সদৌ অসম পুথি প্ৰকাশক আৰু বিক্ৰেতা সন্থাই আয়োজন কৰা ২১ সংখ্যক উত্তৰ-পূব গ্ৰন্থমেলা আজিৰে পৰা অহা ১২ নৱেম্বৰলৈ মহানগৰীৰ চানমাৰি অসম অভিযান্ত্ৰিক খেল পথাৰত অনুষ্ঠিত হ’ব।
২১ সংখ্যক গ্ৰন্থমেলাৰ উদ্বোধনী অনুষ্ঠান শুকুৰবাৰে আৱেলি ৪ বজাৰ পৰা অনুষ্ঠিত হ’ব।
গ্ৰন্থ মেলাৰ উদ্বোধনী অনুষ্ঠানত মুখ্য অতিথি ৰূপে উপ-ৰাষ্ট্ৰপতি এম ভেংকায়া নাইডুৱে অংশ লোৱাৰ লগতে সন্মনীয় অতিথি হিচাপে উপস্থিত থাকিব ৰাজ্যপাল অধ্যাপক জগদীশ মুখী আৰু মুখ্য মন্ত্ৰী সৰ্বানন্দ সোণোৱাল।
এইবাৰ গ্ৰন্থমেলাত দেশৰ বিভিন্ন প্ৰান্তৰ ডেৰশৰো অধিক গ্ৰন্থ প্ৰকাশকে অংশ ল’ব বুলি জানিব পৰা গৈছে। তদুপৰি, বাংলাদেশৰ এটা প্ৰকাশন গোষ্ঠীয়েও গ্ৰন্থমেলাখনত অংশ ল’ব।
গ্ৰন্থমেলাৰ সময়ছোৱাত বিভিন্ন বিষয়ৰ কাৰ্যসূচী অনুষ্ঠিত কৰা হ’ব বুলি আয়োজক সমিতিয়ে জানিবলৈ দিছে।
উদ্বোধনী অনুষ্ঠানত উপ-ৰাষ্ট্ৰপতি ভেংকায়া নাইডুৱে অসম সাহিত্য সভাই আগবঢ়োৱা শশীচন্দ্ৰ বৰবৰুৱা বঁটা এইবাৰ সাদিন-প্ৰতিদিন গোষ্ঠীৰ স্বত্তাধিকাৰী জয়ন্ত বৰুৱাক প্ৰদান কৰিব।
দিলীপ কুমাৰ দত্ত সভাগৃহত ২ নবেম্বৰৰ আবেলি ৬ বজাত অনুষ্ঠিত হ’ব মুনীন বৰকটকী সোঁৱৰণি আলোচনা চক্ৰ। আলোচনা চক্ৰখন উদ্বোধন কৰিব বিশিষ্ট নিবন্ধকাৰ লক্ষ্মীনাথ তামুলীয়ে।
সেইদৰে ১১ নৱেম্বৰলৈ আয়োজক সমিতিয়ে গ্ৰন্থমেলা চৌহদত বিভিন্ন আকৰ্ষণীয় সাহিত্যমূলক অনুষ্ঠান, আলোচনা চক্ৰ তথা ভাৱ বিনিময় অনুষ্ঠানৰ আয়োজন কৰিছে।
