৰাভুত কৰাটো ইমান কঠিন নহ’ব।‘
তদুপৰি, অসমৰ কাৰণে সকলো ৰাজনৈতিক দল একত্ৰিত হ’লে বিজেপিক উৎখাত কৰাটো অতি সহজ হৈ পৰিব বুলি তেওঁ উল্লেখ কৰে।
ভূঞাৰ সংবাদমেলত স্পষ্ট মত ‘বিজেপিক উৎখাত কৰাৰ স্বাৰ্থত এটি নুন্যতম কাৰ্য্যসূচীৰ ভিত্তিত বিৰোধী ঐক্য বিচাৰিছো। মহাজোঁট কৰাটো বাস্তৱ সময়ৰ দাবী।‘
‘বিহাৰত তেজস্বী যাদৱহঁতৰ ৰাজনৈতিক পৰিকল্পনাত ত্ৰুটি ৰৈ গ’ল। ত্ৰুটি আৰু ৰণকৌশলগত বিচ্যুতি নাথাকিলহেঁতেন তেতিয়া তেওঁলোকে অনায়াসে ক্ষমতা দখল কৰিব পাৰিলেহেঁতেন।‘ বিহাৰত মহাগোট বন্ধনে চৰকাৰ গঠন কৰিব নোৱাৰাৰ কাৰণ বাখ্যা কৰি ভূঞাই কয়।
ইপিনে, বিহাৰৰ নিৰ্বাচনৰ পৰা প্ৰধানকৈ কংগ্ৰেছ দলটোৱে শিক্ষা ল’ব লাগে বুলি সদৰী কৰি ভুঞাই কয় ‘কংগ্ৰেছৰ নিজৰ মাজতে খেলি-মেলি থকাৰ কাৰণে তেওঁলোকে ভাল ফলাফল দেখুৱাব নোৱাৰিলে আৰু গ্ৰেণ্ড এলাইন্সত সহযোগিতা কৰিব নোৱাৰিলে। কংগ্ৰেছে আকোৰগোজ মনোভাৱ এৰিব লাগিব আৰু ২১ ৰ নিৰ্বাচনৰ পূৰ্বে প্ৰধান ভুমিকা ল’ব লাগিব। এই মুহূৰ্তলৈকে কংগ্ৰেছে তেনে পদক্ষেপ লোৱা দেখা নাই।‘
‘যদি কংগ্ৰেছে ভাবিছে বিজেপিৰ প্ৰতি অসমৰ ৰাইজ মোহভংগ হৈছে আৰু বিকল্প হিচাপে কংগ্ৰেছকে ভোট দিব বুলি ভাবিছে তেন্তে তেওঁলোকে এইটো ডাঙৰ ভুল কৰিছে। কংগ্ৰেছে বিগ ব্ৰাডাৰ হিচাপে সকলো বিজেপি বিৰোধী ৰাজনৈতিক শক্তিৰ সৈতে আলোচনাত মিলিত হ’ব লাগে।‘ ভূঞাই লগতে কয়।
কংগ্ৰেছ আৰু এআইয়ুডিএফে ৬ নং দফা কাৰ্য্যকৰী হোৱাটো দাবী জনাব লাগিব বুলিও তেওঁ সংবাদমেলত উল্লেখ কৰি লগতে কয় ‘এতিয়ালৈকে কংগ্ৰেছৰ কোনো দলীয় নেতৃত্বই বা বদৰুদ্দিন আজমলেও অসম চুক্তিৰ ৬ নং দফা ৰূপায়ণ কৰাৰ বাবে সবলে বা সজোৰে দাবী উত্থাপন কৰা নাই।
