বেদখলমুক্ত কৰা বনভূমিত আন কোনো প্ৰকল্প নিৰ্মাণ কৰিব নোৱাৰিব : গুৱাহাটী উচ্চ ন্যায়ালয়

গুৱাহাটী উচ্চ ন্যায়ালয়ে এক অতি গুৰুত্বপূৰ্ণ নিৰ্দেশ প্ৰদান কৰিছে। ন্যায়ালয়ে স্পষ্ট কৰি দিছে যে বেদখলকাৰীৰ পৰা মুক্ত কৰা বনভূমি আন কোনো কামত ব্যৱহাৰ কৰিব পৰা নাযাব। ইয়াৰ পৰিৱৰ্তে, পৰিৱেশৰ ভাৰসাম্য ঘূৰাই আনিবলৈ এই ভূমিত কেৱল গছ-গছনি ৰোপণ কৰি পুনৰ বনাঞ্চল গঢ়ি তুলিব লাগিব।

সংৰক্ষিত বনাঞ্চলত অবৈধভাৱে বাস কৰা লোকসকলৰ বিৰুদ্ধে ন্যায়ালয়ে কঠোৰ স্থিতি গ্ৰহণ কৰিছে। সকলো বেদখলকাৰীক ত্ৰিশ দিনৰ ভিতৰত বনভূমি এৰি দিবলৈ নিৰ্দেশ দিয়া হৈছে। যদি নিৰ্ধাৰিত সময়ৰ ভিতৰত মাটি এৰি নিদিয়ে, তেন্তে কৰ্তৃপক্ষই তেওঁলোকৰ বিৰুদ্ধে কঠোৰ ব্যৱস্থা গ্ৰহণ কৰিব। জিলা প্ৰশাসন, আৰক্ষী আৰু বন বিভাগক একেলগে মিলি সম্পূৰ্ণৰূপে এই বেদখলমুক্ত অভিযান চলাবলৈ উচ্চ ন্যায়ালয়ে জানিবলৈ দিছে।

বিচাৰপীঠখনে জোৰ দি কয় যে মাটিখিনি খালী কৰাৰ পিছত কোনো ধৰণৰ উন্নয়নমূলক প্ৰকল্পৰ বাবে সেই মাটি ব্যৱহাৰ কৰিব নোৱাৰিব। বনাঞ্চলৰ পৰিৱেশ ঘূৰাই আনিবলৈ পৰিকল্পিতভাৱে তাত কেৱল সেউজীয়া আৱৰণহে গঢ়ি তুলিব লাগিব।

ন্যায়ালয়ে লগতে এই কথাও উল্লেখ কৰিছে যে আধাৰ কাৰ্ড বা ভোটাৰ পৰিচয় পত্ৰৰ দৰে নথিপত্ৰই বনভূমিত অবৈধভাৱে থকা লোকসকলক কোনো ধৰণৰ আইনী সুৰক্ষা প্ৰদান নকৰিব। ইয়াৰ উপৰিও, যিসকল লোকে বেআইনীভাৱে বনভূমি দখল কৰি আছে, তেওঁলোকৰ বিদ্যুতৰ সংযোগ লগে লগে কৰ্তন কৰিবলৈ অসম শক্তি বিতৰণ কোম্পানী লিমিটেডক ন্যায়ালয়ে নিৰ্দেশ দিছে।