স্বাধীনতাৰ সত্তৰ বছৰৰ পাছতো কোনো চৰকাৰী আঁচনিয়ে ঢুকি নোপোৱা বোকাখাত সমষ্টিৰ এখন গাঁৱৰ নাম গেলেকা বালিজান গাওঁ৷ কৃষি মন্ত্ৰী অতুল বৰাৰ সমষ্টিৰ এই মুড়া বস্তিত নাই বিশুদ্ধ খোৱাপানীৰ ব্যৱস্থা, যাতায়তৰ বাবে নাই সুচল বাট-পথ।
বিজেপি চৰকাৰৰ বহুল প্ৰচাৰিত দীনদয়াল উপাধ্যায় গ্ৰাম্য বৈদ্যুতিকৰণ আঁচনি, প্ৰধান মন্ত্ৰী গ্ৰাম আৱাস যোজনা অথবা অন্য কোনো চৰকাৰী আঁচনি এতিয়াও আহি পোৱা নাই গাওঁখন।
দীৰ্ঘদিন সকলো সুবিধাৰ পৰা বঞ্চিত বস্তিটোৰ বাসিন্দাসকলে এতিয়া পঞ্চায়ত নিৰ্বাচনৰ পৰা আৰম্ভ কৰি লোকসভা অথবা বিধান সভাৰ নিৰ্বাচন বৰ্জনৰ কথা চিন্তা কৰিছে৷
ম’হমাইকী গাওঁ পঞ্চায়তৰ অন্তৰ্গত গোলাঘাট-কাৰ্বি আংলং জিলাৰ সীমান্তৰ গেলেকা বালিজানৰ এই মূড়া বস্তিত আছে প্ৰায় ৪০ ঘৰ মানুহ।
প্ৰাক্তন চাহ শ্ৰমিক অধ্যুষিত এই বস্তিৰ কোনো লোকেই আজিলৈকে চৰকাৰী কোনো সা-সুবিধা পোৱা নাই৷ লোকসকলৰ খোৱা পানীৰ উৎস হৈছে পাহাৰৰ নামনিৰ এটা প্ৰাকৃতিক উঁহ৷ অথচ সমীপৰ নাহৰজান চাহ বাগিচাত ব্যৱহৃত বিভিন্ন ৰাসায়নিক দ্ৰব্য বৰষুণৰ পানীত উটি আহি এই উহঁটোত পৰে বুলিও জানে সকলোৱে।
পাহাৰৰ দাঁতি কাষৰীয়া অঞ্চল হোৱাৰ বাবে এই অঞ্চলটোত টিউবেলৰ পানীও নোলায়৷ মূড়া বস্তিৰ নাতি দূৰৰ গেলেকা বালিজান গাঁৱত স্বজল ধাৰাৰ এটা চৰকাৰী পানী যোগান আঁচনি স্থাপন হ’ল যদিও এই আঁচনিৰ পৰাও বস্তিটোক বঞ্চিত কৰা হ’ল৷
মন্ত্ৰী তথা অগপ সভাপতি অতুল বৰায়ো নিৰ্বাচনৰ পূৰ্বে বস্তিটোলৈ গৈ নিৰ্বাচিত কৰিলে মূড়া বস্তিৰ সকলো সমস্যা সমাধানৰ প্ৰতিশ্ৰুতি দিছিল৷
বস্তিটোলৈ যোৱা মূল পথতো গো বাটসদৃশ৷ বোকাপানী ফালি বিদ্যালয়লৈ যোৱা কণ-কণ ছাত্ৰ-ছাত্ৰীৰ লগতে গাওঁবাসীয়েও বাৰিষাৰ দিনকেইটাত একমাত্ৰ এই পথেৰেই দৈনন্দিন যাতায়াত কৰিব লাগে৷
ইফালে কাৰ্বি আংলঙৰ গাতে লাগি থকা গাওঁখনত বনৰীয়া হাতীৰ উপদ্ৰৱৰ উপৰি সাপ আৰু বাঘৰ ভয়৷ বনৰীয়া হাতীয়ে খেতি পথাৰ নষ্ট কৰাৰ লগতে কেতিয়াবা ঘৰ-দুৱাৰো নষ্ট কৰি আহিছে৷
বস্তিৰ বাসিন্দাই বিজুলীবাতিৰ মুখ আজিও নেদেখিলে৷ কেৰাচিন তেলেই তেওঁলোকৰ পোহৰৰ একমাত্ৰ উৎস৷ কেৰাচিন তেলৰ চাকিৰ পোহৰতেই ছাত্ৰ-ছাত্ৰীয়ে অধ্যয়নো কৰিব লাগে, ভোটা জ্বলাই হাতীও খেদিব লাগে। আৰু কেৰাচিনৰো আছে নাটনি৷
এয়া অগপৰ মুৰব্বী, মন্ত্ৰী অতুল বৰাৰ গৃহ সমষ্টি বোকাখাতৰ মুড়া বস্তিৰ অৱস্থা৷