বৰপেটা জিলাৰ পাঠশালাত সোমবাৰে বিশ্বকৰ্মা পূজাৰ দিনটোত বিদ্যুৎ যোগান ধৰাত ব্যৰ্থ হোৱাৰ বাবে ৰাইজে অসম শক্তি বিতৰণ কোম্পানী লিমিটেড (এ পি ডি চি এল)ৰ কাৰ্যালয় ঘেৰাও কৰে।
পাঠশালা চহৰত থকা এপিডিচিএলৰ কাৰ্যালয়ত উত্তেজিত ৰাইজে শিলাবৰ্ষণ কৰাৰ পিছতে পৰিস্থিতিয়ে হিংসাত্মক ৰূপ লয়। অঞ্চলটোত চি আৰ পি এফ তথা আৰক্ষী বাহিনীকে ধৰি নিৰাপত্তা বাহিনীৰ লোক নিয়োগ কৰা হয়।
স্থানীয় উন্মত জনতাই এপিডিচিএললৈ অহাযোৱা কৰা পথটো অৱৰোধ কৰাৰ লগতে পথৰ ওপৰতে টায়াৰ জ্বলাই দিয়ে।
ৰাইজে লগতে পাঠশালা-হাউলী পথটোও অৱৰোধ কৰে। বজালী মহকুমাৰ মহকুমা আৰক্ষী বিষয়াই পৰিস্থিতিৰ বুজ ল’বলৈ ঘটনাস্থলী পৰিদৰ্শন কৰে।
উল্লেখযোগ্য যে প্ৰায় ৭-৮ ঘন্টা ধৰি পাঠশালাক বিদ্যৎ সেৱা বন্ধ হৈ আছিল। স্থানীয় ৰাইজ ৰাজপথলৈ ওলাই আহি বিদ্যুৎ বিভাগৰ ব্যৰ্থতাৰ বিৰুদ্ধে ধৰ্ণা দিয়ে।
সন্ধিয়া প্ৰায় ৬ বজাৰ পৰা বিক্ষুব্ধ ৰাইজ ওলাই আহি এপিডিচিএলৰ কাৰ্যালয়ৰ সন্মুখত জুম বান্ধিবলৈ আৰম্ভ কৰে।
সংশ্লিষ্ট কৰ্তৃপক্ষই আশ্বাস দিয়ে যে নিশা ১১ বজাৰ পিছতহে বিদ্যুৎ সেৱা যোগান ধৰিব পৰা যাব। কিন্তু মাজ নিশালৈকে বজালী মহকুমাত বিদ্যুৎ সেৱা বন্ধ আছে।
পাঠশালাত বিশ্বকৰ্মা পূজাৰ দিনটো বিদ্যুৎ সেৱা অবিহনে ৰাইজে পূজা পালন কৰিবলগীয়া হয়।
বিদ্যুৎ সেৱা বন্ধ থকাৰ বাবে পাঠশালাৰ শ্বহীদ মদন ৰাউতা অসামৰিক চিকিৎসালয়ত চিকিৎসাধীন ৰোগীসকলে অসহ্যকৰভাৱে সময় কটাবলগীয়া হয়। ৰোগীসকলে বিদ্যুতৰ অভাৱত ফেন চলাব নোৱাৰাৰ বাবে গৰমৰ পৰা ৰক্ষা পাবলৈ বিচনীৰ বা ল’বলগীয়া হয়।