উত্তৰ-পূব শিশু গ্ৰন্থমেলা সমিতিয়ে প্ৰতি বছৰে আগ বঢ়াই অহা মাধৱ কন্দলি বঁটা এইবাৰ আগ বঢ়োৱা হৈছে প্ৰথিতযশা সাহিত্যিক হোমেন বৰগোহাঞিলৈ। এই কথা সমিতিৰ তৰফৰ পৰা জনোৱা হৈছে।
উল্লেখযোগ্য যে উত্তৰ-পূব শিশু গ্ৰন্থমেলা সমিতিয়ে অসমীয়া ভাষা, সাহিত্য, সংস্কৃতিলৈ অনবদ্য বৰঙনি আগ বঢ়োৱা এজন প্ৰসিদ্ধ সাহিত্যিকক প্ৰতি বছৰে ‘মাধৱ কন্দলি বঁটা আগ বঢ়াই আহিছে।
সাহিত্যিকজনক চলিত উত্তৰ-পূব শিশু গ্ৰন্থমেলাৰ সামৰণিৰ দিনা এই বঁটা প্ৰদান কৰা হ’ব।
উল্লেখযোগ্য যে আজিৰ পৰা নগাৱঁৰ নেহৰুবালিত উত্তৰ-পূব শিশু গ্ৰন্থমেলা আৰম্ভ হৈছে। ৮ দিন ধৰি চলিব লগীয়া এই গ্ৰন্থমেলা অহা ৭ নৱেম্বৰত অন্ত পৰিব।
আনহাতে, উক্ত সামৰণি সভাতেই গ্ৰন্থমেলা সমিতিয়ে প্ৰকৃতি সংৰক্ষণৰ ক্ষেত্ৰত বিশেষ বৰঙনি আগবঢ়োৱা বাবে জখলাবন্ধা থানাৰ ভাৰপ্ৰাপ্ত আৰক্ষী বিষয়া দেৱেন বৰাক চলিত বৰ্ষৰ ‘বনবন্ধু বঁটা’ প্ৰদান কৰিব।