মণিপুৰত এপ্ৰিলৰ পৰা জুলাই মাহলৈ ব্যক্তিগত খণ্ডৰ বিদ্যালয় সমূহক মাচুল সংগ্ৰহ নকৰিবলৈ নিৰ্দেশ
মণিপুৰৰ শিক্ষা মন্ত্ৰী ড০ টি এইছ ৰাধেশ্যামে ৰাজ্যখনৰ বিদ্যালয় সমূহক এপ্ৰিলৰ পৰা জুলাই মাহলৈ মাচুল সংগ্ৰহ নকৰিবলৈ আহ্বান জনাইছে।
যদিহে বিদ্যালয় সমূহে এপ্ৰিলৰ পৰা জুলাই মাহলৈ মাচুল সংগ্ৰহ কৰিছে তেন্তে বছৰৰ বাকী সময়ছোৱাৰ ভিতৰত তিনিমাহ মাচুল সংগ্ৰহ নকৰিবলৈ আহ্বান জনায় শিক্ষা মন্ত্ৰী গৰাকীয়ে।
ৰাধেশ্যামে বিদ্যালয় সমূহক নামভৰ্তি মাচুলকে ধৰি ২০২০ চনৰ মাৰ্চ মাহলৈ কোনো ধৰণৰ মাচুলৰ ক্ষেত্ৰত বৃদ্ধি নকৰাকৈ মাচুল সমূহ সংগ্ৰহ কৰাৰ বাবে অনুমতি দিছে।
সোমবাৰে ৰাজধানী ইম্ফলত এখন সংবাদমেল সম্বোধন কৰি এই নিৰ্দেশ দিয়ে মণিপুৰৰ শিক্ষা মন্ত্ৰী গৰাকীয়ে।
শিক্ষা মন্ত্ৰী গৰাকীয়ে ৰাজ্যখনৰ শিক্ষা বিভাগে ইতিমধ্যে ব্যক্তিগত খণ্ডৰ বিদ্যালয় সমূহৰ মাচুল সংগ্ৰহ, শিক্ষক-শিক্ষয়ত্ৰীৰ দৰমহা আদিৰ ক্ষেত্ৰত এক নিৰ্দেশনা প্ৰকাশ কৰিছে বুলিও জানিবলৈ দিয়ে।
শিক্ষামন্ত্ৰী গৰাকীয়ে ৰাজ্যৰ ব্যাক্তিগত খণ্ডৰ বিদ্যালয় সমূহক এপ্ৰিল মাহৰ পৰা জুলাই মাহলৈ শিক্ষক-শিক্ষয়ত্ৰী সকলক দৰমহা আদায় দিয়াৰ বাবেও নিৰ্দেশ দিয়ে।
ব্যক্তিগত খণ্ডৰ বিদ্যালয় সমূহৰ শিক্ষক-শিক্ষয়ত্ৰী আৰু কৰ্মচাৰী সকলৰ দৰমহা বিদ্যালয়ৰ ছাত্ৰ-ছাত্ৰীৰ অনুপাতে প্ৰদান কৰাৰ বাবে নিৰ্দেশনাত উল্লেখ আছে বুলিও সংবাদমেলত ৰাধেশ্যামে কয়।
শিক্ষা বিভাগৰ নিৰ্দেশনা অনুসৰি যিবোৰ ব্যক্তিগত খণ্ডৰ বিদ্যালয়ত ছাত্ৰ-ছাত্ৰী ২০০ কৈ কম আছে সেই সমূহ বিদ্যালয়ত শিক্ষক-শিক্ষয়িত্ৰী আৰু কৰ্মচাৰী সকলক ৫০ শতাংশ দৰমহা আদায় দিয়াৰ বাবে নিৰ্দেশ দিয়া হৈছে।
আনহাতে, যিসকল বিদ্যালয়ত ছাত্ৰ-ছাত্ৰী ৭০০ কৈ অধিক আছে সেই সমূহ বিদ্যালয়ে সম্পূৰ্ণ দৰমহা আদায় দিব লাগিব।